Newdelhi , 27 ഏപ്രില് (H.S.)

ന്യൂഡൽഹി: ഡൽഹി മദ്യനയ അഴിമതിക്കേസുമായി ബന്ധപ്പെട്ട നിയമനടപടികളിൽ നിർണ്ണായക നീക്കവുമായി മുൻ മുഖ്യമന്ത്രി അരവിന്ദ് കെജ്രിവാൾ. കേസ് പരിഗണിക്കുന്ന ജസ്റ്റിസ് സ്വർണ്ണകാന്ത ശർമ്മയുടെ കോടതിയിൽ താനോ തന്റെ അഭിഭാഷകരോ ഇനി ഹാജരാകില്ലെന്ന് കെജ്രിവാൾ വ്യക്തമാക്കി. കോടതിയുടെ നിഷ്പക്ഷതയിൽ തനിക്ക് വിശ്വാസം നഷ്ടപ്പെട്ടുവെന്നും നീതി ലഭിക്കുമെന്ന് പ്രതീക്ഷിക്കുന്നില്ലെന്നും ചൂണ്ടിക്കാട്ടി അദ്ദേഹം ജഡ്ജിക്ക് കത്തയച്ചു.

സത്യാഗ്രഹത്തിന്റെ പാതയിലേക്ക്

തന്റെ മനഃസാക്ഷിയുടെ വിളി കേട്ടാണ് ഇത്തരമൊരു തീരുമാനമെടുത്തതെന്ന് കെജ്രിവാൾ കത്തിൽ പറയുന്നു. ജസ്റ്റിസ് സ്വർണ്ണകാന്ത ശർമ്മയിൽ നിന്നും എനിക്ക് നീതി ലഭിക്കുമെന്ന പ്രതീക്ഷ അസ്തമിച്ചിരിക്കുന്നു. അതുകൊണ്ട് തന്നെ മഹാത്മാഗാന്ധിയുടെ സത്യാഗ്രഹത്തിന്റെ പാത പിന്തുടരാൻ ഞാൻ തീരുമാനിച്ചു, അദ്ദേഹം വ്യക്തമാക്കി. കോടതി നടപടികളിൽ നിന്ന് വിട്ടുനിൽക്കുന്നത് ഒരു പ്രതിഷേധ രൂപമായാണ് അദ്ദേഹം കാണുന്നത്. എന്നാൽ, ഹൈക്കോടതിയുടെ ഈ തീരുമാനത്തിനെതിരെ സുപ്രീം കോടതിയെ സമീപിക്കാനുള്ള സാധ്യതകൾ അദ്ദേഹം തുറന്നിട്ടിട്ടുണ്ട്.

പിന്മാറില്ലെന്ന് കോടതി

നേരത്തെ, ജസ്റ്റിസ് സ്വർണ്ണകാന്ത ശർമ്മ കേസ് കേൾക്കുന്നതിൽ നിന്ന് പിന്മാറണമെന്ന് (Recusal) കെജ്രിവാളും മറ്റ് പ്രതികളും ആവശ്യപ്പെട്ടിരുന്നു. എന്നാൽ ഈ ഹർജി ഹൈക്കോടതി തള്ളി. കെജ്രിവാളിന്റെ ആരോപണങ്ങൾ തെളിവുകളുടെ പിൻബലമില്ലാത്തതാണെന്നും വെറും സംശയത്തിന്റെ പേരിൽ ജഡ്ജിക്ക് പിന്മാറാൻ കഴിയില്ലെന്നും കോടതി വ്യക്തമാക്കി.

വിധി പ്രസ്താവിക്കവെ വികാരാധീനയായാണ് ജസ്റ്റിസ് ശർമ്മ പ്രതികരിച്ചത്. ഭാരതത്തിന്റെ ഭരണഘടന തൊട്ട് സത്യപ്രതിജ്ഞ ചെയ്ത ഒരു ജഡ്ജി എന്ന നിലയിൽ എന്റെ നിശബ്ദത പോലും പരീക്ഷിക്കപ്പെടുകയായിരുന്നു. ജഡ്ജിയുടെയും ഈ സ്ഥാപനത്തിന്റെയും നിഷ്പക്ഷതയാണ് ഇവിടെ ചോദ്യം ചെയ്യപ്പെടുന്നത്, അവർ പറഞ്ഞു.

'ക്യാച്ച്-22' സാഹചര്യം

നിലവിലെ സാഹചര്യത്തെ 'ക്യാച്ച്-22' (ഒഴിവാക്കാൻ കഴിയാത്ത കുഴപ്പങ്ങൾ) എന്നാണ് ജഡ്ജി വിശേഷിപ്പിച്ചത്. താൻ കേസിൽ നിന്ന് പിന്മാറിയാൽ അത് ആരോപണങ്ങളിൽ കഴമ്പുണ്ടെന്ന് വരുത്തിത്തീർക്കും, പിന്മാറിയില്ലെങ്കിൽ അത് കൂടുതൽ വിമർശനങ്ങൾക്കും പക്ഷപാത ആരോപണങ്ങൾക്കും വഴിതുറക്കും. ഹർജിക്കാരൻ തനിക്ക് അനുകൂലമായ ഒരു സാഹചര്യം ഇതിലൂടെ സൃഷ്ടിച്ചെടുത്തിരിക്കുകയാണെന്നും കോടതി നിരീക്ഷിച്ചു.

നീതിന്യായ വ്യവസ്ഥയിൽ വ്യക്തിപരമായ താൽപ്പര്യങ്ങൾക്കോ ഊഹാപോഹങ്ങൾക്കോ സ്ഥാനമില്ലെന്നും വസ്തുതകളുടെയും നിയമത്തിന്റെയും അടിസ്ഥാനത്തിൽ മാത്രമേ തീരുമാനങ്ങൾ എടുക്കാൻ കഴിയൂ എന്നും കോടതി ഓർമ്മിപ്പിച്ചു. ഒരു കക്ഷിയുടെ ഭയമോ മുൻവിധിയോ കണക്കിലെടുത്ത് ജഡ്ജിമാർ പിന്മാറാൻ തുടങ്ങിയാൽ അത് തെറ്റായ കീഴ്വഴക്കം സൃഷ്ടിക്കുമെന്നും ഹൈക്കോടതി വിധിയിൽ വ്യക്തമാക്കി.

മദ്യനയക്കേസിൽ അന്വേഷണം നേരിടുന്ന ആം ആദ്മി പാർട്ടിക്ക് വലിയ രാഷ്ട്രീയ പ്രത്യാഘാതങ്ങൾ ഉണ്ടാക്കുന്നതാണ് കെജ്രിവാളിന്റെ ഈ പുതിയ നീക്കം. കോടതിയുടെ തീരുമാനത്തെ വെല്ലുവിളിച്ചുകൊണ്ട് സത്യാഗ്രഹ പാത സ്വീകരിക്കുന്നതിലൂടെ ജനശ്രദ്ധയാകർഷിക്കാനാണ് അദ്ദേഹം ശ്രമിക്കുന്നത്. വരും ദിവസങ്ങളിൽ സുപ്രീം കോടതിയിൽ നിന്ന് കെജ്രിവാളിന് ആശ്വാസം ലഭിക്കുമോ എന്നാണ് രാഷ്ട്രീയ കേന്ദ്രങ്ങൾ ഉറ്റുനോക്കുന്നത്.

---------------

Hindusthan Samachar / Roshith K