Thiruvananthapuram, 26 ഏപ്രില് (H.S.)

ഇന്ത്യയുടെ ജനാധിപത്യ ഉത്സവം ലോകം ഉറ്റുനോക്കുന്നുവെന്ന് തെരഞ്ഞെടുപ്പ് കമ്മീഷൻ.

വിപുലമായ ക്രമീകരണങ്ങൾ മുതൽ റെക്കോർഡ് പങ്കാളിത്തം വരെ: തമിഴ്നാട്, പശ്ചിമ ബംഗാൾ നിയമസഭാ തിരഞ്ഞെടുപ്പുകൾ അന്താരാഷ്ട്ര പ്രതിനിധികളെ ആകർഷിക്കുന്നതായും തെരഞ്ഞെടുപ്പ്ക മ്മീഷൻ വ്യക്തമാക്കി

1. ഇന്ത്യൻ തിരഞ്ഞെടുപ്പ് കമ്മീഷന്റെ (ECI) ഇന്റർനാഷണൽ ഇലക്ഷൻ വിസിറ്റേഴ്സ് പ്രോഗ്രാമിന്റെ (IEVP) ഭാഗമായി, തമിഴ്നാട്ടിലെയും പശ്ചിമ ബംഗാളിലെയും (ഒന്നാം ഘട്ടം) നിയമസഭാ തിരഞ്ഞെടുപ്പുകൾ ആഗോള ശ്രദ്ധയാകർഷിച്ചു. 16 രാജ്യങ്ങളിൽ നിന്നുള്ള 32 അന്താരാഷ്ട്ര പ്രതിനിധികളും ഇന്റർനാഷണൽ ഐഡിയയും (International IDEA) ഇന്ത്യയുടെ തിരഞ്ഞെടുപ്പ് പ്രക്രിയയുടെ വ്യാപ്തിയും കൃത്യതയും ഊർജ്ജസ്വലതയും നേരിട്ട് വിലയിരുത്തി.

2. ഈ അനുഭവത്തെ ജനാധിപത്യത്തിന്റെ യഥാർത്ഥ ഉത്സവം എന്ന് വിശേഷിപ്പിച്ച പ്രതിനിധികൾ, വോട്ടർമാരുടെ റെക്കോർഡ് പങ്കാളിത്തത്തെയും തിരഞ്ഞെടുപ്പ് കമ്മീഷന്റെ സൂക്ഷ്മമായ ആസൂത്രണത്തെയും തിരഞ്ഞെടുപ്പ് സുഗമമായി നടത്തുന്നതിനെയും അഭിനന്ദിച്ചു. ചെന്നൈയിലെ ഒരു പോളിംഗ് സ്റ്റേഷൻ സന്ദർശിച്ച ശേഷം മൗറീഷ്യസ് ഹൈക്കമ്മീഷണർ എച്ച്.ഇ. മിസിസ് ശൈലഭായ് ബാപ്പൂ പറഞ്ഞു: തിരഞ്ഞെടുപ്പ് എങ്ങനെ നടത്തണം എന്നതിനെക്കുറിച്ചുള്ള അനുഭവവും നടപടിക്രമങ്ങളും അറിവും ഇന്ത്യ ലോകത്തിന് മുഴുവൻ പകർന്നുനൽകുന്നു. വോട്ടിനെ വോട്ടറിലേക്ക് എത്തിക്കുക എന്നതാണ് യഥാർത്ഥ ജനാധിപത്യം.

