Patna , 21 മാര്ച്ച് (H.S.)

പട്ന: ബീഹാർ രാഷ്ട്രീയത്തിൽ പുതിയൊരു അധികാര കൈമാറ്റത്തിന് വഴിതെളിയുന്നു എന്ന സൂചനകൾ ശക്തമാക്കി മുഖ്യമന്ത്രി നിതീഷ് കുമാറിന്റെ മകൻ നിശാന്ത് കുമാർ ജെഡിയു (ജനതാദൾ യുണൈറ്റഡ്) മുതിർന്ന നേതാക്കളുമായി കൂടിക്കാഴ്ച നടത്തി. ലാലൻ സിംഗ്, അരുൺ കുമാർ, ഋതുരാജ് കുമാർ തുടങ്ങിയ പ്രമുഖ നേതാക്കളുമായാണ് നിശാന്ത് ചർച്ച നടത്തിയത്. ഇതോടെ നിശാന്ത് കുമാർ സജീവ രാഷ്ട്രീയത്തിലേക്ക് ഇറങ്ങുകയാണെന്ന വാർത്തകൾക്ക് ഔദ്യോഗിക സ്ഥിരീകരണം ലഭിച്ചിരിക്കുകയാണ്.

ജെഡിയുവിൽ നിതീഷ് കുമാറിന് ശേഷം ആര് എന്ന ചോദ്യത്തിന് ഉത്തരം തേടുന്ന പാർട്ടി പ്രവർത്തകർക്കും രാഷ്ട്രീയ നിരീക്ഷകർക്കും വലിയ ആവേശം നൽകുന്നതാണ് ഈ കൂടിക്കാഴ്ച. പാർട്ടിയിലെ കരുത്തനായ നേതാവ് ലാലൻ സിംഗുമായുള്ള കൂടിക്കാഴ്ചയിൽ രാഷ്ട്രീയപരമായ കാര്യങ്ങളാണ് ചർച്ചയായതെന്ന് അടുത്ത വൃത്തങ്ങൾ സൂചിപ്പിക്കുന്നു. ഇതുവരെ പൊതുവേദികളിൽ നിന്നും രാഷ്ട്രീയ ചർച്ചകളിൽ നിന്നും അകന്നു നിന്നിരുന്ന നിശാന്ത് കുമാർ, പെട്ടെന്ന് ഇത്തരമൊരു നീക്കം നടത്തിയത് വരാനിരിക്കുന്ന നിയമസഭാ തിരഞ്ഞെടുപ്പിൽ നിർണ്ണായക മാറ്റങ്ങൾക്ക് കാരണമായേക്കാം.

പാർട്ടിക്കുള്ളിൽ നിശാന്തിന്റെ വരവിനെ വലിയൊരു വിഭാഗം നേതാക്കൾ സ്വാഗതം ചെയ്തിട്ടുണ്ട്. നിതീഷ് കുമാറിന്റെ വിശ്വസ്തരായ നേതാക്കളുമായി നടത്തിയ ഈ കൂടിക്കാഴ്ചകൾ പാർട്ടിയുടെ ഭാവി നേതൃത്വത്തിലേക്ക് നിശാന്തിനെ ഉയർത്തിക്കൊണ്ടുവരാനുള്ള ആസൂത്രിത നീക്കത്തിന്റെ ഭാഗമാണെന്നാണ് കരുതപ്പെടുന്നത്. കുടുംബ രാഷ്ട്രീയത്തോട് എന്നും അകലം പാലിച്ചിരുന്ന നിതീഷ് കുമാർ, തന്റെ മകനെ രാഷ്ട്രീയത്തിലേക്ക് കൊണ്ടുവരുന്നത് പാർട്ടിയുടെ ഭദ്രത ഉറപ്പാക്കാനാണെന്ന് ഒരു വിഭാഗം വിലയിരുത്തുന്നു.

ആർജെഡിയും ബിജെപിയും ശക്തമായ വെല്ലുവിളി ഉയർത്തുന്ന ബീഹാർ രാഷ്ട്രീയത്തിൽ യുവത്വത്തിന്റെ പ്രാതിനിധ്യം ജെഡിയുവിനെ സംബന്ധിച്ചിടത്തോളം അനിവാര്യമാണ്. തേജസ്വി യാദവിനെപ്പോലെയുള്ള യുവനേതാക്കളെ നേരിടാൻ നിശാന്ത് കുമാറിന്റെ വരവ് ഗുണകരമാകുമെന്ന് ജെഡിയു നേതൃത്വം കണക്കുകൂട്ടുന്നു. എന്നാൽ കുടുംബ രാഷ്ട്രീയത്തെ മുൻനിർത്തി പ്രതിപക്ഷം ഈ നീക്കത്തെ എങ്ങനെ നേരിടുമെന്നത് കണ്ടറിയണം. ഔദ്യോഗികമായ രാഷ്ട്രീയ പ്രഖ്യാപനം ഉടൻ തന്നെയുണ്ടാകുമെന്നാണ് സൂചന. നിശാന്ത് കുമാർ വരും ദിവസങ്ങളിൽ കൂടുതൽ പൊതുപരിപാടികളിൽ പങ്കെടുക്കുമെന്നും ജെഡിയു വൃത്തങ്ങൾ അറിയിച്ചു. ബീഹാർ രാഷ്ട്രീയത്തിന്റെ ഗതി മാറ്റാൻ പോകുന്ന ഒരു വലിയ പ്രഖ്യാപനത്തിനായാണ് ഇപ്പോൾ പട്ന കാത്തിരിക്കുന്നത്.

---------------

Hindusthan Samachar / Roshith K