Kochi, 17 ഏപ്രില് (H.S.)

കൊച്ചി: വിഷു ആഘോഷങ്ങളുമായി ബന്ധപ്പെട്ട് ശ്രീകൃഷ്ണനെ അപകീർത്തിപ്പെടുത്തുന്ന രീതിയിൽ ഒരു റെസ്റ്റോറന്റ് പുറത്തിറക്കിയ പരസ്യത്തിനെതിരെ കടുത്ത പ്രതിഷേധവുമായി നടൻ ഉണ്ണി മുകുന്ദൻ. ഭഗവാൻ ശ്രീകൃഷ്ണന്റെ ചിത്രത്തിന് മുന്നിൽ മന്തി വിളമ്പിയ തരത്തിലുള്ള ചിത്രം ഉപയോഗിച്ച് വിഷു ആശംസകൾ നേർന്നതിനെയാണ് താരം രൂക്ഷമായ ഭാഷയിൽ വിമർശിച്ചത്. എല്ലാത്തിനും ഒരു പരിധിയുണ്ട്, ഇത് തികഞ്ഞ വെറുപ്പാണ് എന്ന് ഉണ്ണി മുകുന്ദൻ തന്റെ സോഷ്യൽ മീഡിയ കുറിപ്പിൽ വ്യക്തമാക്കി.

വിശ്വാസികളുടെ വികാരങ്ങളെ മാനിക്കണം

വിശ്വാസികളായ ആളുകളുടെ വികാരങ്ങളെ മാനിക്കാൻ ദയവായി പഠിക്കണം എന്ന് ഉണ്ണി മുകുന്ദൻ പറഞ്ഞു. വിഷു പോലൊരു പവിത്രമായ ആഘോഷത്തെയും ഭഗവാൻ ശ്രീകൃഷ്ണനെയും ഇതുപോലെ മോശമായി ചിത്രീകരിക്കുന്നത് അംഗീകരിക്കാനാവില്ല. ഇത്തരം പ്രവർത്തികൾ ബോധപൂർവം മതവികാരം വ്രണപ്പെടുത്താനാണെന്നും താരം ആരോപിച്ചു. ഉണ്ണി മുകുന്ദന്റെ പോസ്റ്റ് നിമിഷങ്ങൾക്കകം വൈറലായതോടെ വലിയ രീതിയിലുള്ള പിന്തുണയാണ് സോഷ്യൽ മീഡിയയിൽ ലഭിച്ചുകൊണ്ടിരിക്കുന്നത്.

ഹോട്ടൽ ഉടമ അറസ്റ്റിൽ

ആലപ്പുഴ ചേർത്തലയിലെ 'മെഹർ മന്തി' എന്ന റെസ്റ്റോറന്റാണ് വിവാദമായ പരസ്യം സോഷ്യൽ മീഡിയയിലൂടെ പ്രചരിപ്പിച്ചത്. ചിക്കൻ മന്തി കഴിക്കുന്ന നിലയിലുള്ള ശ്രീകൃഷ്ണന്റെ ചിത്രം സോഷ്യൽ മീഡിയയിൽ വ്യാപകമായി പ്രചരിച്ചതോടെ ഇതിനെതിരെ പ്രതിഷേധം ശക്തമായിരുന്നു. സംഭവത്തിൽ പരാതി ഉയർന്നതിനെ തുടർന്ന് ഹോട്ടൽ ഉടമ അർഷാദിനെ പോലീസ് അറസ്റ്റ് ചെയ്തു. കലാപം ഉണ്ടാക്കുക എന്ന ഉദ്ദേശ്യത്തോടെ മനഃപൂർവമായ പ്രകോപനം സൃഷ്ടിക്കാൻ ശ്രമിച്ചു എന്ന വകുപ്പ് പ്രകാരമാണ് (BNS) ഇയാൾക്കെതിരെ കേസെടുത്തിരിക്കുന്നത്.

പ്രതിഷേധവുമായി ഹൈന്ദവ സംഘടനകൾ

ഹോട്ടലിന്റെ നടപടിക്കെതിരെ വിശ്വഹിന്ദു പരിഷത്ത് (VHP) ഉൾപ്പെടെയുള്ള സംഘടനകൾ രംഗത്തെത്തി. ഹോട്ടലിന് മുന്നിൽ പ്രതിഷേധ സമരം നടത്തുമെന്നും അവർ പ്രഖ്യാപിച്ചിട്ടുണ്ട്. എന്നാൽ, ഈ പരസ്യം തങ്ങൾ അറിഞ്ഞുകൊണ്ട് ചെയ്തതല്ലെന്നും സോഷ്യൽ മീഡിയ കൈകാര്യം ചെയ്യുന്ന ഫ്രീലാൻസറെ ഏൽപ്പിച്ചപ്പോൾ സംഭവിച്ച പിഴവാണെന്നുമാണ് ഹോട്ടൽ അധികൃതരുടെ വിശദീകരണം.

ഉണ്ണി മുകുന്ദനെ കൂടാതെ നിരവധി സാംസ്കാരിക-രാഷ്ട്രീയ പ്രവർത്തകരും ഈ പരസ്യത്തിനെതിരെ രംഗത്തെത്തിയിട്ടുണ്ട്. വിപണനത്തിന് വേണ്ടി മതചിഹ്നങ്ങളെയും ആരാധനാമൂർത്തികളെയും വികലമായി ചിത്രീകരിക്കുന്നത് കേരളം പോലെ സമാധാനപരമായ ഒരു അന്തരീക്ഷമുള്ള ഇടത്ത് വലിയ വിള്ളലുകൾ ഉണ്ടാക്കുമെന്ന് പൊതുവെ വിമർശനം ഉയരുന്നുണ്ട്. മെയ് നാലാം തീയതി തിരഞ്ഞെടുപ്പ് ഫലം വരാനിരിക്കെ ഇത്തരം വിവാദങ്ങൾ രാഷ്ട്രീയ കേന്ദ്രങ്ങളിലും വലിയ ചർച്ചയായിട്ടുണ്ട്.

---------------

Hindusthan Samachar / Roshith K