Enter your Email Address to subscribe to our newsletters
Kolkota, 20 ഏപ്രില് (H.S.)
കൊൽക്കത്ത: പശ്ചിമ ബംഗാൾ നിയമസഭാ തിരഞ്ഞെടുപ്പിന്റെ ആദ്യഘട്ട വോട്ടെടുപ്പിനുള്ള ഒരുക്കങ്ങൾ അന്തിമഘട്ടത്തിൽ. വാശിയേറിയ പരസ്യപ്രചാരണം നാളെ (ചൊവ്വാഴ്ച) വൈകുന്നേരത്തോടെ അവസാനിക്കും. ഭരണകക്ഷിയായ തൃണമൂൽ കോൺഗ്രസും പ്രധാന പ്രതിപക്ഷമായ ബിജെപിയും തമ്മിൽ ഉശിരൻ പോരാട്ടമാണ് നടക്കുന്നത്. കഴിഞ്ഞ തിരഞ്ഞെടുപ്പിൽ തിരിച്ചടി നേരിട്ട ഇടതുപക്ഷവും ഇത്തവണ ശക്തമായ തിരിച്ചുവരവിനുള്ള ശ്രമത്തിലാണ്.
അവസാന ലാപ്പിൽ പ്രമുഖർ:
പ്രചാരണത്തിന്റെ അവസാന മണിക്കൂറുകളിൽ പ്രമുഖ നേതാക്കളുടെ റാലികൾ കൊണ്ട് ബംഗാൾ ഇളകിമറിയുകയാണ്. ബിജെപിക്കായി പ്രധാനമന്ത്രി നരേന്ദ്ര മോദി നേരിട്ടാണ് അവസാനഘട്ട പ്രചാരണം നയിക്കുന്നത്. കേന്ദ്ര ആഭ്യന്തര മന്ത്രി അമിത് ഷാ, യുപി മുഖ്യമന്ത്രി യോഗി ആദിത്യനാഥ് തുടങ്ങിയവരും ബിജെപി പാളയത്തിൽ സജീവമാണ്. ഭരണത്തുടർച്ച ഉറപ്പാക്കാൻ മുഖ്യമന്ത്രി മമതാ ബാനർജി മണ്ഡലങ്ങളിൽ ഓടിനടന്ന് പ്രചാരണം നടത്തുന്നു. വികസനവും ബംഗാളി വികാരവും ഉയർത്തിക്കാട്ടിയാണ് തൃണമൂലിന്റെ നീക്കം.
സിപിഐഎമ്മിന്റെ നിലനിൽപ്പിനായുള്ള പോരാട്ടം:
സംസ്ഥാന നിയമസഭയിൽ നിലവിൽ ഒരൊറ്റ പ്രതിനിധി പോലുമില്ലാത്ത സിപിഐഎമ്മിന് ഇത്തവണത്തെ തിരഞ്ഞെടുപ്പ് നിലനിൽപ്പിന്റെ പ്രശ്നമാണ്. യുവാക്കളെയും പുതുമുഖങ്ങളെയും അണിനിരത്തി നില മെച്ചപ്പെടുത്താനാണ് ഇടതുമുന്നണി ലക്ഷ്യമിടുന്നത്. വനിതാ സംവരണം ഉൾപ്പെടെയുള്ള വിഷയങ്ങൾ ആയുധമാക്കി സ്ത്രീ വോട്ടർമാരെ സ്വാധീനിക്കാനും ഇടതുപക്ഷം ശ്രമിക്കുന്നുണ്ട്.
സുരക്ഷാ സന്നാഹം:
ആദ്യഘട്ട വോട്ടെടുപ്പ് സമാധാനപരമായി നടത്താൻ വിപുലമായ സുരക്ഷാ ക്രമീകരണങ്ങളാണ് തിരഞ്ഞെടുപ്പ് കമ്മീഷൻ ഒരുക്കിയിരിക്കുന്നത്. 150 കമ്പനി കേന്ദ്ര സായുധ പോലീസ് സേനയെ (CAPF) കൂടി അധികമായി വിന്യസിച്ചു. ഇതോടെ ബംഗാളിലാകെ 2,550 കേന്ദ്ര സേനാംഗങ്ങൾ സുരക്ഷാ ചുമതലയിലുണ്ടാകും. പ്രശ്നബാധിത മേഖലകളിൽ നിരീക്ഷണം ശക്തമാക്കാൻ ജമ്മു കശ്മീരിൽ നിന്ന് ബുള്ളറ്റ് പ്രൂഫ് വാഹനങ്ങൾ എത്തിച്ചിട്ടുണ്ട്. തിരഞ്ഞെടുപ്പ് ഉദ്യോഗസ്ഥരുടെയും സേനയുടെയും വിന്യാസം സംബന്ധിച്ച് ഉന്നതതല യോഗം ചേർന്ന് സ്ഥിതിഗതികൾ വിലയിരുത്തി.
സംസ്ഥാനത്തെ കിഴക്കൻ മേഖലകളിൽ പ്രത്യേക സുരക്ഷാ വലയം തീർത്തിട്ടുണ്ട്. ഏപ്രിൽ 23-നാണ് ഒന്നാം ഘട്ട വോട്ടെടുപ്പ് നടക്കുന്നത്. പ്രചാരണം നാളെ അവസാനിക്കുന്നതോടെ സ്ഥാനാർത്ഥികൾ നിശബ്ദ പ്രചാരണത്തിലേക്ക് കടക്കും. ബംഗാളിന്റെ അധികാരം ആർക്കെന്ന് തീരുമാനിക്കുന്ന നിർണ്ണായകമായ ആദ്യഘട്ട വിധിയെഴുത്തിനാണ് രാജ്യം സാക്ഷ്യം വഹിക്കാൻ പോകുന്നത്.
---------------
Hindusthan Samachar / Roshith K
