POK , 06 നവംബര് (H.S.)

പാക് അധിനിവേശ കശ്മീരിലെ (PoK) റാവലക്കോട്ട് നഗരത്തിൽ ജനകീയ പ്രക്ഷോഭകർക്ക് നേരെ പാകിസ്ഥാൻ സുരക്ഷാ സേന നടത്തിയ അതിക്രമങ്ങളിൽ നാല് കുട്ടികൾ ഉൾപ്പെടെ 18 പേർ കൊല്ലപ്പെട്ടു. അടിസ്ഥാന മനുഷ്യാവകാശങ്ങളും കുറഞ്ഞ നിരക്കിലുള്ള ഭക്ഷ്യധാന്യങ്ങളും ആവശ്യപ്പെട്ട് തെരുവിലിറങ്ങിയ ജനങ്ങൾക്ക് നേരെ പാകിസ്ഥാൻ റേഞ്ചേഴ്സും ഫ്രോണ്ടിയർ കോർപ്സും പോലീസും ചേർന്ന് തോക്കുകളും ഡ്രോണുകളും ആർപിജി-7 റോക്കറ്റുകളും ഉപയോഗിച്ച് ക്രൂരമായി ആക്രമണം നടത്തുകയായിരുന്നുവെന്ന് പ്രക്ഷോഭകർ ആരോപിക്കുന്നു.

റാവലക്കോട്ട് ബസ് ടെർമിനലിന് സമീപം പുലർച്ചെ നമസ്കാരത്തിന് ശേഷം സമീപത്തെ ചത്വരത്തിലേക്ക് സമാധാനപരമായി നീങ്ങുകയായിരുന്ന നൂറുകണക്കിന് ആളുകൾക്ക് നേരെയാണ് സൈന്യം പെട്ടെന്ന് വെടിയുതിർത്തത്. ജനക്കൂട്ടത്തിന് നേരെ ഒരു ആർപിജി-7 റോക്കറ്റ് തൊടുത്തുവിട്ടതോടെ വൻ പരിഭ്രാന്തി പടരുകയും ആളുകൾ ചിതറിയോടാൻ ശ്രമിച്ചപ്പോൾ സൈനികർ വെടിവെപ്പ് നടത്തുകയുമായിരുന്നു എന്ന് റിപ്പോർട്ടുകൾ വ്യക്തമാക്കുന്നു. വീടുകൾക്ക് നേരെയും ഡ്രോൺ, റോക്കറ്റ് ആക്രമണങ്ങൾ നടത്തിയതായും നിരവധി കെട്ടിടങ്ങൾ തകരുകയും പ്രദേശത്ത് തീപിടുത്തമുണ്ടാവുകയും ചെയ്തതായും പ്രദേശവാസികൾ പറയുന്നു. പരിക്കേറ്റവരെ രക്ഷിക്കാൻ ശ്രമിച്ചവർക്ക് നേരെയും വെടിവെപ്പുണ്ടായതായും മരിച്ചവരുടെ മൃതദേഹങ്ങൾ ഏറ്റുവാങ്ങാൻ പോലും കുടുംബങ്ങൾക്ക് അനുവാദം നൽകിയില്ലെന്നും ഗുരുതരമായ ആരോപണങ്ങൾ ഉയർന്നിട്ടുണ്ട്.

ആക്രമണത്തിൽ ഉപയോഗിച്ച ആർപിജി-7 റോക്കറ്റിന്റെ അവശിഷ്ടങ്ങൾ ക്യാമറയ്ക്ക് മുന്നിൽ പ്രദർശിപ്പിച്ചുകൊണ്ട് ജോയിന്റ് അവാമി ആക്ഷൻ കമ്മിറ്റി നേതാവ് ഉമർ നസീർ കശ്മീരി അന്താരാഷ്ട്ര സമൂഹത്തിന്റെയും ഐക്യരാഷ്ട്രസഭയുടെയും ഇടപെടൽ ആവശ്യപ്പെട്ടു. ജനറൽ അസിം മുനീറിന്റെ നേതൃത്വത്തിലുള്ള സൈനിക നീക്കങ്ങൾക്കെതിരെ ലോകരാജ്യങ്ങൾ ശബ്ദമുയർത്തണമെന്ന് അദ്ദേഹം അഭ്യർത്ഥിച്ചു. പാകിസ്ഥാൻ സൈന്യത്തിന്റെ നടപടികളിൽ യാതൊരു വിട്ടുവീഴ്ചയ്ക്കുമില്ലെന്നും ഉത്തരവാദികളായ സൈനിക മേധാവികളെ വിചാരണ ചെയ്യണമെന്നും ജെഎഎസി നേതാവ് സർദാർ അമൻ വ്യക്തമാക്കി.

ഗോതമ്പ് മാവ് ഉൾപ്പെടെയുള്ള അവശ്യസാധനങ്ങളുടെ അമിതവില, വിദ്യാഭ്യാസ പ്രതിസന്ധി, അടിസ്ഥാന മനുഷ്യാവകാശ നിഷേധം എന്നിവ ചൂണ്ടിക്കാട്ടി കഴിഞ്ഞ ജൂൺ മാസത്തിലാണ് ജോയിന്റ് അവാമി ആക്ഷൻ കമ്മിറ്റിയുടെ നേതൃത്വത്തിൽ പ്രതിഷേധം ആരംഭിച്ചത്. തുടർന്ന് നേതാക്കളെ അറസ്റ്റ് ചെയ്യുകയും സംഘടനയെ നിരോധിക്കുകയും ചെയ്തതോടെ രോഷം ആളിക്കത്തുകയും പ്രക്ഷോഭം മറ്റ് പ്രദേശങ്ങളിലേക്ക് വ്യാപിക്കുകയുമായിരുന്നു. മുസാഫറാബാദിലും സമാനമായ സംഘർഷങ്ങൾ റിപ്പോർട്ട് ചെയ്യപ്പെട്ടു.

സംഭവങ്ങളെക്കുറിച്ചുള്ള വിവരങ്ങളും ദൃശ്യങ്ങളും പുറംലോകമറിയുന്നത് തടയാൻ റാവലക്കോട്ടിൽ ഇന്റർനെറ്റ്, ടെലിഫോൺ സേവനങ്ങളും ചിലയിടങ്ങളിൽ വൈദ്യുതിയും അധികൃതർ വിച്ഛേദിച്ചിരിക്കുകയാണ്. എന്നാൽ ഇത്തരം നിയന്ത്രണങ്ങൾ കൊണ്ട് ജനങ്ങളുടെ ശബ്ദം അടിച്ചമർത്താൻ കഴിയില്ലെന്നും പ്രക്ഷോഭം ശക്തമായി തുടരുമെന്നും പ്രാദേശിക നേതാക്കൾ മുന്നറിയിപ്പ് നൽകി.

---------------

Hindusthan Samachar / Roshith K