Newdelhi , 21 മാര്ച്ച് (H.S.)

ന്യൂഡൽഹി: തലസ്ഥാനത്തെ പ്രമുഖ വാർത്താ ഏജൻസിയായ യുണൈറ്റഡ് ന്യൂസ് ഓഫ് ഇന്ത്യയുടെ (UNI) ഓഫീസ് ഡൽഹി പൊലീസ് സീൽ ചെയ്തു. ന്യൂഡൽഹിയിലെ റാഫി മാർഗിലുള്ള യുഎൻഐയുടെ ഓഫീസ് ഭൂമി അനുവദിച്ചതുമായി ബന്ധപ്പെട്ട വ്യവസ്ഥകൾ ലംഘിച്ചതിനെത്തുടർന്നാണ് നടപടി. മാർച്ച് 20-ന് ഡൽഹി ഹൈക്കോടതി പുറപ്പെടുവിച്ച ഉത്തരവിന്റെ അടിസ്ഥാനത്തിലാണ് പൊലീസ് ഈ നടപടി സ്വീകരിച്ചത്.

കഴിഞ്ഞ നാല് പതിറ്റാണ്ടായി കെട്ടിട നിർമ്മാണം പൂർത്തിയാക്കാത്തതും ഭൂമി അനുവദിച്ചപ്പോഴുണ്ടായ നിബന്ധനകൾ പാലിക്കാത്തതുമാണ് യുഎൻഐക്ക് തിരിച്ചടിയായത്. വസ്തുവിന്റെ ഉടമസ്ഥാവകാശം തിരികെ പിടിക്കാനുള്ള ലാൻഡ് ആൻഡ് ഡെവലപ്മെന്റ് ഓഫീസിന്റെ (L&DO) തീരുമാനം ഹൈക്കോടതി ശരിവെക്കുകയായിരുന്നു.

തിരിച്ചടിയായത് 40 വർഷത്തെ കാലതാമസം

1979-ലാണ് റാഫി മാർഗിലെ 9-ാം നമ്പർ സ്ഥലം യുഎൻഐക്ക് അനുവദിച്ചത്. മാധ്യമ സ്ഥാപനങ്ങൾക്കായി ഒരു ഓഫീസ് സമുച്ചയം നിർമ്മിക്കണമെന്ന കർശന വ്യവസ്ഥയിലായിരുന്നു ഈ അനുവദിക്കൽ. എന്നാൽ 40 വർഷം പിന്നിട്ടിട്ടും അവിടെ യാതൊരു നിർമ്മാണ പ്രവർത്തനങ്ങളും നടത്താൻ യുഎൻഐക്ക് കഴിഞ്ഞില്ല. 1986, 1999, 2000 വർഷങ്ങളിൽ നിർമ്മാണം പൂർത്തിയാക്കാൻ സർക്കാർ സമയം നീട്ടി നൽകിയിട്ടും സ്ഥാപനത്തിന്റെ ഭാഗത്തുനിന്ന് പുരോഗതി ഉണ്ടായില്ല.

മതിയായ സാമ്പത്തിക ശേഷിയില്ലാത്തതിനാൽ നിർമ്മാണം നടത്താൻ കഴിയില്ലെന്ന് 2022-ൽ യുഎൻഐ കോടതിയിൽ സമ്മതിച്ചിരുന്നു. പൊതുജനങ്ങളുടെ ഉടമസ്ഥതയിലുള്ള ഭൂമി അനുവദിച്ച ഉദ്ദേശ്യത്തിനായി ഉപയോഗിക്കാൻ കഴിയാത്തവർക്ക് അത് കൈവശം വെക്കാൻ അവകാശമില്ലെന്ന് ഹൈക്കോടതി നിരീക്ഷിച്ചു.

സ്വകാര്യവൽക്കരണവും നിയമപ്രശ്നങ്ങളും

കോർപ്പറേറ്റ് പാപ്പരത്ത പരിഹാര പ്രക്രിയയിലൂടെ (CIRP) യുഎൻഐയുടെ നിയന്ത്രണം 'ദി സ്റ്റേറ്റ്സ്മാൻ ലിമിറ്റഡ്' എന്ന സ്വകാര്യ വാണിജ്യ സ്ഥാപനത്തിന് കൈമാറിയതും ലംഘനമായി കോടതി കണക്കാക്കി. ലാഭേച്ഛയില്ലാതെ പ്രവർത്തിക്കുന്ന ദേശീയ വാർത്താ ഏജൻസിക്ക് അനുവദിച്ച ഭൂമി, സർക്കാരിന്റെ മുൻകൂർ അനുമതിയില്ലാതെ വാണിജ്യ സ്ഥാപനത്തിന് കൈമാറുന്നത് ഭൂമി അനുവദിച്ചതിന്റെ അടിസ്ഥാന ലക്ഷ്യത്തെ തകർക്കുന്നതാണെന്ന് കോടതി വ്യക്തമാക്കി.

കൂടാതെ, പ്രസ് കൗൺസിൽ ഓഫ് ഇന്ത്യയും (PCI) ഈ ഭൂമിയുടെ സഹ-അലോട്ടി ആയിരുന്നു. എന്നാൽ യുഎൻഐയുടെ നിസ്സഹകരണം കാരണം പ്രസ് കൗൺസിലിനും അവിടെ നിർമ്മാണ പ്രവർത്തനങ്ങൾ നടത്താൻ കഴിഞ്ഞിരുന്നില്ല. അനുവദിക്കപ്പെട്ട ഭൂമി കാന്റീൻ പോലുള്ള വാണിജ്യ ആവശ്യങ്ങൾക്കായി ഉപയോഗിച്ചതായും കോടതി കണ്ടെത്തി.

കോടതിയുടെ നിരീക്ഷണം

വിലപിടിപ്പുള്ള പൊതുവിഭവങ്ങൾ പതിറ്റാണ്ടുകളോളം ഉപയോഗശൂന്യമായി ഇടുന്നത് അംഗീകരിക്കാനാവില്ലെന്ന് കോടതി പറഞ്ഞു. ഏകദേശം 1000 കോടിയിലധികം രൂപ മൂല്യമുള്ള ഈ ഭൂമി വെറും 100 കോടിയിൽ താഴെ രൂപയ്ക്കാണ് സ്റ്റേറ്റ്സ്മാൻ ഗ്രൂപ്പ് ഏറ്റെടുക്കാൻ ശ്രമിച്ചതെന്നും കോടതി രേഖകൾ വ്യക്തമാക്കുന്നു.

ഹൈക്കോടതി വിധി വന്നതിന് പിന്നാലെ വെള്ളിയാഴ്ച തന്നെ പൊലീസ് സ്ഥലത്തെത്തി ഓഫീസ് സീൽ ചെയ്യുകയും വസ്തു ലാൻഡ് ആൻഡ് ഡെവലപ്മെന്റ് ഓഫീസിന് കൈമാറുകയും ചെയ്തു. പൊതു താല്പര്യാർത്ഥം സർക്കാർ സ്വീകരിച്ച ഈ നടപടി നിയമാനുസൃതമാണെന്ന് കോടതി വിധിന്യായത്തിൽ വ്യക്തമാക്കി.

---------------

Hindusthan Samachar / Roshith K