Colombo , 20 മാര്ച്ച് (H.S.)

കൊളംബോ: പശ്ചിമേഷ്യയിൽ യുദ്ധസമാനമായ സാഹചര്യം നിലനിൽക്കുന്നതിനിടെ, തങ്ങളുടെ മണ്ണിൽ യുദ്ധവിമാനങ്ങൾ ഇറക്കാനുള്ള അമേരിക്കയുടെ അഭ്യർത്ഥന ശ്രീലങ്ക തള്ളി. മട്ടാല അന്താരാഷ്ട്ര വിമാനത്താവളത്തിൽ രണ്ട് യുദ്ധവിമാനങ്ങൾ ഇറക്കാൻ അനുമതി തേടിയ യു.എസ് നീക്കത്തിനാണ് ശ്രീലങ്കൻ സർക്കാർ തടയിട്ടത്. രാജ്യത്തിന്റെ ചേരിചേരാ നയത്തിലും നിഷ്പക്ഷതയിലും വിട്ടുവീഴ്ച ചെയ്യില്ലെന്ന് ശ്രീലങ്കൻ പ്രസിഡന്റ് അനുര കുമാര ദിസനായകെ പാർലമെന്റിൽ വ്യക്തമാക്കി.

അനുമതി നിഷേധിച്ചത് രണ്ട് തവണ

ജിബൂട്ടിയിലെ യു.എസ് സൈനിക താവളത്തിൽ നിന്നുള്ള വിമാനങ്ങളാണ് മാർച്ചിൽ ശ്രീലങ്കയിൽ ഇറങ്ങാൻ അനുമതി തേടിയത്. മാർച്ച് നാലിനും പിന്നീട് ആറിനും നൽകിയ അപേക്ഷകൾ ശ്രീലങ്കൻ അധികൃതർ നിരസിക്കുകയായിരുന്നു. എട്ട് ആന്റി-ഷിപ്പ് മിസൈലുകൾ വീതം വഹിക്കുന്ന രണ്ട് യുദ്ധവിമാനങ്ങളാണ് ഇറങ്ങാൻ അനുമതി ചോദിച്ചതെന്നും ഇതിന് വ്യക്തമായ ഭാഷയിൽ 'ഇല്ല' എന്ന് മറുപടി നൽകിയതായും ദിസനായകെ പറഞ്ഞു. ആഗോള രാഷ്ട്രീയ സമ്മർദ്ദങ്ങൾ ശക്തമാണെങ്കിലും രാജ്യത്തിന്റെ സ്വതന്ത്ര വിദേശനയത്തിൽ ഉറച്ചുനിൽക്കുമെന്നും അദ്ദേഹം കൂട്ടിച്ചേർത്തു.

മേഖലയിലെ സംഘർഷാവസ്ഥ

പശ്ചിമേഷ്യയിലെ യുദ്ധത്തെത്തുടർന്ന് ഇന്ത്യൻ മഹാസമുദ്ര മേഖലയിലും സംഘർഷാവസ്ഥ നിലനിൽക്കുന്നുണ്ട്. മാർച്ച് നാലിന് ഗാൾ തീരത്ത് വെച്ച് ഇറാന്റെ ഐറിസ് ദേന (Iris Dena) എന്ന യുദ്ധക്കപ്പൽ അമേരിക്ക തകർത്തിരുന്നു. ഇതിൽ 84 നാവികർ കൊല്ലപ്പെടുകയും 32 പേരെ രക്ഷപ്പെടുത്തുകയും ചെയ്തു. ഇതിന് പിന്നാലെ 219 നാവികരുമായി എത്തിയ മറ്റൊരു ഇറാനിയൻ കപ്പലിനും കൊളംബോ തുറമുഖത്ത് പ്രവേശിക്കാൻ അനുമതി നൽകിയില്ല. പകരം ഈ കപ്പലിനെ ട്രിങ്കോമാലിയിലേക്ക് തിരിച്ചുവിട്ടു. നിലവിൽ ഇവിടുത്തെ നാവിക കേന്ദ്രത്തിൽ ഇവർക്ക് അഭയം നൽകിയിരിക്കുകയാണ്.

അടിയന്തര നടപടികളുമായി ശ്രീലങ്ക

യുദ്ധം കടുക്കുന്ന സാഹചര്യത്തിൽ രാജ്യത്ത് ഉണ്ടായേക്കാവുന്ന ഇന്ധനക്ഷാമം നേരിടാൻ ശ്രീലങ്കൻ സർക്കാർ മുൻകരുതൽ നടപടികൾ ആരംഭിച്ചു കഴിഞ്ഞു. ഇതിന്റെ ഭാഗമായി രാജ്യത്ത് ആഴ്ചയിൽ നാല് പ്രവൃത്തി ദിനങ്ങൾ മാത്രമാക്കി ചുരുക്കി. എല്ലാ ബുധനാഴ്ചയും പൊതു അവധിയായി പ്രഖ്യാപിച്ചു. മാർച്ച് 18 മുതൽ ഈ തീരുമാനം നിലവിൽ വന്നു. ആരോഗ്യം, കസ്റ്റംസ്, തുറമുഖം തുടങ്ങിയ അവശ്യ മേഖലകളെ ഇതിൽ നിന്നും ഒഴിവാക്കിയിട്ടുണ്ട്. വിദ്യാഭ്യാസ സ്ഥാപനങ്ങൾക്കും കോടതികൾക്കും ഇത് ബാധകമാണ്. സ്വകാര്യ മേഖലയും ഇതേ മാതൃക പിന്തുടരുമെന്നാണ് സർക്കാർ പ്രതീക്ഷിക്കുന്നത്.

ദക്ഷിണ-മധ്യേഷ്യയ്ക്കായുള്ള യു.എസ് പ്രത്യേക പ്രതിനിധി സെർജിയോ ഗോറുമായി ദിസനായകെ കഴിഞ്ഞ ദിവസം കൂടിക്കാഴ്ച നടത്തിയിരുന്നു. സമുദ്ര സുരക്ഷയും വ്യാപാര സഹകരണവും ചർച്ചയായെങ്കിലും, സൈനിക ആവശ്യങ്ങൾക്കായി തങ്ങളുടെ മണ്ണ് വിട്ടുകൊടുക്കില്ലെന്ന കർശന നിലപാടാണ് ശ്രീലങ്ക സ്വീകരിച്ചിരിക്കുന്നത്. ചൈനയും അമേരിക്കയും തമ്മിലുള്ള ശീതയുദ്ധത്തിന് വേദിയാകാതെ സ്വന്തം നിഷ്പക്ഷത കാത്തുസൂക്ഷിക്കാനുള്ള ശ്രീലങ്കയുടെ ഈ നീക്കം അന്താരാഷ്ട്ര തലത്തിൽ ശ്രദ്ധേയമാകുകയാണ്.

---------------

Hindusthan Samachar / Roshith K