3. അന്താരാഷ്ട്ര പ്രതിനിധികൾ ഏപ്രിൽ 22-23 തീയതികളിൽ തമിഴ്നാട്ടിലും പശ്ചിമ ബംഗാളിലും സന്ദർശനം നടത്തി. തിരഞ്ഞെടുപ്പ് സാമഗ്രികളുടെ വിതരണ കേന്ദ്രങ്ങളിൽ എത്തിയ അവർ, കൃത്യമായ പ്ലാനിംഗിലൂടെയും സ്റ്റാൻഡേർഡ് ഓപ്പറേറ്റിംഗ് നടപടിക്രമങ്ങളിലൂടെയും പോളിംഗ് ഉദ്യോഗസ്ഥരെയും സാമഗ്രികളെയും നീക്കുന്ന രീതി നിരീക്ഷിച്ചു. വിതരണ കേന്ദ്രത്തിലെ സജീവമായ സാഹചര്യം എന്നെ അത്ഭുതപ്പെടുത്തി... പോളിംഗ് ഓഫീസർമാർക്ക് കൺട്രോൾ യൂണിറ്റ് (CU), ബാലറ്റ് യൂണിറ്റ് (BU), വിവിപാറ്റ് (VVPAT) എന്നിങ്ങനെ മൂന്ന് ഭാഗങ്ങളുള്ള ഇവിഎം മെഷീനുകൾ ലഭിക്കുന്നത് ഞാൻ കണ്ടു. ഇത് വളരെ സുതാര്യവും ക്രമബദ്ധവുമായ ഒരു അനുഭവമായിരുന്നു. ഫിലിപ്പൈൻസിൽ നിന്നുള്ള മിസ് മെലിസ ആനി എം. ടെലൻ സിലിഗുഡിയിൽ പറഞ്ഞു.

4. പ്രതിനിധികൾ തമിഴ്നാട് ചീഫ് ഇലക്ടറൽ ഓഫീസറുമായും പശ്ചിമ ബംഗാളിലെ ഡാർജിലിംഗ് ജില്ലയിലെ മുതിർന്ന തിരഞ്ഞെടുപ്പ് ഉദ്യോഗസ്ഥരുമായും ആശയവിനിമയം നടത്തി. സമാധാനപരവും സുഗമവുമായ തിരഞ്ഞെടുപ്പ് ഉറപ്പാക്കാൻ ഏർപ്പെടുത്തിയിട്ടുള്ള സുരക്ഷാ ക്രമീകരണങ്ങളെക്കുറിച്ച് അവരെ ബോധ്യപ്പെടുത്തി. മുതിർന്ന വോട്ടർമാർക്കും ഭിന്നശേഷിക്കാർക്കും (PwDs) ഏർപ്പെടുത്തിയ 'ഹോം വോട്ടിംഗ്' (വീട്ടിലിരുന്ന് വോട്ട് ചെയ്യാനുള്ള സൗകര്യം) സംവിധാനത്തെ പ്രതിനിധികൾ പ്രത്യേകം പ്രശംസിച്ചു.

5. പോളിംഗ് സ്റ്റേഷനുകളിലെ 100% വെബ്കാസ്റ്റിംഗ് നിരീക്ഷിക്കുന്നതിനായി സജ്ജീകരിച്ച മീഡിയ/വെബ്കാസ്റ്റിംഗ് കൺട്രോൾ റൂമുകളും പ്രതിനിധികൾ സന്ദർശിച്ചു. സുതാര്യത ഉറപ്പാക്കുന്നതിനുള്ള പ്രധാന നടപടിയായി ഇതിനെ അവർ വിശേഷിപ്പിച്ചു.

6. വോട്ടെടുപ്പ് ദിവസം രാവിലെ മോക്ക് പോളിംഗ് (Mock Poll) നിരീക്ഷിച്ച പ്രതിനിധികൾ, തുടർന്ന് ചെന്നൈ (തമിഴ്നാട്), സിലിഗുഡി, കുർസിയോങ് (പശ്ചിമ ബംഗാൾ) എന്നിവിടങ്ങളിലെ വിവിധ പോളിംഗ് സ്റ്റേഷനുകൾ സന്ദർശിച്ച് യഥാർത്ഥ വോട്ടിംഗ് പ്രക്രിയയ്ക്ക് സാക്ഷ്യം വഹിച്ചു.

