Kerala, 22 ഏപ്രില് (H.S.)

ന്യൂഡൽഹി: ഡിജിറ്റൽ ഇടപാടുകൾ കൂടുതൽ സുരക്ഷിതവും സുതാര്യവുമാക്കുന്നതിന്റെ ഭാഗമായി ഓട്ടോ ഡെബിറ്റ് (Auto-Debit) നിയമങ്ങളിൽ നിർണ്ണായക മാറ്റങ്ങൾ വരുത്തി റിസർവ് ബാങ്ക് ഓഫ് ഇന്ത്യ. ഉപഭോക്താക്കളുടെ താൽപ്പര്യങ്ങൾ സംരക്ഷിക്കുന്നതിനായി ഡിജിറ്റൽ പേയ്മെന്റ് - ഇ-മാൻഡേറ്റ് ഫ്രെയിംവർക്ക് 2026 എന്ന പേരിലാണ് പുതിയ പരിഷ്കാരങ്ങൾ നടപ്പിലാക്കിയിരിക്കുന്നത്. ഇതോടെ മാസാവസാനം അക്കൗണ്ടിൽ നിന്ന് പണം തനിയെ ഈടാക്കുന്ന രീതിയിൽ കൂടുതൽ നിയന്ത്രണം ഉപഭോക്താക്കൾക്ക് ലഭിക്കും.

പുതിയ നിയമം ബാധകമാകുന്നത് എന്തിനൊക്കെ?

ഒടിടി സബ്സ്ക്രിപ്ഷനുകൾ (നെറ്റ്ഫ്ലിക്സ്, ആമസോൺ പ്രൈം മുതലായവ), ഇൻഷുറൻസ് പ്രീമിയങ്ങൾ, വൈദ്യുതി-വെള്ളം ബില്ലുകൾ, മ്യൂച്വൽ ഫണ്ട് എസ്ഐപികൾ (SIP), വായ്പ തിരിച്ചടവുകൾ (EMI) തുടങ്ങി എല്ലാ ആവർത്തന പേയ്മെന്റുകൾക്കും (Recurring Payments) പുതിയ നിയമം ബാധകമാണ്. കാർഡുകൾ, യുപിഐ, പ്രീപെയ്ഡ് രീതികൾ എന്നിവ വഴി നടത്തുന്ന ഓട്ടോ ഡെബിറ്റുകൾ ഇതിന്റെ പരിധിയിൽ വരും.

പ്രധാന മാറ്റങ്ങൾ താഴെ പറയുന്നവയാണ്:

-

24 മണിക്കൂർ മുൻപ് അറിയിപ്പ്: ഓട്ടോ ഡെബിറ്റ് നടക്കുന്നതിന് ചുരുങ്ങിയത് 24 മണിക്കൂർ മുൻപ് ബാങ്കോ പേയ്മെന്റ് കമ്പനിയോ ഉപഭോക്താവിന് സന്ദേശം അയച്ചിരിക്കണം. കമ്പനിയുടെ പേര്, തുക, ഡെബിറ്റ് ചെയ്യുന്ന തീയതി എന്നിവ ഇതിൽ വ്യക്തമായിരിക്കണം. പണം ഈടാക്കുന്നത് തടയാനോ മാറ്റങ്ങൾ വരുത്താനോ ഇത് ഉപഭോക്താവിനെ സഹായിക്കും.

-

ഒറ്റത്തവണ രജിസ്ട്രേഷൻ: ഏതെങ്കിലും സേവനത്തിന് ഓട്ടോ ഡെബിറ്റ് സൗകര്യം തുടങ്ങുന്നതിന് മുൻപ് ഉപഭോക്താവ് ഒരു തവണ നിർബന്ധമായും രജിസ്റ്റർ ചെയ്യണം. ഇതിനായി അധിക സുരക്ഷാ പരിശോധനകൾ (Additional Factor Authentication) ഉണ്ടാകും. നിങ്ങളുടെ അനുവാദമില്ലാതെ ഒരു ഓട്ടോ ഡെബിറ്റും ഇനി സജീവമാകില്ല.

-

പരിധി ഉയർത്തി: ചെറിയ ഇടപാടുകൾ ലളിതമാക്കാൻ 15,000 രൂപ വരെയുള്ള പണമിടപാടുകൾക്ക് ഇനി മുതൽ ഒടിപി (OTP) ആവശ്യമില്ല. എന്നാൽ ഇൻഷുറൻസ്, മ്യൂച്വൽ ഫണ്ട്, ക്രെഡിറ്റ് കാർഡ് ബില്ലുകൾ എന്നിവയ്ക്ക് ഈ പരിധി ഒരു ലക്ഷം രൂപയായി ഉയർത്തിയിട്ടുണ്ട്.

-

ഇ-മാൻഡേറ്റ് എപ്പോൾ വേണമെങ്കിലും റദ്ദാക്കാം: വരിക്കാർക്ക് തങ്ങളുടെ ഓട്ടോ ഡെബിറ്റ് സൗകര്യം എപ്പോൾ വേണമെങ്കിലും മാറ്റാനോ പൂർണ്ണമായും നിർത്തലാക്കാനോ (Disable) അവകാശമുണ്ട്. അനാവശ്യമായി പണം നഷ്ടപ്പെടുന്നത് തടയാൻ ഇത് ഉപഭോക്താക്കളെ ശാക്തീകരിക്കും.

-

പുതിയ കാർഡ് വന്നാലും തടസ്സമില്ല: പഴയ ഡെബിറ്റ്/ക്രെഡിറ്റ് കാർഡ് മാറി പുതിയത് ലഭിച്ചാൽ വീണ്ടും ഓട്ടോ ഡെബിറ്റ് സെറ്റ് ചെയ്യേണ്ടി വരില്ല. പഴയ കാർഡുമായി ലിങ്ക് ചെയ്തിട്ടുള്ള ഇ-മാൻഡേറ്റുകൾ പുതിയ കാർഡിലേക്ക് സ്വയം മാറുന്ന രീതിയിലാണ് പുതിയ സംവിധാനം ഒരുക്കിയിരിക്കുന്നത്.

ആർക്കൊക്കെ ഇളവ്?

ഫാസ്ടാഗ് (FASTag), നാഷണൽ കോമൺ മൊബിലിറ്റി കാർഡ് (NCMC) എന്നിവയുടെ ഓട്ടോ റീചാർജുകൾക്ക് ഈ പുതിയ നിയമങ്ങൾ ബാധകമല്ല.

ഓൺലൈൻ തട്ടിപ്പുകൾ വർദ്ധിച്ചു വരുന്ന സാഹചര്യത്തിൽ, ഉപഭോക്താക്കളുടെ അക്കൗണ്ടിലെ പണത്തിന്മേൽ അവർക്ക് പൂർണ്ണ നിയന്ത്രണം നൽകുക എന്നതാണ് ആർബിഐയുടെ ലക്ഷ്യം. ഇത് ഡിജിറ്റൽ പേയ്മെന്റ് മേഖലയിൽ കൂടുതൽ വിശ്വാസ്യത വളർത്താൻ സഹായിക്കും. പണം നഷ്ടമാകുന്നതിന് മുൻപ് അറിയിപ്പ് ലഭിക്കുന്നത് സാധാരണക്കാർക്ക് വലിയ ആശ്വാസമാണ് നൽകുന്നത്.

---------------

Hindusthan Samachar / Roshith K