Kochi , 26 മാര്ച്ച് (H.S.)

നഗരത്തിന്റെ മുഖമായി മാറിയിരിക്കുകയാണ് മെട്രോ അടക്കമുള്ള ഗതാഗത സൗകര്യങ്ങള്. അടുത്തകാലത്തായി വലിയ രീതിയില് വിപുലീകരണവും വികസന പ്രവർത്തനങ്ങളും മെട്രോയുമായി ബന്ധപ്പെട്ട് നടക്കുന്നുമുണ്ട്.

പറഞ്ഞുവന്നത് കൊച്ചി മെട്രോ രണ്ടാംഘട്ടത്തെ കുറിച്ചാണ്. ആയിരക്കണക്കിന് യാത്രക്കാർ കാത്തിരിക്കുന്ന നിർണായക പദ്ധതിയാണ് ഇത്. അതുമായി ബന്ധപ്പെട്ട കരാർ വിവരങ്ങളാണ് ഇപ്പോള് പുറത്തുവന്നിരിക്കുന്നത്.

മെട്രോ റെയില് ലിമിറ്റഡ് രണ്ടാം ഘട്ടത്തിലെ സിവില് സ്റ്റേഷൻ ജംഗ്ഷൻ, കൊച്ചിൻ സെസ് എന്നീ സ്റ്റേഷനുകളിലെ പ്രവേശന-പുറപ്പെടല് കെട്ടിടങ്ങളുടെ നിർമ്മാണത്തിനായി ക്രസന്റ് കണ്സ്ട്രക്ഷൻ കമ്പനിക്ക് 21.49 കോടി രൂപയുടെ സിവില് നിർമ്മാണ കരാറാണ് നല്കിയത്. വാസ്തുവിദ്യ, കെട്ടിട സേവനങ്ങള് എന്നിവ ഒഴികെയുള്ള മറ്റ് സിവില് ജോലികള് ഉള്പ്പെടുന്നതാണ് ഈ കരാർ. ഈ ഒഴിവാക്കപ്പെട്ട ജോലികള്ക്ക് പിന്നീട് പ്രത്യേകം കരാറുകള് നല്കും.

കൊച്ചിയുടെ സിവില് സർവീസ് അഡ്മിനിസ്ട്രേറ്റീവ് ഹബ്ബിന് സമീപം തന്ത്രപ്രധാനമായ സ്ഥാനത്താണ് സിവില് സ്റ്റേഷൻ ജംഗ്ഷൻ മെട്രോ സ്റ്റേഷൻ വരുന്നത്. ഇത് സർക്കാർ ജീവനക്കാർക്കും സന്ദർശകർക്കും ഏറെ ഉപകാരപ്രദമാകുന്ന, ഉയർന്ന കാല്നടയാത്രയുള്ള ഒരു സ്റ്റേഷനായി മാറും. അതേസമയം, കൊച്ചിൻ സെസ് സ്റ്റേഷൻ പ്രത്യേക സാമ്പത്തിക മേഖലകള്ക്ക് നേരിട്ട് സേവനം നല്കുന്ന രീതിയിലാണ് രൂപകല്പ്പന ചെയ്തിരിക്കുന്നത്.

പിങ്ക് ലൈൻ എന്നും അറിയപ്പെടുന്ന കൊച്ചി മെട്രോ രണ്ടാം ഘട്ടം, കലൂരിലെ ജവഹർലാല് നെഹ്റു സ്റ്റേഡിയത്തില് നിന്ന് കാക്കനാട്ടെ ഇൻഫോപാർക്ക് ഫേസ് 2 വരെ ബന്ധിപ്പിക്കുന്ന 11.2 കിലോമീറ്റർ നീളമുള്ള ഒരു മേല്പ്പാല മെട്രോ ഇടനാഴിയായാണ് കെഎംആർഎല് വിഭാവനം ചെയ്തിരിക്കുന്നത്. 2022 സെപ്റ്റംബർ 1ന് പ്രധാനമന്ത്രി നരേന്ദ്ര മോദിയാണ് ഇതിന് തറക്കല്ലിട്ടത്. പദ്ധതിയുടെ നിർമ്മാണം ഔദ്യോഗികമായി 2024 ജൂലൈ 3നാണ് ആരംഭിച്ചത്.

പിങ്ക് ലൈനില് ആകെ 11 സ്റ്റേഷനുകളാണ് ഉള്ക്കൊള്ളുന്നത്. ഇത് രണ്ട് ഉപഘട്ടങ്ങളായാണ് വികസിപ്പിക്കുന്നത്. ആദ്യത്തെ അഞ്ച് സ്റ്റേഷനുകള് 2026 ജൂണ് 30-നകം പ്രവർത്തനക്ഷമമാക്കാനാണ് ലക്ഷ്യമിടുന്നത്. ഈ കരാറിന്റെ ഭാഗമായ സിവില് സ്റ്റേഷൻ ജംഗ്ഷൻ, കൊച്ചിൻ സെസ് എന്നിവയുള്പ്പെടെയുള്ള ശേഷിക്കുന്ന സ്റ്റേഷനുകള് 2026 ഡിസംബറോടെ പൂർത്തിയാക്കാൻ തിയതി നിശ്ചയിച്ചിട്ടുണ്ട്.

കനത്ത മണ്സൂണ് മഴയും ഭൂഗർഭ പൈപ്പ് ലൈനുകള് മാറ്റി സ്ഥാപിക്കേണ്ടി വന്നതും കാരണം മൂന്ന് മാസത്തെ കാലതാമസം നേരിട്ടെങ്കിലും, കെഎംആർഎല് അതിന്റെ ലക്ഷ്യങ്ങളില് തന്നെ ഉറച്ചുനില്ക്കുന്നു. ആദ്യത്തെ അഞ്ച് സ്റ്റേഷനുകള് 2026 ജൂണിലും പിങ്ക് ലൈൻ പൂർണമായി 2026 ഡിസംബറിലും പൂർത്തിയാക്കാനാണ് അവർ ലക്ഷ്യമിടുന്നത്.

---------------

Hindusthan Samachar / CHANDHU CHANDRASEKHAR