Trivandrum, 13 മാര്ച്ച് (H.S.)

തിരുവനന്തപുരം: വരാനിരിക്കുന്ന നിയമസഭാ തിരഞ്ഞെടുപ്പിൽ വാമനപുരം മണ്ഡലത്തിൽ കോൺഗ്രസ് നേതാവ് പാലോട് രവിയെ സ്ഥാനാർത്ഥിയാക്കുന്നതിനെതിരെ പ്രതിഷേധം ശക്തമാകുന്നു. 'സേവ് കോൺഗ്രസ് വാമനപുരം' എന്ന പേരിൽ മണ്ഡലത്തിന്റെ വിവിധ ഭാഗങ്ങളിൽ പാലോട് രവിക്കെതിരെ പോസ്റ്ററുകൾ പ്രത്യക്ഷപ്പെട്ടു. മുതിർന്ന നേതാക്കളെ മാറ്റിനിർത്തി യുവത്വത്തിന് പ്രാധാന്യം നൽകണമെന്നാണ് പോസ്റ്ററുകളിലെ പ്രധാന ആവശ്യം.

'ജനഗണ മംഗള രവി' - പരിഹാസവുമായി പോസ്റ്ററുകൾ

നേരത്തെ ഒരു പൊതുപരിപാടിക്കിടെ ദേശീയഗാനം തെറ്റായി പാടിയതിനെ പരിഹസിച്ചുകൊണ്ട് 'ജനഗണ മംഗള രവി ഞങ്ങളുടെ പിടലിക്ക് വേണ്ട' എന്നാണ് പോസ്റ്ററുകളിലെ വാചകം. രണ്ട് വർഷം മുൻപ് പുത്തരിക്കണ്ടം മൈതാനത്ത് നടന്ന 'സമരാഗ്നി' പരിപാടിക്കിടെയായിരുന്നു പാലോട് രവി ദേശീയഗാനം വികലമായി പാടിയത്. അന്ന് സോഷ്യൽ മീഡിയയിലടക്കം ഇത് വലിയ ചർച്ചയായിരുന്നു. ഈ സംഭവം ഓർമ്മിപ്പിച്ചുകൊണ്ടാണ് മണ്ഡലത്തിലെ ഒരു വിഭാഗം പ്രവർത്തകർ ഇപ്പോൾ രംഗത്തെത്തിയിരിക്കുന്നത്.

യുവത്വത്തിന് അവസരം നൽകണം

'കടൽ കിളവൻമാർ മാറിനിൽക്കണമെന്നും' 'നേതൃത്വം വാമനപുരത്തിലെ കോൺഗ്രസിന്റെ ആരാച്ചാരാവരുതെന്നും' പോസ്റ്ററുകളിൽ കുറിച്ചിട്ടുണ്ട്. ഇത്തവണ വാമനപുരത്ത് കോൺഗ്രസിന് ഒരു എം.എൽ.എ വേണമെന്ന് ആഗ്രഹമുണ്ടെങ്കിൽ മികച്ച സ്ഥാനാർത്ഥിയെ നിർത്തണം. യുവത്വം നയിച്ചാൽ വിജയം ഉറപ്പാണെന്നും പണത്തിനും ഭീഷണിക്കും മുന്നിൽ പാർട്ടി നേതൃത്വം മുട്ടുമടക്കരുതെന്നും പോസ്റ്ററുകൾ ആഹ്വാനം ചെയ്യുന്നു. മുൻപ് നെടുമങ്ങാട് മണ്ഡലത്തിൽ നിന്നും മത്സരിച്ചു ജയിച്ചിട്ടുള്ള പാലോട് രവി ഇക്കുറി വാമനപുരം ലക്ഷ്യമിട്ടാണ് പ്രവർത്തിക്കുന്നത്. കെ.പി.സി.സി രാഷ്ട്രീയ കാര്യസമിതി അംഗമായ അദ്ദേഹത്തിന് വി.ഡി. സതീശൻ അടക്കമുള്ള പ്രമുഖ നേതാക്കളുടെ പിന്തുണയുണ്ടെന്നാണ് സൂചന.

മറ്റ് സ്ഥാനാർത്ഥി മോഹികൾ

പാലോട് രവിക്കെതിരെ പ്രതിഷേധം ഉയരുമ്പോൾ തന്നെ മണ്ഡലത്തിൽ മറ്റ് ചില പേരുകളും സജീവമായി ചർച്ചയിലുണ്ട്. ഡി.സി.സി വൈസ് പ്രസിഡന്റ് സുധീർഷാ പാലോടിനെ ഒരു വിഭാഗം പ്രവർത്തകർ പിന്തുണയ്ക്കുന്നു. ഇടതുകോട്ടയായിരുന്ന വാമനപുരം ബ്ലോക്കിൽ നിന്നും ജില്ലാ പഞ്ചായത്തിലേക്ക് 7,000 വോട്ടുകളുടെ ഭൂരിപക്ഷത്തിൽ ജയിച്ച സുധീർഷായുടെ കരുത്ത് നേതൃത്വം പരിഗണിക്കണമെന്നാണ് ഇവരുടെ ആവശ്യം. പ്രാദേശികമായ സ്വീകാര്യതയും യുവത്വവും അദ്ദേഹത്തിന് അനുകൂല ഘടകങ്ങളായി ചൂണ്ടിക്കാണിക്കപ്പെടുന്നു.

സ്ഥാനാർത്ഥി നിർണ്ണയം വെല്ലുവിളിയാകുന്നു

സ്ഥാനാർത്ഥി പ്രഖ്യാപനത്തിന് മുൻപേ തന്നെ ഗ്രൂപ്പ് പോരും പോസ്റ്റർ യുദ്ധവും തുടങ്ങിയത് കോൺഗ്രസ് നേതൃത്വത്തിന് തലവേദനയായിരിക്കുകയാണ്. വാമനപുരം തിരിച്ചുപിടിക്കാൻ ആഞ്ഞുപിടിക്കുന്ന കോൺഗ്രസിന് ഉള്ളിലെ ഈ ഭിന്നത തിരിച്ചടിയാകുമോ എന്ന ആശങ്കയും ഉയരുന്നുണ്ട്. പ്രവർത്തകരുടെ വികാരം കണക്കിലെടുത്ത് ഹൈക്കമാൻഡ് എന്ത് തീരുമാനമെടുക്കും എന്നതിനെ ആശ്രയിച്ചിരിക്കും മണ്ഡലത്തിലെ കോൺഗ്രസിന്റെ ഭാവി.

തിരുവനന്തപുരം ജില്ലയിലെ നിർണ്ണായക മണ്ഡലങ്ങളിലൊന്നായ വാമനപുരത്ത് വരും ദിവസങ്ങളിലും രാഷ്ട്രീയ പോര് മുറുകാനാണ് സാധ്യത. പോസ്റ്ററുകൾ പ്രത്യക്ഷപ്പെട്ടതോടെ മണ്ഡലത്തിലെ കോൺഗ്രസ് പ്രവർത്തകർക്കിടയിലെ ചേരിതിരിവ് മറനീക്കി പുറത്തുവന്നിരിക്കുകയാണ്.

---------------

Hindusthan Samachar / Roshith K