Mumbai, 06 ഫെബ്രുവരി (H.S.)

വിദർഭയെ ഇന്ത്യയുടെ സാമ്പത്തിക വളർച്ചയുടെ ഭാവി ചാലകമായി വിശേഷിപ്പിച്ച്‌ ജീത് അദാനി. അഡ്വാന്റേജ് വിദർഭ 2026-ല്‍ വ്യവസായികളെയും നയരൂപകർത്താക്കളെയും അഭിസംബോധന ചെയ്‌തു സംസാരിക്കുകയായിരുന്നു അദാനി ഗ്രൂപ്പ് ഡയറക്‌ടർ ജീത് അദാനി.

ചടങ്ങില്‍ ഊർജ്ജം, വ്യവസായം, തൊഴില്‍, ലോജിസ്‌റ്റിക്‌സ്, സുസ്ഥിര വികസനം എന്നിങ്ങനെ വിവിധ മേഖലകളില്‍ വലിയ നിക്ഷേപങ്ങള്‍ അദ്ദേഹം പ്രഖ്യാപിച്ചു.

ലിംഗ, കല്‍മേശ്വർ എന്നിവിടങ്ങളിലായി 70,000 കോടി രൂപയുടെ ഒരു സംയോജിത വ്യാവസായിക സമുച്ചയവും ഇതില്‍ ഉള്‍പ്പെടുന്നു. വിദർഭയുടെ സാംസ്‌കാരിക പാരമ്പര്യവും ആധുനിക അടിസ്ഥാന സൗകര്യങ്ങളും നേതൃത്വവും ഈ മേഖലയെ വ്യവസായം, നവീകരണം, സുസ്ഥിര പുരോഗതി എന്നിവയുടെ കേന്ദ്രമാക്കാൻ പ്രാപ്‌തമാക്കുന്നുവെന്ന് ജീത് അദാനി കൂട്ടിച്ചേർത്തു.

'അഡ്വാന്റേജ് വിദർഭ 2026-ല്‍ നിങ്ങളോടൊപ്പം ചേരുവാൻ കഴിഞ്ഞതില്‍ ഞാൻ സന്തുഷ്‌ടനാണ്. ഇത് വിദർഭയുടെ മാത്രമല്ല, മഹാരാഷ്ട്രയുടെയും ഇന്ത്യയുടെയും ഭാവി രൂപപ്പെടുത്തുന്ന ദീർഘദർശികളായ മനസുകളെ ഒരുമിച്ചുകൊണ്ടുവരുന്ന ഒരു വേദിയാണ്' എന്നായിരുന്നു പ്രസംഗത്തിന് തുടക്കം കുറിച്ചുകൊണ്ട് അദാനി പറഞ്ഞത്.

ഭാവിയിലേക്ക് കടക്കും മുമ്പ്, വിദർഭ എന്തിനെയാണ് എപ്പോഴും പ്രതിനിധീകരിച്ചിരുന്നത് എന്ന് ഓർക്കുന്നത് പ്രധാനമാണ്. 'വിദർഭ' എന്ന പേര് സംസ്‌കൃതത്തില്‍ നിന്ന് ഉത്ഭവിച്ചതാണ്. 'വി' എന്നാല്‍ അതുല്യം എന്നും, 'ദർഭ' എന്നാല്‍ പ്രതിരോധശേഷിയുള്ള പുണ്യപുല്ല് എന്നും അർത്ഥമാക്കുന്നു. ഇത് വിശുദ്ധി, ശുദ്ധീകരണം, പവിത്രമായ ശക്തി എന്നിവയെ സൂചിപ്പിക്കുന്നു' വിദർഭയുടെ പൈതൃകം സ്‌മരിച്ചുകൊണ്ട് അദ്ദേഹം പറഞ്ഞു.

