Chennai, 28 മാര്ച്ച് (H.S.)

ചെന്നൈ: 2026-ലെ തമിഴ്നാട് നിയമസഭാ തിരഞ്ഞെടുപ്പിനുള്ള ആദ്യഘട്ട സ്ഥാനാർത്ഥി പട്ടിക മുഖ്യമന്ത്രിയും ഡിഎംകെ അധ്യക്ഷനുമായ എം.കെ. സ്റ്റാലിൻ പുറത്തുവിട്ടു. ആകെയുള്ള 234 സീറ്റുകളിൽ 164 സീറ്റുകളിലാണ് ഡിഎംകെ നേരിട്ട് മത്സരിക്കുന്നത്. ബാക്കിയുള്ള 70 സീറ്റുകൾ കോൺഗ്രസ് ഉൾപ്പെടെയുള്ള സഖ്യകക്ഷികൾക്കായി വിട്ടുനൽകി. സ്ഥാനാർത്ഥി പ്രഖ്യാപനം വന്നതോടെ തമിഴ്നാട്ടിൽ തിരഞ്ഞെടുപ്പ് ആവേശം കൊടുമുടിയിലെത്തിയിരിക്കുകയാണ്.

കൊളത്തൂർ നിലനിർത്താൻ സ്റ്റാലിൻ

മുഖ്യമന്ത്രി എം.കെ. സ്റ്റാലിൻ തന്റെ സിറ്റിംഗ് സീറ്റായ ചെന്നൈയിലെ കൊളത്തൂരിൽ നിന്ന് തന്നെ വീണ്ടും ജനവിധി തേടും. 2011 മുതൽ തുടർച്ചയായി സ്റ്റാലിനെ നിയമസഭയിലെത്തിക്കുന്ന മണ്ഡലമാണിത്. ഉപമുഖ്യമന്ത്രി ഉദയനിധി സ്റ്റാലിൻ ചെന്നൈയിലെ തന്നെ ചേപ്പോക്ക്-തിരുവള്ളിക്കേണി മണ്ഡലത്തിൽ നിന്ന് വീണ്ടും മത്സരിക്കും. കരുണാനിധിയുടെ കുടുംബത്തിന് ശക്തമായ വേരോട്ടമുള്ള മണ്ഡലങ്ങളാണിവ രണ്ടും.

പുതുമുഖങ്ങൾക്ക് പ്രാധാന്യം

ഇത്തവണത്തെ പട്ടികയിൽ പുതുമുഖങ്ങൾക്ക് വലിയ പ്രാധാന്യമാണ് ഡിഎംകെ നൽകിയിരിക്കുന്നത്. 164 സ്ഥാനാർത്ഥികളിൽ 60 പേരും ആദ്യമായി നിയമസഭയിലേക്ക് മത്സരിക്കുന്നവരാണ്. വിദ്യാഭ്യാസ യോഗ്യതയ്ക്കും പാർട്ടി വലിയ പരിഗണന നൽകിയിട്ടുണ്ട്. സ്ഥാനാർത്ഥികളിൽ 125 പേർ ബിരുദധാരികളും 15 പേർ ഡോക്ടർമാരും 17 പേർ എഞ്ചിനീയർമാരുമാണ്. 18 വനിതകൾക്കും പട്ടികയിൽ ഇടം ലഭിച്ചു. അതേസമയം, നിലവിലെ മന്ത്രിസഭയിലെ ഭൂരിഭാഗം പേരെയും പാർട്ടി വീണ്ടും മത്സരിപ്പിക്കാൻ തീരുമാനിച്ചു. എങ്കിലും എൻ. കയൽവിഴി സെൽവരാജ്, മനോ തങ്കരാജ്, ആർ. ഗാന്ധി എന്നീ മൂന്ന് മന്ത്രിമാർക്ക് ഇത്തവണ സീറ്റ് നൽകിയിട്ടില്ല എന്നത് ശ്രദ്ധേയമാണ്.

അപ്രതീക്ഷിത സ്ഥാനാർത്ഥികൾ

എഐഎഡിഎംകെയിൽ (AIADMK) നിന്ന് രാജിവെച്ച് ഡിഎംകെയിൽ ചേർന്ന മുൻ മുഖ്യമന്ത്രി ഒ. പനീർസെൽവം തന്റെ മണ്ഡലമായ ബോഡിനായ്ക്കന്നൂരിൽ നിന്ന് തന്നെ ഡിഎംകെ സ്ഥാനാർത്ഥിയായി മത്സരിക്കും. പനീർസെൽവത്തിന്റെ വരവ് തെക്കൻ തമിഴ്നാട്ടിൽ ഡിഎംകെയ്ക്ക് വലിയ മുൻതൂക്കം നൽകുമെന്നാണ് പാർട്ടിയുടെ കണക്കുകൂട്ടൽ. മുൻ മന്ത്രി വി. സെന്തിൽ ബാലാജി ഇത്തവണ കരൂരിന് പകരം കോയമ്പത്തൂർ സൗത്തിൽ നിന്നാണ് മത്സരിക്കുന്നത്.

സഖ്യകക്ഷികൾക്ക് 70 സീറ്റുകൾ

ഡിഎംകെ നയിക്കുന്ന സെക്കുലർ പ്രോഗ്രസീവ് അലയൻസിൽ (SPA) കോൺഗ്രസിന് 28 സീറ്റുകൾ നൽകി. പുതിയ സഖ്യകക്ഷിയായ ഡിഎംഡികെയ്ക്ക് (DMDK) 10 സീറ്റുകളും വിസികെയ്ക്ക് (VCK) 8 സീറ്റുകളും അനുവദിച്ചു. സിപഐ, സിപിഎം എന്നീ പാർട്ടികൾ 5 സീറ്റുകളിൽ വീതം മത്സരിക്കും. എല്ലാ വിഭാഗങ്ങളെയും ഉൾക്കൊള്ളുന്ന ഒരു 'മെഗാ സഖ്യമാണ്' തങ്ങളുടേതെന്ന് സ്ഥാനാർത്ഥി പട്ടിക പുറത്തുവിട്ടുകൊണ്ട് എം.കെ. സ്റ്റാലിൻ പറഞ്ഞു.

തിരഞ്ഞെടുപ്പ് തീയതി

ഏപ്രിൽ 23-നാണ് തമിഴ്നാട്ടിൽ വോട്ടെടുപ്പ് നടക്കുന്നത്. മെയ് 3-ന് ഫലം പ്രഖ്യാപിക്കും. സ്ഥാനാർത്ഥി പട്ടിക പുറത്തിറങ്ങിയതോടെ ഞായറാഴ്ച തിരഞ്ഞെടുപ്പ് പ്രകടനപത്രിക പുറത്തിറക്കുമെന്നും തിങ്കളാഴ്ച മുതൽ പ്രചാരണം ശക്തമാക്കുമെന്നും സ്റ്റാലിൻ അറിയിച്ചു. 200-ലധികം സീറ്റുകൾ നേടി ഭരണം നിലനിർത്താനാണ് ഡിഎംകെ ലക്ഷ്യമിടുന്നത്.

---------------

Hindusthan Samachar / Roshith K