Kochi, 09 നവംബര് (H.S.)

കൊച്ചി: ബെംഗളൂരുവിൽനിന്ന് കേരളത്തിലേക്ക് വൻതോതിൽ മാരക ലഹരിമരുന്നായ എംഡിഎംഎ എത്തിച്ചു നൽകുന്ന അന്തർസംസ്ഥാന ലഹരിക്കടത്തു സംഘത്തിലെ മുഖ്യസൂത്രധാരൻ എറണാകുളം റൂറൽ ജില്ലാ പൊലീസിന്റെ പിടിയിലായി. ആലപ്പുഴ ഹരിപ്പാട് പായിപ്പാട് വയ്യാപുരം വില്ലേജിൽ പറയ്യിൽ വീട്ടിൽ ‘ഡാനി’ എന്നറിയപ്പെടുന്ന ധനേഷ് എസ്. നായർ (31) ആണ് അങ്കമാലിയിൽവെച്ച് പ്രത്യേക അന്വേഷണസംഘത്തിന്റെ വലയിലായത്. ഇയാളിൽനിന്ന് 803 ഗ്രാം ഹാഷിഷ് ഓയിലും എട്ട് ഗ്രാം എംഡിഎംഎയും പൊലീസ് പിടിച്ചെടുത്തു. ആലുവ ഡിവൈ.എസ്.പി. ബൈജു പൗലോസിന്റെ നേതൃത്വത്തിലുള്ള പ്രത്യേക സ്ക്വാഡാണ് പ്രതിയെ തന്ത്രപരമായി പിടികൂടിയത്.

പിടിവീണത് മുൻ കേസിലെ അന്വേഷണത്തിലൂടെ

കഴിഞ്ഞദിവസം ആലുവയിലെ ഒരു ലോഡ്ജ് കേന്ദ്രീകരിച്ചു നടത്തിയ റെയ്ഡിൽ പള്ളുരുത്തി സ്വദേശി ഹരികൃഷ്ണൻ, തോപ്പുംപടി സ്വദേശി ഷിനു സെബാസ്റ്റ്യൻ എന്നിവരെ 185 ഗ്രാമിലധികം എംഡിഎംഎയുമായി പൊലീസ് പിടികൂടിയിരുന്നു. തുടർന്ന് ഇവരെ ചോദ്യം ചെയ്തതിലും ഇവരുടെ മൊബൈൽ ഫോണുകൾ കേന്ദ്രീകരിച്ച് നടത്തിയ ശാസ്ത്രീയ പരിശോധനയിലുമാണ് ലഹരി എത്തിച്ചു നൽകുന്ന ശൃംഖലയുടെ പിന്നിലെ പ്രധാന തലച്ചോറായ ‘ഡാനി’യെക്കുറിച്ചുള്ള വ്യക്തമായ സൂചന ലഭിക്കുന്നത്. ഇതിന്റെ അടിസ്ഥാനത്തിൽ റൂറൽ ജില്ലാ പൊലീസ് മേധാവിയുടെ മേൽനോട്ടത്തിൽ തമിഴ്നാട്, കർണാടക അതിർത്തികൾ കേന്ദ്രീകരിച്ച് അന്വേഷണം വ്യാപിപ്പിക്കുകയായിരുന്നു. തുടർന്ന് പ്രതി കേരളത്തിലേക്ക് എത്തിയെന്ന രഹസ്യവിവരത്തെത്തുടർന്ന് അങ്കമാലിയിൽ വെച്ച് ഇയാളെ വളഞ്ഞുപിടികൂടുകയായിരുന്നു.

കൃഷിയുടെ മറവിൽ വൻ ലഹരിക്കടത്ത്

മൈസൂരുവിനടുത്തുള്ള നഞ്ചൻഗുഡിലാണ് ധനേഷ് സ്ഥിരമായി താമസിച്ചിരുന്നത്. അവിടെ സ്വന്തമായി വാഴത്തോട്ടങ്ങളും വലിയ കൃഷിയിടങ്ങളുമുള്ള ഇയാൾ കൃഷിയുടെ മറവിലാണ് കേരളത്തിലേക്ക് വൻതോതിൽ ലഹരിമരുന്ന് ഒഴുക്കിയിരുന്നതെന്ന് പൊലീസ് കണ്ടെത്തി. കർണാടകയിൽനിന്ന് കേരളത്തിലെ വിവിധ വിപണികളിലേക്ക് അയക്കുന്ന നേന്ത്രപ്പഴക്കുലകൾക്കുള്ളിൽ അതീവ രഹസ്യമായി എംഡിഎംഎ പൊതിഞ്ഞുവെച്ചാണ് ഇയാൾ കടത്തിയിരുന്നത്. വാഹനപരിശോധനകളിൽ വാഴക്കുലകൾ വിശദമായി പരിശോധിക്കപ്പെടില്ലെന്ന പഴുത് മുതലെടുത്തായിരുന്നു ഈ കടത്ത്.

ഇൻസ്റ്റാഗ്രാം വഴിയുള്ള വിപണനം

യുവതീ-യുവാക്കളെ കേന്ദ്രീകരിച്ചാണ് സംഘം പ്രധാനമായും പ്രവർത്തിച്ചിരുന്നത്. സമൂഹമാധ്യമ പ്ലാറ്റ്ഫോമുകളായ ഇൻസ്റ്റാഗ്രാം, ടെലിഗ്രാം തുടങ്ങിയവ വഴിയാണ് ഇയാൾ ഇടപാടുകാരെ കണ്ടെത്തിയിരുന്നതും സംഘത്തിലെ കണ്ണികൾക്ക് നിർദേശങ്ങൾ നൽകിയിരുന്നതും. കേരളത്തിൽ വിതരണം ചെയ്യേണ്ട സ്ഥലങ്ങളെക്കുറിച്ചും പണമിടപാടുകളെക്കുറിച്ചും ഉള്ള ആശയവിനിമയം പൂർണ്ണമായും ഓൺലൈൻ വഴിയായിരുന്നു. നാട്ടിലുള്ള ഏജന്റുമാർ ലഹരിമരുന്ന് ആവശ്യക്കാർക്ക് എത്തിച്ചു നൽകിയ ശേഷം പണം പ്രതിയുടെ അക്കൗണ്ടിലേക്ക് അയച്ചുകൊടുക്കുന്നതായിരുന്നു രീതി.

ആലുവ ഡിവൈ.എസ്.പി. ബൈജു പൗലോസിനു പുറമെ അങ്കമാലി ഇൻസ്പെക്ടർ ആർ. രൂപേഷ്, നെടുമ്പാശേരി ഇൻസ്പെക്ടർ ബി.കെ. അരുൺ, എസ്.ഐ.മാരായ ജോജോ ജോർജ്, അനൂപ്, ലാൻസി ദാസ്, എ.എസ്.ഐ. നൗഷാദ്, സിവിൽ പൊലീസ് ഉദ്യോഗസ്ഥരായ മാഹിൻഷാ അബൂബക്കർ, മനോജ് എന്നിവരടങ്ങിയ സംഘമാണ് ഓപ്പറേഷനിൽ പങ്കെടുത്തത്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു. ലഹരിശൃംഖലയിൽ ഉൾപ്പെട്ട കൂടുതൽ ആളുകളെ കണ്ടെത്താൻ വരും ദിവസങ്ങളിൽ വിശദമായ അന്വേഷണം നടത്തുമെന്ന് പൊലീസ് അറിയിച്ചു.

---------------

Hindusthan Samachar / Roshith K