ഈ പ്രദേശം അസാധാരണമായ കരകൗശലവിദ്യയുടെയും സാംസ്‌കാരിക സമ്പന്നതയുടെയും വിജ്ഞാനത്തിന്റെയും ധൈര്യത്തിന്റെയും നാടാണെന്നും പുരാതന രാജ്യങ്ങളുമായും ആത്മീയ പാരമ്പര്യങ്ങളുമായുള്ള ബന്ധങ്ങളും അദ്ദേഹം എടുത്തുപറഞ്ഞു. നാഗ്‌പൂർ, ചരിത്രപരമായ ഭരണ കേന്ദ്രത്തില്‍ നിന്ന് വ്യവസായം, നവീകരണം, കണക്റ്റിവിറ്റി എന്നിവയുടെ വളർന്നുവരുന്ന ഹബ്ബായി മാറിയെന്നും അദാനി ചൂണ്ടിക്കാട്ടി.

'ശക്തിയുടെയും അതുല്യതയുടെയും നാടായ വിദർഭ, തങ്ങളുടെ സമ്പന്നമായ പൈതൃകത്തെ പുതുക്കിയ സാമ്പത്തിക, സാംസ്‌കാരിക ശക്തിയായി മാറ്റാൻ തയ്യാറാണെന്ന് ഞാൻ ഉറച്ചുവിശ്വസിക്കുന്നു' അദ്ദേഹം കൂട്ടിച്ചേർത്തു. വിദർഭയുടെ വികസനം ത്വരിതപ്പെടുത്തിയതിന് ദേശീയ, സംസ്ഥാന നേതൃത്വങ്ങളെ ജീത് അദാനി അഭിനന്ദിച്ചു. പ്രധാനമന്ത്രി മോദിയുടെ അടിസ്ഥാന സൗകര്യങ്ങള്‍, ലോജിസ്‌റ്റിക്‌സ്, ശുദ്ധമായ ഊർജ്ജം എന്നിവയിലുള്ള ശ്രദ്ധ നിക്ഷേപ സൗഹൃദപരമായ സാഹചര്യം ഒരുക്കിയെന്ന് അദ്ദേഹം പ്രശംസിച്ചു.

കണക്റ്റിവിറ്റിയില്‍ മാറ്റങ്ങള്‍ കൊണ്ടുവന്നതിന് കേന്ദ്രമന്ത്രി നിതിൻ ഗഡ്‌കരിയെ ജീത് അദാനി അഭിനന്ദിച്ചു; അടിസ്ഥാന സൗകര്യം രാഷ്ട്ര നിർമ്മാണമാണ് എന്നും അദ്ദേഹം പറഞ്ഞു. ദേവേന്ദ്ര ഫഡ്‌നാവിസ് സന്തുലിതമായ പ്രാദേശിക വികസനത്തിനായി ഉറച്ച വക്താവായി പ്രവർത്തിച്ചിട്ടുണ്ട് എന്നും, വിദർഭയെ സാധ്യതകളാല്‍ മാത്രമല്ല, പുരോഗതിയാല്‍ നിർവചിക്കാൻ ഈ ശ്രമങ്ങള്‍ സഹായിച്ചുവെന്നും അദ്ദേഹം ചൂണ്ടിക്കാട്ടി.

'വിദർഭയിലെ ഞങ്ങളുടെ സാന്നിധ്യം കേവലം ഒരു ഇടപാടല്ല; ഇത് തലമുറകളായിട്ടുള്ളതാണ്. ഊർജ്ജ സുരക്ഷ കെട്ടിപ്പടുക്കാനും, ഉയർന്ന നിലവാരമുള്ള തൊഴിലവസരങ്ങള്‍ സൃഷ്‌ടിക്കാനും, സമൂഹങ്ങളെ ഉയർത്താനും, ഇന്ത്യയുടെ സാമ്പത്തിക അടിത്തറ ശക്തിപ്പെടുത്താനുമാണ് ഞങ്ങള്‍ ഇവിടെയുള്ളത്' അദാനി ഗ്രൂപ്പിന്റെ ദീർഘകാല പ്രതിബദ്ധത ആവർത്തിച്ചുകൊണ്ട് അദ്ദേഹം പറഞ്ഞു.

