Kozhikode, 12 മാര്ച്ച് (H.S.)

കോഴിക്കോട്: ജില്ലയിൽ അനുഭവപ്പെടുന്ന പാചകവാതക (LPG) ക്ഷാമം നഗരത്തിലെ പ്രധാന പൊതുശ്മശാനമായ മാവൂർ റോഡ് സ്മൃതിപഥത്തിന്റെ പ്രവർത്തനത്തെയും ഗുരുതരമായി ബാധിക്കുന്നു. വാതക ചൂളകളിൽ മൃതദേഹങ്ങൾ സംസ്കരിക്കാൻ ആവശ്യമായ ഗ്യാസ് ലഭ്യമല്ലാത്തതാണ് പ്രതിസന്ധിക്ക് കാരണം. ഇതോടെ, സംസ്കാരത്തിനായി സ്മൃതിപഥത്തിലെത്തുന്നവരെ മറ്റ് ശ്മശാനങ്ങളിലേക്ക് തിരിച്ചുവിടേണ്ട ഗതികേടിലാണ് അധികൃതർ.

സാങ്കേതിക തകരാറുകൾ പ്രതിസന്ധി വർധിപ്പിക്കുന്നു

വാതക ക്ഷാമത്തിന് പുറമെ ശ്മശാനത്തിലെ മറ്റ് സംവിധാനങ്ങൾ തകരാറിലായതും സ്ഥിതി വഷളാക്കി. സ്മൃതിപഥത്തിലെ ഇലക്ട്രിക് ചൂള കഴിഞ്ഞ രണ്ട് മാസത്തിലേറെയായി കേടായി കിടക്കുകയാണ്. കൂടാതെ, ഇവിടെയുള്ള രണ്ട് പരമ്പരാഗത വിറക് ചൂളകളിൽ ഒന്നും പ്രവർത്തനരഹിതമാണ്. നാല് വാതക ചൂളകളാണ് നിലവിൽ ഇവിടെയുള്ളത്. ഭൂരിഭാഗം സംസ്കാരങ്ങളും വാതക ചൂളകളിലായിരുന്നു നടന്നിരുന്നത്. എന്നാൽ എൽപിജി ലഭ്യത കുറഞ്ഞതോടെ ഈ സംവിധാനവും അവതാളത്തിലായി.

ഒരു സംസ്കാരത്തിന് 25 കിലോ ഗ്യാസ്

ഒരു മൃതദേഹം പൂർണ്ണമായി സംസ്കരിക്കാൻ കുറഞ്ഞത് 25 കിലോ ഗ്യാസ് എങ്കിലും ആവശ്യമാണ്. അതായത് ഏകദേശം ഒന്നര സിലിണ്ടറോളം വരും ഇത്. ഒരേ സമയം 12 സിലിണ്ടറുകൾ ബന്ധിപ്പിച്ചാണ് ഇവിടെ ഗ്യാസ് ചേംബറുകൾ പ്രവർത്തിക്കുന്നത്. കഴിഞ്ഞ ദിവസം വെറും മൂന്ന് സിലിണ്ടറുകൾ മാത്രമാണ് ശ്മശാനത്തിലേക്ക് ലഭിച്ചത്. ഇത് ഉപയോഗിച്ച് ഒരു സംസ്കാരം നടത്താൻ മാത്രമേ സാധിക്കൂ. നിലവിൽ ലഭ്യത കുറഞ്ഞ സാഹചര്യത്തിൽ, വിവരങ്ങൾ അന്വേഷിച്ചു വിളിക്കുന്നവരോട് വെസ്റ്റ്ഹിൽ, മാങ്കാവ്, പുതിയപാലം, മാനാരി തുടങ്ങിയ ശ്മശാനങ്ങളെ സമീപിക്കാൻ അധികൃതർ നിർദ്ദേശിക്കുന്നു.

പരിഹാര നടപടികൾ

ശ്മശാനങ്ങളെ അത്യാവശ്യ സേവന വിഭാഗത്തിൽ ഉൾപ്പെടുത്തി പ്രത്യേകമായി ഗ്യാസ് അനുവദിക്കാനുള്ള ശ്രമങ്ങൾ കോർപറേഷൻ അധികൃതർ തുടങ്ങിയിട്ടുണ്ട്. ഗ്യാസ് ഏജൻസികളുമായി സംസാരിച്ച് ഉടൻ പ്രതിസന്ധി പരിഹരിക്കാനാകുമെന്നാണ് പ്രതീക്ഷ. മാസങ്ങളായി മുടങ്ങിക്കിടന്ന ഇലക്ട്രിക് ശ്മശാനത്തിന്റെ അറ്റകുറ്റപ്പണികളും നിലവിൽ ആരംഭിച്ചിട്ടുണ്ട്. ഏതാനും ദിവസങ്ങൾക്കുള്ളിൽ ഇലക്ട്രിക് ചൂള പ്രവർത്തനസജ്ജമാകുമെന്നും അതോടെ ഗ്യാസ് ചൂളകളെ മാത്രം ആശ്രയിക്കുന്നത് കുറയ്ക്കാൻ സാധിക്കുമെന്നും അധികൃതർ അറിയിച്ചു.

കോഴിക്കോട് നഗരത്തിലെ ഏറ്റവും തിരക്കേറിയ ശ്മശാനമായ സ്മൃതിപഥത്തിലെ ഈ അവസ്ഥ സാധാരണക്കാരെ വലിയ ബുദ്ധിമുട്ടിലാക്കിയിരിക്കുകയാണ്. ദൂരസ്ഥലങ്ങളിൽ നിന്ന് സംസ്കാരത്തിനായി ഇവിടെയെത്തുന്നവർക്ക് ശ്മശാനത്തിൽ നിന്ന് മടങ്ങേണ്ടി വരുന്നത് വലിയ പ്രതിഷേധത്തിന് ഇടയാക്കുന്നുണ്ട്. ജില്ലാ ഭരണകൂടം ഉടൻ ഇടപെട്ട് പാചകവാതക ലഭ്യത ഉറപ്പാക്കണമെന്നാണ് പൊതുജനങ്ങളുടെ ആവശ്യം.

---------------

Hindusthan Samachar / Roshith K