Kolkatha, 25 ഏപ്രില്‍ (H.S.)

കൊൽക്കത്ത: പശ്ചിമ ബംഗാളിലെ പൊതുവിതരണ സംവിധാനവുമായി (പിഡിഎസ്) ബന്ധപ്പെട്ട വൻ അഴിമതിക്കേസിൽ എൻഫോഴ്സ്മെൻ്റ് ഡയറക്ടറേറ്റിൻ്റെ (ഇഡി) വ്യാപക പരിശോധന. കള്ളപ്പണം വെളുപ്പിക്കൽ നിരോധന നിയമപ്രകാരം (പിഎംഎൽഎ - 2002) ഇന്ന് പുലർച്ചെയാണ് സംസ്ഥാനത്തെ ഒമ്പത് കേന്ദ്രങ്ങളിൽ ഉദ്യോഗസ്ഥർ ഒരേസമയം റെയ്ഡ് ആരംഭിച്ചത്.

ജനങ്ങളുടെ ക്ഷേമപദ്ധതികൾക്കായി വിതരണം ചെയ്യേണ്ടിയിരുന്ന ഗോതമ്പ് വൻതോതിൽ വകമാറ്റി വിറ്റ് സാമ്പത്തിക തട്ടിപ്പ് നടത്തിയെന്ന കേസിലാണ് സുപ്രധാന നടപടിയുണ്ടായിരിക്കുന്നത്. കേസിലെ പ്രധാന ആരോപണവിധേയരായ നീരജൻ ചന്ദ്ര സാഹയുമായി ബന്ധമുള്ള വിതരണക്കാരുടെയും കയറ്റുമതിക്കാരുടെയും സ്ഥാപനങ്ങളിലുമാണ് പ്രധാനമായും പരിശോധന നടക്കുന്നത്.

കൊൽക്കത്ത, ബർദ്വാൻ, നോർത്ത് 24 പർഗാനാസിലെ ഹബ്ര എന്നിവിടങ്ങളിലായി വ്യാപിച്ചുകിടക്കുന്ന ഒമ്പത് ഇടങ്ങളിലാണ് റെയ്ഡ് പുരോഗമിക്കുന്നത്. നോർത്ത് 24 പർഗാനാസിൽ സുശാന്തോ സാഹയുടെ വസതി, അദ്ദേഹത്തിൻ്റെ ഉടമസ്ഥതയിലുള്ള സാഗർ എൻ്റർപ്രൈസസ് എന്ന സ്ഥാപനം, ഹബ്രയിലെ സമീർ കുമാർ ചന്ദ്രയുടെയും പാർത്ഥ സാഹയുടെയും നേരിട്ടുള്ള നിയന്ത്രണത്തിലുള്ള ആദർശ ഇൻ്റർനാഷണൽ എന്നിവിടങ്ങളിൽ ഉദ്യോഗസ്ഥർ വിശദമായി പരിശോധന നടത്തി.

കൂടാതെ ബർദ്വാനിൽ പ്രവർത്തിക്കുന്ന മാ അന്നപൂർണ റൈസ് കൺസേൺ, സൈനാക്സ് അന്നപൂർണ ഉദ്യോഗ് പ്രൈവറ്റ് ലിമിറ്റഡ്, കാഞ്ചൻ സോമിൻ്റെ സ്ഥാപനങ്ങൾ, നോർത്ത്പാറയിലെ ദൗലത് റാം ഗുപ്തയുടെ കേന്ദ്രങ്ങൾ എന്നിവയും എൻഫോഴ്സ്മെൻ്റ് ഡയറക്ടറേറ്റിൻ്റെ കർശന പരിശോധനാ പരിധിയിലുണ്ട്. ഇഡിയുടെ കൊൽക്കത്ത സോണൽ ഓഫിസിൻ്റെ നേരിട്ടുള്ള നേതൃത്വത്തിലാണ് നടപടികൾ പുരോഗമിക്കുന്നത്.

ബസിർഹട്ട് പൊലീസ് സ്റ്റേഷനിൽ പശ്ചിമ ബംഗാൾ പൊലീസ് 2020 ഒക്ടോബർ 23ന് രജിസ്റ്റർ ചെയ്ത പ്രാഥമിക വിവര റിപ്പോർട്ടിൻ്റെ (എഫ്ഐആർ) അടിസ്ഥാനത്തിലാണ് എൻഫോഴ്സ്മെൻ്റ് ഡയറക്ടറേറ്റ് ഈ കേസിൽ വിശദമായ അന്വേഷണം ആരംഭിച്ചത്.

---------------

Hindusthan Samachar / Sreejith S