7. പോളിംഗ് സ്റ്റേഷനുകളിലെ റാംപുകൾ, വീൽചെയറുകൾ, സന്നദ്ധപ്രവർത്തകർ, ക്രഷ് (Creche) സൗകര്യങ്ങൾ എന്നിവയും സ്ത്രീകൾക്കും ഭിന്നശേഷിക്കാർക്കുമായി പ്രത്യേകം സജ്ജീകരിച്ച പോളിംഗ് സ്റ്റേഷനുകളെയും അവർ അഭിനന്ദിച്ചു. ഞങ്ങൾ പോളിംഗ് സ്റ്റേഷനുകൾ നിരീക്ഷിച്ചു; എല്ലാ ക്രമീകരണങ്ങളും വളരെ മികച്ചതാണ്, നേപ്പാളിൽ നിന്നുള്ള പ്രതിനിധി മിസ്റ്റർ യജ്ഞപ്രസാദ് ഭട്ടറായി സിലിഗുഡിയിൽ അഭിപ്രായപ്പെട്ടു.

8. തമിഴ്നാട്ടിൽ, ഉറപ്പായ മിനിമം സൗകര്യങ്ങളെയും ചെന്നൈയിലെ കളർ കോഡ് ചെയ്ത പോളിംഗ് ബൂത്തുകളെയും പ്രതിനിധികൾ ഏറെ പ്രശംസിച്ചു.

ചെന്നൈയിലെ ഒരു പോളിംഗ് സ്റ്റേഷനിൽ വെച്ച് ഭൂട്ടാനിൽ നിന്നുള്ള പ്രതിനിധി മിസ്റ്റർ ഷെറിംഗ് സംദ്രൂപ് പറഞ്ഞു: തിരഞ്ഞെടുപ്പ് കമ്മീഷനും ജില്ലാ തിരഞ്ഞെടുപ്പ് ഓഫീസറും വോട്ടർമാർക്കായി ഒരുക്കിയിട്ടുള്ള 'അഷ്വേർഡ് മിനിമം ഫെസിലിറ്റീസ്' (ഉറപ്പായ മിനിമം സൗകര്യങ്ങൾ) ആണ് ഞാൻ പഠിച്ച ഏറ്റവും പ്രധാനപ്പെട്ട കാര്യം.. പ്രത്യേകിച്ചും ഹെൽപ്പ് ഡെസ്കും കളർ കോഡിംഗും. പശ്ചിമ ബംഗാളിൽ, പോളിംഗ് സ്റ്റേഷനുകളിലെ ആരോഗ്യ പരിശോധനാ സൗകര്യങ്ങളെയും വോട്ടർമാരുടെ സൗകര്യം വർദ്ധിപ്പിക്കുന്നതിനായി തിരഞ്ഞെടുപ്പ് കമ്മീഷൻ പുതുതായി നടപ്പിലാക്കിയ മൊബൈൽ ഡെപ്പോസിറ്റ് സൗകര്യം പോലുള്ള നടപടികളെയും പ്രതിനിധികൾ അഭിനന്ദിച്ചു. സിലിഗുഡിയിലെ പോളിംഗ് സ്റ്റേഷനിൽ കെനിയയിൽ നിന്നുള്ള മിസ് റൂത്ത് ഖാതീവി കുലുണ്ടു പറഞ്ഞു: മൊബൈൽ ഹോൾഡർ പോക്കറ്റുകൾ കണ്ട് ഞാൻ അത്ഭുതപ്പെട്ടു. വോട്ടർമാരെ പോളിംഗ് ബൂത്തിനകത്തേക്ക് മൊബൈൽ ഫോണുകൾ കൊണ്ടുപോകാൻ അനുവദിക്കില്ല, എന്നാൽ വോട്ടിന്റെ രഹസ്യാത്മകത സൂക്ഷിച്ചുകൊണ്ട് തന്നെ അവ പോക്കറ്റുകളിൽ നിക്ഷേപിക്കാനും പിന്നീട് തിരികെ വാങ്ങാനും സാധിക്കുന്നു. മുതിർന്നവർക്കും ഭിന്നശേഷിക്കാർക്കും വേണ്ടിയുള്ള വിശ്രമ കേന്ദ്രങ്ങളും ഏറെ പ്രശംസനീയമാണ്.

