Malappuram , 22 മാര്ച്ച് (H.S.)

മലപ്പുറം: മുസ്ലിം ലീഗ് രാഷ്ട്രീയത്തിൽ ആഭ്യന്തര കലഹം രൂക്ഷമാകുന്നു. പാർട്ടിക്കുള്ളിൽ താൻ അവഗണിക്കപ്പെടുന്നുവെന്ന് ആരോപിച്ച് രംഗത്തെത്തിയ ആഷിഖ ഖാനത്തിനെതിരെ രൂക്ഷമായ ഭാഷയിൽ മറുപടിയുമായി സംസ്ഥാന വനിതാ ലീഗ് കമ്മിറ്റി സീനിയർ വൈസ് പ്രസിഡന്റ് ഷാഹിന നിയാസി രംഗത്തെത്തി. ആഷിഖയുടേത് വെറും 'വികാര രാഷ്ട്രീയം' മാത്രമാണെന്നും പാർട്ടിയെ ഒറ്റിക്കൊടുക്കുന്ന സമീപനമാണ് അവരുടേതെന്നും ഷാഹിന ഫെയ്സ്ബുക്ക് കുറിപ്പിലൂടെ കുറ്റപ്പെടുത്തി.

വ്യക്തിയേക്കാൾ വലുതാണ് പ്രസ്ഥാനം

ഈ ഹരിത പ്രസ്ഥാനം ഏതെങ്കിലും വ്യക്തിയേക്കാൾ വലുതാണെന്ന് ഓർക്കണമെന്ന് ഷാഹിന നിയാസി തന്റെ കുറിപ്പിൽ വ്യക്തമാക്കി. രാഷ്ട്രീയമെന്നത് കൃത്യമായ നിലപാടുകളുടെയും അച്ചടക്കത്തിന്റെയും കളിക്കളമാണ്. അഞ്ച് കൊല്ലം ഞാൻ പുറത്തുപോയില്ലല്ലോ എന്നത് ഒരു വീരഗാഥയായി പറയേണ്ട ഒന്നല്ല, മറിച്ച് ഒരു പാർട്ടി പ്രവർത്തകയുടെ പ്രാഥമികമായ കടമ മാത്രമാണ്. അത് വലിയൊരു ത്യാഗമായി അവതരിപ്പിച്ചു വിപണനം നടത്താൻ ശ്രമിക്കുന്നത് മുസ്ലിം ലീഗ് രാഷ്ട്രീയത്തിന്റെ അന്തസ്സത്ത മനസ്സിലാക്കാത്തതുകൊണ്ടാണെന്നും ഷാഹിന പരിഹസിച്ചു.

വേട്ടയാടപ്പെട്ടവന്റെ പരിവേഷം രാഷ്ട്രീയ നാടകം

പാർട്ടിയുടെ നയങ്ങൾക്കും അച്ചടക്കത്തിനും വിരുദ്ധമായി പ്രവർത്തിച്ചതിന്റെ പേരിൽ നടപടി നേരിട്ടവർ ഇപ്പോൾ 'വേട്ടയാടപ്പെട്ടവന്റെ' പരിവേഷം അണിയുന്നത് വെറും രാഷ്ട്രീയ നാടകമാണെന്ന് ഷാഹിന ആരോപിച്ചു. പാർട്ടിക്കുള്ളിലെ ആഭ്യന്തര ചർച്ചകൾ പൊതുവേദിയിൽ വിളിച്ചുപറഞ്ഞ് അത് സത്യസന്ധതയാണെന്ന് സ്ഥാപിക്കാൻ ശ്രമിക്കുന്നവർ യഥാർത്ഥത്തിൽ പ്രസ്ഥാനത്തെ ഒറ്റിക്കൊടുക്കുകയാണ് ചെയ്യുന്നത്. വ്യക്തിപരമായ മൈലേജിന് വേണ്ടിയുള്ള ഇത്തരം ഷോർട്ട്കട്ടുകൾ ലീഗ് രാഷ്ട്രീയത്തിൽ വിലപ്പോവില്ലെന്നും അവർ കൂട്ടിച്ചേർത്തു.

മറുപക്ഷത്തിന്റെ ഓഫറുകൾ കേൾക്കുമ്പോൾ കൗതുകം

മറുപക്ഷം വിളിച്ചു, എം.എൽ.എമാർ വീട്ടിൽ വന്നു, സ്ഥാനാർത്ഥിയാക്കാമെന്ന് പറഞ്ഞു എന്നൊക്കെയുള്ള ആഷിഖയുടെ വെളിപ്പെടുത്തലുകളെ ഷാഹിന തള്ളിക്കളഞ്ഞു. രാഷ്ട്രീയത്തിൽ അവസരങ്ങൾ വരും പോകും, പക്ഷേ അത് വിളിച്ചുപറഞ്ഞു നടക്കാനുള്ളതല്ല. അച്ചടക്കമില്ലാത്ത പാർട്ടി സ്നേഹം എന്നും പ്രസ്ഥാനത്തിന് ബാധ്യതയാണെന്നും ഷാഹിന ഓർമ്മിപ്പിച്ചു. ഹരിത പതാകയുടെ മാന്യത കാത്തുസൂക്ഷിക്കാത്തവർ ആ നിറം അണിയാൻ യോഗ്യയല്ലെന്നും അവർ കുറിപ്പിൽ കുറിച്ചു.

വനിതാ ലീഗിലെ തലമുറ മാറ്റം

വനിതാ ലീഗിൽ തലമുറ മാറ്റം വേണമെന്ന് കളിയാക്കുന്നവർക്ക് കൃത്യമായ മറുപടിയും ഷാഹിന നൽകി. പുതിയ തലമുറയെയും പഴയ തലമുറയെയും ഒരുമിച്ച് കൊണ്ടുപോകുന്ന പാരമ്പര്യമാണ് വനിതാ ലീഗിനുള്ളത്. അതിന് പ്രാപ്തിയുള്ള നേതാക്കൾ സംഘടനയിലുണ്ട്. വനിതാ ലീഗിന്റെ മിതത്വം പരിമിതിയല്ലെന്നും പ്രസ്ഥാനത്തിന് കാവലായി തങ്ങൾ എപ്പോഴും മുന്നിലുണ്ടാകുമെന്നും ഷാഹിന വ്യക്തമാക്കി.

നേരത്തെ, കഴിഞ്ഞ അഞ്ച് വർഷത്തിനിടയിൽ തനിക്ക് മറ്റ് പാർട്ടികളിൽ നിന്നും നിരവധി ഓഫറുകൾ വന്നിട്ടുണ്ടെന്നും എന്നാൽ ലീഗിനോടുള്ള സ്നേഹം കാരണം പോയില്ലെന്നും ആഷിഖ ഖാനം ഫെയ്സ്ബുക്കിൽ കുറിച്ചിരുന്നു. ഇതിന് പിന്നാലെയാണ് പാർട്ടി നേതൃത്വത്തിന്റെ ഔദ്യോഗിക പ്രതികരണമെന്നോണം ഷാഹിന നിയാസി രംഗത്തെത്തിയത്. 2026-ലെ നിയമസഭാ തിരഞ്ഞെടുപ്പിന് മുന്നോടിയായി വനിതാ ലീഗിലുണ്ടായ ഈ തർക്കം പാർട്ടിക്കുള്ളിൽ വലിയ ചർച്ചകൾക്ക് വഴിതെളിച്ചിട്ടുണ്ട്.

---------------

Hindusthan Samachar / Roshith K