Newdelhi, 06 നവംബര് (H.S.)

ന്യൂഡൽഹി: ഇന്ത്യ തദ്ദേശീയമായി വികസിപ്പിച്ച ഹ്രസ്വദൂര പ്രതല-പ്രതല ക്വാസി-ബാലിസ്റ്റിക് മിസൈലായ ‘പ്രളയ്’ വിജയകരമായി പരീക്ഷിച്ച് പ്രതിരോധ ഗവേഷണ വികസന കേന്ദ്രം (ഡി.ആർ.ഡി.ഒ). ഒഡീഷ തീരത്തെ ഡോ. എ.പി.ജെ. അബ്ദുൾ കലാം ദ്വീപിൽ നിന്നായിരുന്നു പരീക്ഷണം നടന്നത്. മിസൈലിന്റെ പ്രവർത്തനക്ഷമതയും കൃത്യതയും പരിശോധിക്കുന്നതിനുള്ള യൂസർ ഇവാലുവേഷൻ ട്രയലുകളുടെ ഭാഗമായാണ് ഈ വിക്ഷേപണം നടത്തിയത്. പരീക്ഷണം പൂർണ വിജയമായതോടെ മിസൈൽ സംവിധാനം ഉടൻ തന്നെ ഇന്ത്യൻ സായുധ സേനയുടെ ഭാഗമാകുമെന്ന കാര്യം ഉറപ്പായിക്കഴിഞ്ഞു.

രാവിലെ 11:10 ഓടെയായിരുന്നു മിസൈൽ വിക്ഷേപിച്ചത്. ചാന്ദിപ്പൂരിലെ ഇന്റഗ്രേറ്റഡ് ടെസ്റ്റ് റേഞ്ചിൽ സ്ഥാപിച്ച വിവിധ നിരീക്ഷണ സംവിധാനങ്ങളും സെൻസറുകളും മിസൈലിന്റെ സഞ്ചാരപാത സൂക്ഷ്മമായി നിരീക്ഷിക്കുകയും ലക്ഷ്യങ്ങളെല്ലാം കൃത്യമായി കൈവരിച്ചതായി സ്ഥിരീകരിക്കുകയും ചെയ്തു.

സൈന്യത്തിന് കരുത്താകുന്ന 'പ്രളയ്'

ഇന്ത്യൻ സൈന്യത്തിന്റെ യുദ്ധസജ്ജതയും പ്രതിരോധ ശേഷിയും വർധിപ്പിക്കുന്നതിൽ വലിയ നാഴികക്കല്ലാണ് ഈ നേട്ടമെന്ന് പ്രതിരോധ മന്ത്രാലയം വ്യക്തമാക്കി. പരമ്പരാഗത പോർമുനകൾ വഹിക്കാൻ ശേഷിയുള്ള ഈ മിസൈൽ ശത്രുവിന്റെ വ്യോമപ്രതിരോധ സംവിധാനങ്ങളെ കബളിപ്പിച്ച് കൃത്യമായ പ്രഹരമേൽപ്പിക്കാൻ രൂപകൽപ്പന ചെയ്തിട്ടുള്ളതാണ്.

സാധാരണ ബാലിസ്റ്റിക് മിസൈലുകളിൽ നിന്ന് വ്യത്യസ്തമായി, പറക്കലിനിടയിൽ ദിശയും ഉയരവും വ്യതിയാനം വരുത്താൻ കഴിയുന്ന 'ക്വാസി-ബാലിസ്റ്റിക്' സ്വഭാവമാണ് പ്രളയിന്റെ പ്രധാന സവിശേഷത. അതിനാൽ ശത്രുക്കളുടെ റഡാറുകൾക്കും മിസൈൽ പ്രതിരോധ സംവിധാനങ്ങൾക്കും ഇതിന്റെ സഞ്ചാരപാത മുൻകൂട്ടി കണ്ടെത്താനോ തടയാനോ സാധിക്കില്ല. 150 മുതൽ 500 കിലോമീറ്റർ വരെ ദൂരപരിധിയിലുള്ള ലക്ഷ്യസ്ഥാനങ്ങളെ തകർക്കാൻ ശേഷിയുള്ള ഈ മിസൈലിന് 500 മുതൽ 1000 കിലോഗ്രാം വരെ ഭാരമുള്ള പോർമുനകൾ വഹിക്കാൻ സാധിക്കും. ഖര ഇന്ധനത്തിൽ പ്രവർത്തിക്കുന്ന റോക്കറ്റ് മോട്ടോറാണ് മിസൈലിന് കരുത്തേകുന്നത്.

തദ്ദേശീയ പ്രതിരോധ മുന്നേറ്റം

ഹൈദരാബാദിലെ റിസർച്ച് സെന്റർ ഇമ്രാത്തും ഡി.ആർ.ഡി.ഒയുടെ മറ്റ് അനുബന്ധ ലബോറട്ടറികളും ചേർന്നാണ് മിസൈൽ പൂർണമായും ഇന്ത്യയിൽ വികസിപ്പിച്ചെടുത്തത്. ഭാരത് ഡൈനാമിക്സ് ലിമിറ്റഡ് ആണ് ഇതിന്റെ നിർമാണ പങ്കാളിയായി പ്രവർത്തിക്കുന്നത്.

വിജയകരമായ പരീക്ഷണത്തിന് പിന്നിൽ പ്രവർത്തിച്ച ഡി.ആർ.ഡി.ഒ ശാസ്ത്രജ്ഞരെയും സൈനിക ഉദ്യോഗസ്ഥരെയും പ്രതിരോധ മന്ത്രി രാജ്നാഥ് സിംഗ് അഭിനന്ദിച്ചു. രാജ്യത്തിന്റെ അതിർത്തി സുരക്ഷ കൂടുതൽ ശക്തമാക്കാൻ ഈ മിസൈൽ വലിയ സംഭാവന നൽകുമെന്ന് അദ്ദേഹം വ്യക്തമാക്കി. പ്രതിരോധ സെക്രട്ടറി രാജേഷ് കുമാർ സിംഗും സംഘത്തിന് അഭിനന്ദനങ്ങൾ അറിയിച്ചു. അതിർത്തിയിലെ അടിയന്തര സാഹചര്യങ്ങൾ നേരിടാനും പരമ്പരാഗത പ്രഹരശേഷി വർധിപ്പിക്കാനും 'പ്രളയ്' മിസൈൽ സംവിധാനം സായുധ സേനയ്ക്ക് വലിയൊരു മുതൽക്കൂട്ടാകും.

---------------

Hindusthan Samachar / Roshith K