9. വോട്ടെടുപ്പിന്റെ സുഗമമായ നടത്തിപ്പിനെയും ഉയർന്ന വോട്ട് രേഖപ്പെടുത്തലിനെയും സന്ദർശക സംഘങ്ങൾ അഭിനന്ദിച്ചു. തിരഞ്ഞെടുപ്പ് മാനേജ്മെന്റിന്റെ വ്യാപ്തിക്കും പ്രൗഢിക്കും സാക്ഷ്യം വഹിക്കാൻ അവസരം നൽകിയതിന് അവർ തിരഞ്ഞെടുപ്പ് കമ്മീഷനോട് നന്ദി രേഖപ്പെടുത്തി. സുതാര്യത, എല്ലാവരെയും ഉൾക്കൊള്ളുന്ന സ്വഭാവം, മികവ് എന്നിവയോടുള്ള കമ്മീഷന്റെ പ്രതിബദ്ധതയെ അവർ പ്രശംസിച്ചു.

10. നേരത്തെ, ഏപ്രിൽ 8-9 തീയതികളിൽ 22 രാജ്യങ്ങളിൽ നിന്നുള്ള 38 പ്രതിനിധികൾ അസം, കേരളം, പുതുച്ചേരി എന്നിവ സന്ദർശിച്ചിരുന്നു. ഇതോടെ, IEVP 2026-ന്റെ ഭാഗമായി 38 രാജ്യങ്ങളിൽ നിന്നും അന്താരാഷ്ട്ര ഐഡിയയിൽ നിന്നുമായി ആകെ 70 പ്രതിനിധികൾ തിരഞ്ഞെടുപ്പ് നടക്കുന്ന 5 സംസ്ഥാനങ്ങൾ/കേന്ദ്രഭരണ പ്രദേശങ്ങൾ സന്ദർശിച്ചു. ലോകം കണ്ട് പഠിക്കാൻ ശ്രമിക്കുമ്പോൾ, സമാനതകളില്ലാത്ത രീതിയിലും റെക്കോർഡ് പങ്കാളിത്തത്തോടും കൂടി തിരഞ്ഞെടുപ്പ് നടത്തുന്നതിൽ ഇന്ത്യ പുതിയ മാനദണ്ഡങ്ങൾ സൃഷ്ടിക്കുകയാണ്; ഇത് യഥാർത്ഥത്തിൽ ഒരു ജനാധിപത്യ ഉത്സവമാണ്.

11. തിരഞ്ഞെടുപ്പ് മാനേജ്മെന്റ് ബോഡികളുമായും (EMBs) അന്താരാഷ്ട്ര സംഘടനകളുമായും സഹകരണം വർദ്ധിപ്പിക്കുന്നതിനായി തിരഞ്ഞെടുപ്പ് കമ്മീഷൻ നടപ്പിലാക്കുന്ന ഒരു മുൻനിര പദ്ധതിയാണ് IEVP. ഇന്ത്യയുടെ തിരഞ്ഞെടുപ്പ് ഘടന, സ്ഥാപന സംവിധാനങ്ങൾ, പ്രവർത്തന രീതികൾ എന്നിവയെക്കുറിച്ച് സമഗ്രമായ അറിവ് നൽകുന്നതിനൊപ്പം തിരഞ്ഞെടുപ്പ് മാനേജ്മെന്റിലെ മികച്ച മാതൃകകളും നവീന ആശയങ്ങളും പ്രതിനിധികൾക്ക് പരിചയപ്പെടുത്തിക്കൊടുക്കാനും ഈ പ്രോഗ്രാം സഹായിക്കുന്നു.

---------------

Hindusthan Samachar / CHANDHU CHANDRASEKHAR