Lucknow , 08 നവംബര് (H.S.)

ലഖ്നൗ/അയോധ്യ: അയോധ്യയിൽ ഇനി ഒരിക്കലും രാമഭക്തർക്ക് നേരെ വെടിയുണ്ടകൾ പായുകയോ, ‘ജയ് ശ്രീറാം’ മുഴക്കുന്നവർക്ക് നേരെ ലാത്തിച്ചാർജ്ജ് ഉണ്ടാവുകയോ ചെയ്യില്ലെന്ന് ഉത്തർപ്രദേശ് മുഖ്യമന്ത്രി യോഗി ആദിത്യനാഥ്. അയോധ്യയിൽ നിഷാദ് സമുദായത്തിലെ അംഗങ്ങൾക്കൊപ്പം ദീപാവലി ആഘോഷങ്ങളിൽ പങ്കെടുത്തു സംസാരിക്കവെയാണ് മുഖ്യമന്ത്രി നിർണായക പ്രഖ്യാപനം നടത്തിയത്. കഴിഞ്ഞകാലങ്ങളിലെ അക്രമസംഭവങ്ങളെ പരോക്ഷമായി പരാമർശിച്ച അദ്ദേഹം, അയോധ്യയുടെ പ്രതാപവും സമാധാനവും ഇല്ലാതാക്കാൻ ഒരു ദുഷ്ടശക്തികളെയും അനുവദിക്കില്ലെന്നും വ്യക്തമാക്കി.

അയോധ്യയിലെ രാംഘട്ട് ഹാൾട്ടിന് സമീപമുള്ള നിഷാദ് കോളനിയിൽ സംഘടിപ്പിച്ച ദീപാവലി മിലൻ പരിപാടിയിൽ എത്തിയ മുഖ്യമന്ത്രി, പ്രദേശവാസികൾക്കൊപ്പം സമയം ചെലവഴിക്കുകയും ദീപാവലി ആശംസകൾ നേരുകയും ചെയ്തു. ചടങ്ങിൽ വെച്ച് നിഷാദ് സമുദായത്തിലെ അംഗങ്ങൾ, വഞ്ചിക്കാർ, ശുചീകരണ തൊഴിലാളികൾ, കൗൺസിലർമാർ എന്നിവരെ ആദരിക്കുകയും ദീപാവലി സമ്മാനങ്ങൾ വിതരണം ചെയ്യുകയും ചെയ്തു.

അയോധ്യയുടെ പവിത്രത സംരക്ഷിക്കാൻ ആഹ്വാനം

അയോധ്യയുടെ പവിത്രതയ്ക്കും അന്തസ്സിനും കോട്ടം വരുത്താൻ ഒരു തരത്തിലുള്ള “മന്ഥരമാർക്കും മാരീചന്മാർക്കും” ഇനി സാധിക്കില്ലെന്ന് അദ്ദേഹം പ്രസംഗത്തിൽ എടുത്തുപറഞ്ഞു. പഞ്ചകോശി, 14 കോശി, 84 കോശി പരിക്രമകൾ തടസ്സമില്ലാതെ നടക്കുമെന്നും മുഖ്യമന്ത്രി ഉറപ്പുനൽകി. അയോധ്യയുടെ പൈതൃകവും ഭംഗിയും നിലനിർത്തേണ്ടത് ഓരോ പൗരന്റെയും ഉത്തരവാദിത്തമാണെന്നും നഗരത്തെ ലോകത്തിന് മുന്നിൽ മികച്ച രീതിയിൽ ഉയർത്തിക്കാട്ടാൻ ജനങ്ങൾ ഒരുമിച്ച് നിൽക്കണമെന്നും അദ്ദേഹം ആവശ്യപ്പെട്ടു.

സുഭരണവും സാമൂഹിക നീതിയും

ഡോ. ബി. ആർ. അംബേദ്കറുടെ ആദർശങ്ങളെ അനുസ്മരിച്ചുകൊണ്ട്, ഭരണകൂടത്തിന്റെ ക്ഷേമപദ്ധതികൾ സമൂഹത്തിലെ ഏറ്റവും താഴെക്കിടയിലുള്ള പാവപ്പെട്ടവരിലേക്കും ദളിത്-പിന്നോക്ക വിഭാഗങ്ങളിലേക്കും എത്തുമ്പോഴാണ് യഥാർത്ഥ സുഭരണം സാധ്യമാകുന്നതെന്ന് യോഗി ആദിത്യനാഥ് പറഞ്ഞു. സർക്കാർ ആനുകൂല്യങ്ങൾ വിതരണം ചെയ്യുന്നത് മാത്രമല്ല, ആഘോഷങ്ങളിലും സന്തോഷങ്ങളിലും സമൂഹത്തിലെ എല്ലാ വിഭാഗം ജനങ്ങളെയും ഒപ്പം ചേർക്കുക എന്നതാണ് നല്ല ഭരണത്തിന്റെ ലക്ഷ്യം. ഉത്തർപ്രദേശിലുടനീളം ദരിദ്രരുടെയും ദുർബല വിഭാഗങ്ങളുടെയും വീടുകളിലേക്ക് ദീപാവലി സന്തോഷം എത്തിക്കാൻ പൊതുസമൂഹത്തോട് അദ്ദേഹം ആഹ്വാനം ചെയ്തു.

നിഷാദ് കോളനിയിലെ സന്ദർശനത്തിന് മുന്നോടിയായി മുഖ്യമന്ത്രി ശ്രീരാമ ജന്മഭൂമി ക്ഷേത്രത്തിലും ഹനുമാൻഗർഹിയിലും എത്തി പ്രത്യേക പൂജകളും ദർശനവും നടത്തി. ലക്ഷക്കണക്കിന് മൺവിളക്കുകൾ തെളിയിച്ചുകൊണ്ടുള്ള ദീപോത്സവത്തിന് പിന്നാലെ നഗരം വൃത്തിയായി സൂക്ഷിച്ചതിന് ശുചീകരണ തൊഴിലാളികളുടെ ആത്മാർത്ഥ സേവനത്തെ അദ്ദേഹം പ്രത്യേകം അഭിനന്ദിച്ചു. ശ്രീരാമ ഭക്തിയുടെയും സൗഹാർദ്ദത്തിന്റെയും സന്ദേശം ഉയർത്തിപ്പിടിച്ചാണ് ചടങ്ങ് സമാപിച്ചത്.

---------------

Hindusthan Samachar / Roshith K