ഇന്ത്യയുടെ ശുദ്ധവും വിശ്വസനീയവുമായ ഊർജ്ജ ഭാവിയെ ശക്തിപ്പെടുത്തുക, സംയോജിത വ്യാവസായിക-ലോജിസ്‌റ്റിക്‌സ് ആവാസവ്യവസ്ഥകള്‍ വികസിപ്പിക്കുക, സമൂഹങ്ങള്‍ക്കും യുവജനങ്ങള്‍ക്കും ഉള്‍ക്കൊള്ളുന്ന വളർച്ച സാധ്യമാക്കുക എന്നീ മൂന്ന് മുൻഗണനകളിലാണ് ഗ്രൂപ്പിന്റെ നിക്ഷേപങ്ങള്‍ ശ്രദ്ധ കേന്ദ്രീകരിക്കുന്നതെന്ന് അദ്ദേഹം വിശദീകരിച്ചു.

ടിരോഡയിലെ 3,300 മെഗാവാട്ട് സൂപ്പർക്രിട്ടിക്കല്‍ താപവൈദ്യുത നിലയം, 2025-ല്‍ പുനരുജ്ജീവിപ്പിച്ച 600 മെഗാവാട്ട് ബൂട്ടിബോറി പ്ലാന്റ്, സംസ്ഥാനത്തിന് 6,600 മെഗാവാട്ട് വൈദ്യുതി ഉറപ്പാക്കുന്ന 25 വർഷത്തെ വിതരണ കരാർ എന്നിവ ജീത് അദാനി ചൂണ്ടിക്കാട്ടി.

'ലിംഗ, കല്‍മേശ്വർ എന്നിവിടങ്ങളിലായി 70,000 കോടി രൂപയുടെ സംയോജിത കല്‍ക്കരി ഗ്യാസിഫിക്കേഷൻ, ഡൗണ്‍സ്ട്രീം ഡെറിവേറ്റീവ്സ് കോംപ്ലക്‌സ് ആണ് ഞങ്ങളുടെ ഏറ്റവും വലിയ പ്രതിബദ്ധതകളിലൊന്ന്. ഈ മെഗാ പദ്ധതി 30,000 നേരിട്ടുള്ള തൊഴിലവസരങ്ങള്‍ സൃഷ്‌ടിക്കുമെന്ന് പരിവർത്തനപരമായ സംരംഭം എന്ന് വിശേഷിപ്പിച്ചുകൊണ്ട് ജീത് അദാനി പ്രഖ്യാപിച്ചു:

നൂതന രാസവസ്‌തു നിർമ്മാണ ശേഷികള്‍ വികസിപ്പിക്കുകയും, നിർണായക വ്യവസായങ്ങള്‍ക്ക് ഊർജ്ജ സ്വയംപര്യാപ്‌ത വർധിപ്പിക്കുകയും, നാഗ്‌പൂരിനെ ശുദ്ധമായ ഊർജ്ജ സാങ്കേതികവിദ്യകളുടെ ആഗോള ഭൂപടത്തില്‍ ഉറപ്പിച്ചു നിർത്തുകയും ചെയ്യുമെന്നും അദ്ദേഹം കൂട്ടിച്ചേർത്തു. ഗോണ്ട്ഖൈരിയിലെ ഭൂഗർഭ ഖനി ഉത്തരവാദിത്തമുള്ള ഖനനത്തിന് മാതൃകയാണെന്ന് അദ്ദേഹം പറഞ്ഞു.

ബോർഖേഡിയില്‍ 75 ഏക്കർ ഇൻലാൻഡ് കണ്ടെയ്‌നർ ഡിപ്പോ, 24 അതിർത്തി ചെക്ക് പോസ്‌റ്റുകളുടെ ഏറ്റെടുക്കല്‍ എന്നിവയിലൂടെ അദാനി ഗ്രൂപ്പ് വിദർഭയുടെ ലോജിസ്‌റ്റിക്‌സ് ശേഷി വർധിപ്പിച്ചു. ഇത് ചരക്ക് ചെലവ് കുറയ്ക്കാനും കയറ്റുമതി വർധിപ്പിക്കാനും ലക്ഷ്യമിടുന്നു.

