Thiruvananthapuram , 25 ഏപ്രില് (H.S.)

ചെന്നൈ പെരമ്ബൂരിലെ ഇന്റഗ്രല് കോച്ച് ഫാക്ടറി (ഐസിഎഫ്) കൂടുതല് അമൃത് ഭാരത് എക്സ്പ്രസ് ട്രെയിനുകള് നിര്മിക്കും.

ഇക്കാര്യത്തില് റെയില്വെ മന്ത്രാലയത്തിന്റെ അനുമതി ലഭിച്ചു. അഞ്ച് പുതിയ അമൃത് ഭാരത് ട്രെയിനുകളാണ് നിര്മിക്കുക. രാജ്യത്ത് ഇപ്പോള് സര്വീസ് നടത്തുന്നത് 60 അമൃത് ഭാരത് ട്രെയിനുകളാണ്. ഐസിഎഫ് പ്ലാന്റില് 200 ട്രെയിനുകള് നിര്മിക്കണം എന്നാണ് ടാര്ജറ്റ്.

ദക്ഷിണ റെയില്വെക്ക് കീഴിലാണ് പുതിയ അഞ്ച് ട്രെയിനുകള് സര്വീസ് നടത്തുക. രാജ്യത്ത് ഏറ്റവും കൂടുതല് ടിക്കറ്റ് വരുമാനമുള്ള മേഖലയാണിത്. ഓരോ വര്ഷവും യാത്രക്കാരുടെ എണ്ണത്തില് വലിയ വര്ധനവാണ് ദക്ഷിണ റെയില്വെക്ക് കീഴിലുള്ളത്. അതുകൊണ്ടാണ് അമൃത് ഭാരത് എക്സ്പ്രസ് കൂടുതലായി ഇറക്കുന്നത്. ഇതില് കേരളത്തിലേക്കും ട്രെയിന് പ്രതീക്ഷിക്കുന്നുണ്ട്.

വന്ദേഭാരത് എക്സ്പ്രസ് ട്രെയിനുകളും ഐസിഎഫ് നിര്മിക്കുന്നുണ്ട്. അതിനൊപ്പമാണ് അമൃത് ഭാരത് എക്സ്പ്രസും നിര്മിക്കുന്നത്. വന്ദേഭാരത് എക്സ്പ്രസിന് സമാനമായ സൗകര്യങ്ങളുള്ള ട്രെയിനാണ് അമൃത് ഭാരത്. എന്നാല് ട്രെയിന് ടിക്കറ്റ് നിരക്കില് മാറ്റമുണ്ട്. വേഗതയിലും സുരക്ഷയിലും അമൃത് ഭാരത് എക്സ്പ്രസ് വന്ദേഭാരതിനോട് കിടപിടിക്കും.

അമൃത ഭാരത് എക്സ്പ്രസ് ട്രെയിനുകളുടെ പ്രത്യേക അറിയാം

ഇന്ത്യന് റെയില്വേയുടെ പുതിയ നോണ്-എസി സൂപ്പര്ഫാസ്റ്റ് ട്രെയിനാണ് അമൃത് ഭാരത് എക്സ്പ്രസ്. ദീര്ഘദൂര യാത്രക്കാര്ക്ക് താങ്ങാനാവുന്ന നിരക്കില് മെച്ചപ്പെട്ട സൗകര്യങ്ങള് ഒരുക്കുക എന്നതാണ് ഈ ട്രെയിന് ലക്ഷ്യമിടുന്നത്. ആധുനിക രീതിയില് പുനര്രൂപകല്പ്പന ചെയ്ത സീറ്റുകള്, കൂടുതല് ലഗേജ് സൗകര്യം, അധിക ചാര്ജിംഗ് പോയിന്റുകള്, മികച്ച വെളിച്ചം, നവീകരിച്ച ടോയ്ലറ്റുകള്, സിസിടിവി നിരീക്ഷണം, ഒരു പാന്ട്രി കാര് എന്നിവ ഇതില് ഉള്പ്പെടുന്നു.

സുഗമമായ യാത്രാനുഭവത്തിനായി ഒരു പുഷ്-പുള് ലോക്കോമോട്ടീവ് സംവിധാനമാണ് അമൃത് ഭാരത് എക്സ്പ്രസിനുള്ളത്. പഴയ ട്രെയിനുകളെ അപേക്ഷിച്ച് മികച്ച എര്ഗണോമിക്സും സുരക്ഷയും പ്രദാനം ചെയ്യുന്ന സ്ലീപ്പര്, അണ്റിസര്വ്ഡ് കോച്ചുകളാണ് ഇതിലുള്ളത്. ജനറല് കോച്ചുകളില് വാതിലിന് സമീപം നില്ക്കാന് കൂടുതല് ഇടമുണ്ട്. ഭിന്നശേഷിക്കാര്ക്കും സ്ത്രീകള്ക്കുമായി പ്രത്യേക സ്ഥലങ്ങളും ട്രെയിനില് ഒരുക്കിയിട്ടുണ്ട്. ഓരോ സ്ലീപ്പര് യാത്രക്കാരനും ഒരു ചാര്ജിംഗ് പോയിന്റ് ലഭിക്കും. പുതിയ റേക്കുകളില് ഫോണുകള്ക്കായി യുഎസ്ബി ടൈപ്പ്-എ, ടൈപ്പ്-സി സോക്കറ്റുകള് ലഭ്യമാണ്.

നിരക്ക് കുറഞ്ഞതും നോണ്-എസി കോച്ചുകളുമുള്ള ഒരു സാധാരണ എക്സ്പ്രസ് ട്രെയിന് വിഭാഗത്തിലാണ് അമൃത് ഭാരത് വരുന്നത്. വന്ദേ ഭാരത് എക്സ്പ്രസ് പൂര്ണ്ണമായും എസി ചെയര് കാര് ആണെങ്കില്, അമൃത് ഭാരത് പ്രധാനമായും നോണ്-എസി സ്ലീപ്പര്, ജനറല് കോച്ചുകളാണ് ഉപയോഗിക്കുന്നത്.

ടിക്കറ്റ് നിരക്കിലും കാര്യമായ വ്യത്യാസമുണ്ട്; അമൃത് ഭാരത് എക്സ്പ്രസിന് മെയില്/എക്സ്പ്രസ് ട്രെയിനുകളോട് അടുത്ത നിരക്കാണുള്ളത്, അതേസമയം വന്ദേ ഭാരതിന് പ്രീമിയം നിരക്കാണ് ഈടാക്കുന്നത്. മെച്ചപ്പെട്ട ടോയ്ലറ്റ് സംവിധാനങ്ങളാണ് കോച്ചുകളില് ഉള്പ്പെടുത്തിയിരിക്കുന്നത്. അമൃത് ഭാരത് എക്സ്പ്രസ് 3.0 പതിപ്പില് എസി കോച്ചുകളും പുതിയ ഇന്റീരിയറുകളും അവതരിപ്പിക്കാന് പദ്ധതിയുണ്ട്.

---------------

Hindusthan Samachar / CHANDHU CHANDRASEKHAR