Enter your Email Address to subscribe to our newsletters
New delhi, 24 ഫെബ്രുവരി (H.S.)
ന്യൂഡല്ഹി: ശബരിമല സ്വര്ണക്കൊള്ളയില് രൂക്ഷ വിമര്ശനവുമായി സുപ്രീം കോടതി. ശബരിമല ക്ഷേത്രത്തില് ഇനി എന്തെങ്കിലും ബാക്കിയുണ്ടോയെന്ന ചോദ്യമാണ് സുപ്രീം കോടതി ഉന്നയിച്ചത്. ശബരിമല സ്വര്ണക്കൊള്ളക്കേസിലെ അറസ്റ്റിനെതിരേ സ്മാര്ട്ട് ക്രിയേഷന്സ് സിഇഒ പങ്കജ് ഭണ്ഡാരി നല്കിയ ഹര്ജി പരിഗണിക്കവെയാണ് സുപ്രീം കോടതിയുടെ ചോദ്യം.
പങ്കജ് ഭണ്ഡാരിയുടെ ഹര്ജി പരിഗണിക്കുന്നത് സുപ്രീം കോടതി മാറ്റിവച്ചു. മാര്ച്ച് ഒമ്പതിലേക്കാണ് ഹര്ജി പരിഗണിക്കുന്നത്. അറസ്റ്റ് ചോദ്യംചെയ്ത് പങ്കജ് ഭണ്ഡാരി നല്കിയ ഹര്ജി പരിഗണിക്കവെയാണ് ജസ്റ്റിസ്മാരായ ദിപാങ്കര് ദത്തയും സതീഷ് ചന്ദ്ര ശര്മ്മയും അടങ്ങിയ ബെഞ്ച് സ്വര്ണക്കൊള്ളയ്ക്കെതിരേ നിര്ണായക പരാമര്ശം നടത്തിയത്. അവിടെ ഇനി എന്തെങ്കിലും ബാക്കിയുണ്ടോ എന്നാണ് ബെഞ്ചിലെ അംഗമായ ജസ്റ്റിസ് സതീഷ് ചന്ദ്ര ശര്മ്മ പങ്കജ് ഭണ്ഡാരിയുടെ അഭിഭാഷകനോട് ആരാഞ്ഞത്.
സ്വര്ണക്കൊള്ളയുമായി പങ്കജ് ഭണ്ഡാരിക്ക് ഒരു ബന്ധവും ഇല്ലെന്ന് അദ്ദേഹത്തിന് വേണ്ടി ഹാജരായ അഭിഭാഷകന് ചൂണ്ടിക്കാട്ടി. നാനോ ടെക് ഗോള്ഡന് ഡെപോസിഷന് (NTGD) യില് വിദഗ്ദ്ധന് ആണ് പങ്കജ് ഭണ്ഡാരിയെന്നും അഭിഭാഷകന് ചൂണ്ടിക്കാട്ടി. ഐഎസ്ആര്ഒയുടെ മംഗള്യാന്, ചാന്ദ്രയാന് പദ്ധതികളുമായി ബന്ധപ്പെട്ട് പ്രവര്ത്തിച്ചിട്ടുള്ള ശാസ്ത്രജ്ഞന് ആണ് പങ്കജ് ഭണ്ഡാരിയെന്നും അദ്ദേഹത്തിന്റെ അഭിഭാഷകന് കോടതിയില് പറഞ്ഞു. കേരള ഹൈക്കോടതിയുടെ മേല്നോട്ടത്തില് തയ്യില് മഹാദേവ ക്ഷേത്രം ഉള്പ്പടെ നിരവധി ക്ഷേത്രങ്ങളില് പ്രവര്ത്തിച്ചിട്ടുണ്ടെന്നും അഭിഭാഷകന് കോടതിയെ അറിയിച്ചു.
അഭിഭാഷകന് ആവശ്യപ്പെട്ടതിനെ തുടര്ന്നാണ് ഹര്ജി പരിഗണിക്കുന്നത് മാര്ച്ച് ഒമ്പതിലേക്ക് സുപ്രീം കോടതി മാറ്റിയത്. വെള്ളിയാഴ്ച കേസ് പരിഗണിക്കണം എന്നായിരുന്നു പങ്കജ് ഭണ്ഡാരിയുടെ അഭിഭാഷകന് ആവശ്യപ്പെട്ടത്. എന്നാല്, ഹോളി അവധിക്ക് ശേഷമേ പരിഗണിക്കാന് കഴിയുകയുള്ളുവെന്ന് സുപ്രീം കോടതി അറിയിക്കുകയായിരുന്നു.
---------------
Hindusthan Samachar / Sreejith S
