Thiruvananthapuram , 11 ഏപ്രില് (H.S.)

തിരുവനന്തപുരം: തലസ്ഥാനത്തെ കവടിയാർ കൊട്ടാരത്തിൽ നടന്ന വൻ സ്വരണമോഷണവുമായി ബന്ധപ്പെട്ട് അന്വേഷണസംഘം നിർണ്ണായകമായ മൊഴിയെടുപ്പ് ഘട്ടം പൂർത്തിയാക്കി. കൊട്ടാരത്തിനുള്ളിൽ നിന്നുള്ളവരുടെ സഹായമില്ലാതെ ഇത്രയും വലിയൊരു കവർച്ച നടക്കില്ലെന്ന നിഗമനത്തിലാണ് പൊലീസ് ഇപ്പോൾ എത്തിയിരിക്കുന്നത്. രണ്ട് കോടിയോളം രൂപ മൂല്യം വരുന്ന പൗരാണിക വജ്രാഭരണങ്ങളും സ്വർണ്ണശേഖരവുമാണ് കൊട്ടാരത്തിൽ നിന്ന് നഷ്ടപ്പെട്ടത്.

മൊഴിയെടുത്തത് 40ഓളം പേരിൽ നിന്ന്

നിലവിൽ കന്റോൺമെന്റ് എസിയുടെ നേതൃത്വത്തിലാണ് കേസ് അന്വേഷിക്കുന്നത്. ഇതിന്റെ ഭാഗമായി കൊട്ടാരത്തിലെ അംഗങ്ങൾ, സ്ഥിരം ജീവനക്കാർ, കൊട്ടാരത്തിൽ നിത്യേന സന്ദർശനം നടത്തുന്ന അതിഥികൾ എന്നിവരുടെ മൊഴികൾ വിശദമായി രേഖപ്പെടുത്തി. അടുത്തിടെ കൊട്ടാരം സന്ദർശിച്ച ചില യൂട്യൂബർമാരുടെയും മൊഴി പൊലീസ് എടുത്തിട്ടുണ്ട്. കൊട്ടാരത്തിന്റെ ഉൾഭാഗത്തെക്കുറിച്ച് കൃത്യമായ ധാരണയുള്ള ഒരാൾക്ക് മാത്രമേ രണ്ടാമത്തെ നിലയിലെ കിടപ്പുമുറിയിലുള്ള ഇരുമ്പ് അലമാരയുടെ ലോക്കർ തുറന്ന് ആഭരണങ്ങൾ കൈക്കലാക്കാൻ സാധിക്കൂ എന്ന് പൊലീസ് ഉറച്ചു വിശ്വസിക്കുന്നു.

നഷ്ടപ്പെട്ടത് പൗരാണിക ശേഖരം

രാജകുടുംബാംഗമായ അശ്വതി തിരുനാൾ ഗൗരി ലക്ഷ്മിബായിയുടെ അലമാരയിൽ നിന്നാണ് ആഭരണങ്ങൾ മോഷണം പോയത്. ശ്രീചിത്തിര തിരുനാൾ ബാലരാമവർമ്മ മഹാരാജാവ് സമ്മാനിച്ച അമൂല്യമായ ആഭരണങ്ങളും ഇതിൽ ഉൾപ്പെടുന്നു. 2025 നവംബറിൽ ബെംഗളൂരുവിലേക്ക് പോകുന്നതിന് മുന്നോടിയായി അലമാര പരിശോധിച്ചപ്പോഴാണ് ആഭരണം നഷ്ടപ്പെട്ട വിവരം ശ്രദ്ധയിൽപ്പെട്ടത്. കൊട്ടാരത്തിനുള്ളിൽ ആന്തരിക പരിശോധനകൾ നടത്തിയിട്ടും കണ്ടെത്താൻ കഴിയാത്തതിനെ തുടർന്നാണ് ഡിജിപിക്ക് പരാതി നൽകിയത്.

സുരക്ഷാ വീഴ്ചയോ?

നാല് കുടുംബങ്ങളും നാൽപ്പതിലധികം ജീവനക്കാരുമുള്ള കവടിയാർ കൊട്ടാരത്തിൽ സിസിടിവി ക്യാമറകളും സുരക്ഷാ ജീവനക്കാരുമുണ്ട്. ഇത്രയും വലിയ സുരക്ഷാ സംവിധാനങ്ങൾ മറികടന്ന് പുറത്തുനിന്നൊരാൾ വന്ന് മോഷണം നടത്തുക എന്നത് അസാധ്യമാണെന്നാണ് പ്രാഥമിക നിഗമനം. മോഷണം നടന്നതായി കരുതപ്പെടുന്ന കാലയളവിലെ സിസിടിവി ദൃശ്യങ്ങൾ പൊലീസ് വീണ്ടും പരിശോധിച്ചു വരികയാണ്.

കവർച്ചയ്ക്ക് ശേഷം അവശേഷിച്ച ആഭരണങ്ങൾ പൊലീസിന്റെ നിർദ്ദേശപ്രകാരം സുരക്ഷിതമായ മറ്റൊരു സ്ഥാനത്തേക്ക് മാറ്റിയിട്ടുണ്ട്. നിലവിൽ ലഭിച്ച മൊഴികളുടെ അടിസ്ഥാനത്തിൽ പ്രതികളെ ഉടൻ കണ്ടെത്താനാകുമെന്ന പ്രതീക്ഷയിലാണ് സിറ്റി പൊലീസ്. വരും ദിവസങ്ങളിൽ കൊട്ടാരത്തിലെ ജീവനക്കാരെ കേന്ദ്രീകരിച്ച് കൂടുതൽ ശാസ്ത്രീയമായ പരിശോധനകൾ നടന്നേക്കും.

---------------

Hindusthan Samachar / Roshith K