ഇൻഡാമർ ടെക്‌നിക്‌സ് പ്രൈവറ്റ് ലിമിറ്റഡിനെ ഏറ്റെടുത്തത് മിഹാനില്‍ 30 ഏക്കർ എംആർഒ (മെയിന്റനൻസ്, റിപ്പയർ, ഓവർഹോള്‍) സമുച്ചയം വികസിപ്പിച്ചു. ഇത് നാഗ്‌പൂരിനെ വിമാനങ്ങളുടെ അറ്റകുറ്റപ്പണികള്‍ക്കുള്ള ഒരു അന്താരാഷ്ട്ര ഹബ്ബായി ഉയർത്തുന്നു. ആരോഗ്യം, വിദ്യാഭ്യാസം, 43 സ്വയംസഹായ സംഘങ്ങളിലൂടെയുള്ള സ്ത്രീ ശാക്തീകരണം, പോഷകാഹാരം, സൗരോർജ്ജ വിളക്കുകള്‍, ജലലഭ്യത, കായികം, സ്‌കൂള്‍ വികസനം എന്നിവയുള്‍പ്പെടെയുള്ള സാമൂഹിക പദ്ധതികളില്‍ അദാനി ഫൗണ്ടേഷന്റെ പങ്കും അദ്ദേഹം എടുത്തുപറഞ്ഞു.

'സുസ്ഥിരത ഞങ്ങളുടെ അജണ്ടയുടെ ഹൃദയമാണ്' അദാനി പറഞ്ഞു. ടിരോഡയിലെ സീറോ വാട്ടർ ഡിസ്‌ചാർജ് രീതി, ഫ്ലൈ ആഷ് പുനരുപയോഗം, 2030 ഓടെ 100 ദശലക്ഷം മരങ്ങള്‍ നടാനുള്ള പ്രതിജ്ഞ എന്നിങ്ങനെയുള്ള സുസ്ഥിരതാ ശ്രമങ്ങള്‍ അദ്ദേഹം ചൂണ്ടിക്കാട്ടി. അദാനി എനർജി സൊല്യൂഷൻസ് 2027 ഓടെ 60 ശതമാനം പുനരുപയോഗ ഊർജ്ജ സ്രോതസ്സ് കൈവരിക്കാനുള്ള പാതയിലാണെന്നും, പുരോഗതിയും സുസ്ഥിരതയും ഒന്നിച്ചുയരുമെന്നും ഉയരണമെന്നും ഇത് തെളിയിക്കുന്നുവെന്നും അദ്ദേഹം കൂട്ടിച്ചേർത്തു.

'ഞാൻ മുന്നോട്ട് നോക്കുമ്പോള്‍, വിദർഭയെ മഹാരാഷ്ട്രയുടെ ഒരു പ്രദേശം മാത്രമല്ല, വരും ദശകങ്ങളില്‍ ഇന്ത്യയുടെ വളർച്ചാ കഥ നിർവചിക്കാൻ സഹായിക്കുന്ന ഒരു പ്രദേശമായിട്ടാണ് ഞാൻ കാണുന്നത്' എന്നും ജീത് അദാനി ഭാവിയെ മുന്നില്‍ കണ്ടുകൊണ്ട് പറഞ്ഞു. ഒരുമിച്ച്‌, അവസരങ്ങളുടെയും, പ്രതിരോധശേഷിയുടെയും, അഭിവൃദ്ധിയുടെയും ഒരു യുഗം നമ്മള്‍ കെട്ടിപ്പടുക്കും - അത് രാജ്യത്തെ മുഴുവൻ പ്രചോദിപ്പിക്കും. ഇത് ഞങ്ങളുടെ വാഗ്‌ദാനമാണ്, ഇത് ഞങ്ങളുടെ ലക്ഷ്യമാണ്. നമ്മള്‍ ഒരുമിച്ച്‌ കെട്ടിപ്പടുക്കുന്ന വിദർഭയാണിത്' അദ്ദേഹം തന്റെ വാക്കുകള്‍ അവസാനിപ്പിച്ചു.

---------------

Hindusthan Samachar / CHANDHU CHANDRASEKHAR