Newdelhi , 06 ഏപ്രില് (H.S.)

ന്യൂഡൽഹി: വയനാടിനെയും കോഴിക്കോടിനെയും ബന്ധിപ്പിക്കുന്ന ഇരട്ടത്തുരങ്ക പാത പദ്ധതിക്ക് (Wayanad Tunnel Project) ലഭിച്ച പരിസ്ഥിതി അനുമതി ചോദ്യം ചെയ്തുകൊണ്ടുള്ള ഹർജി സുപ്രീം കോടതി തള്ളി. പദ്ധതിക്ക് ദേശീയ പ്രാധാന്യമുണ്ടെന്ന് നിരീക്ഷിച്ച കോടതി, ഹൈക്കോടതിയുടെ മുൻപത്തെ ഉത്തരവിൽ ഇടപെടാൻ വിസമ്മതിച്ചു. ചീഫ് ജസ്റ്റിസ് സൂര്യകാന്ത്, ജസ്റ്റിസ് ജോയ്മാല്യ ബാഗ്ചി എന്നിവരടങ്ങിയ ബെഞ്ചാണ് ഈ സുപ്രധാന വിധി പുറപ്പെടുവിച്ചത്.

പദ്ധതി നടപ്പിലാക്കുന്നതിൽ എന്തെങ്കിലും വീഴ്ചയോ പരിസ്ഥിതി നിയമങ്ങളുടെ ലംഘനമോ ഉണ്ടായാൽ ഹർജിക്കാർക്ക് നാഷണൽ ഗ്രീൻ ട്രൈബ്യൂണലിനെ (NGT) സമീപിക്കാമെന്നും കോടതി വ്യക്തമാക്കി.

കോടതിയുടെ നിരീക്ഷണം

കേരളത്തിലെ ഭൂമി ലഭ്യതയുടെ പരിമിതികൾ കണക്കിലെടുത്ത് തുരങ്കപാത പോലുള്ള പദ്ധതിയല്ലാതെ മറ്റ് പോംവഴികൾ സംസ്ഥാനത്തിന് മുന്നിലില്ലെന്ന് ചീഫ് ജസ്റ്റിസ് സൂര്യകാന്ത് ചൂണ്ടിക്കാട്ടി. ശാസ്ത്രജ്ഞരും എൻജിനീയർമാരും ഇത്തരം കാര്യങ്ങളിൽ വിദഗ്ധരാണ്. അവർ എല്ലാ വശങ്ങളും പരിശോധിച്ചാണ് തീരുമാനമെടുക്കുന്നത്. കൃത്യമായ നിബന്ധനകളോടെയാണ് അനുമതി നൽകിയിരിക്കുന്നത്. ഇവ പാലിക്കപ്പെടുന്നുണ്ടോ എന്ന് നിരീക്ഷിക്കാൻ സംവിധാനങ്ങളുണ്ട്, കോടതി പറഞ്ഞു. വന്യജീവികളെ സംരക്ഷിക്കാനും ഗതാഗതക്കുരുക്ക് കുറയ്ക്കാനും ഏറ്റവും മികച്ച മാർഗ്ഗം തുരങ്കപാതകളാണെന്നും കോടതി നിരീക്ഷിച്ചു.

ഹർജിക്കാരുടെ വാദം

വയനാട് പ്രകൃതി സംരക്ഷണ സമിതിക്ക് വേണ്ടി ഹാജരായ മുതിർന്ന അഭിഭാഷകൻ ശ്യാം ദിവാൻ, പ്രദേശം അതീവ പരിസ്ഥിതി ലോലമാണെന്നും ഉരുൾപൊട്ടൽ സാധ്യതയുള്ള ഇടമാണെന്നും വാദിച്ചു. 2024-ലുണ്ടായ വലിയ ഉരുൾപൊട്ടലും അതിന്റെ പ്രത്യാഘാതങ്ങളും അദ്ദേഹം കോടതിയുടെ ശ്രദ്ധയിൽപ്പെടുത്തി. പരിസ്ഥിതി ആഘാത പഠനം സംസ്ഥാന തലത്തിന് പകരം കേന്ദ്ര തലത്തിൽ നടത്തേണ്ടതായിരുന്നുവെന്നും അദ്ദേഹം വാദിച്ചു. എന്നാൽ, സാങ്കേതിക വിദഗ്ധർ പരിശോധിച്ചു നൽകിയ റിപ്പോർട്ടുകളെയും അനുമതികളെയും അവിശ്വസിക്കാൻ കാരണങ്ങളില്ലെന്ന് കോടതി മറുപടി നൽകി.

പദ്ധതിയുടെ പ്രാധാന്യം

നിലവിൽ കോഴിക്കോട് നിന്നും വയനാട്ടിലേക്ക് എത്താൻ താമരശ്ശേരി ചുരം ഉൾപ്പെടെയുള്ള മലയോര പാതകളെയാണ് ആശ്രയിക്കുന്നത്. മഴക്കാലത്ത് ഇവിടങ്ങളിൽ ഗതാഗത തടസ്സവും അപകടങ്ങളും പതിവാണ്. ഏഴ് കിലോമീറ്റർ നീളമുള്ള ഈ തുരങ്കപാത പൂർത്തിയാകുന്നതോടെ ഇന്ത്യയിലെ തന്നെ നീളം കൂടിയ മൂന്നാമത്തെ തുരങ്കമായി ഇത് മാറും. കോഴിക്കോട് ജില്ലയിലെ തിരുവമ്പാടി പഞ്ചായത്തിലെ മരിപ്പുഴയെയും വയനാട് മേപ്പാടി പഞ്ചായത്തിലെ കള്ളാടിയെയും ആണ് ഈ തുരങ്കം ബന്ധിപ്പിക്കുന്നത്.

വയനാട്ടിലെ ജനങ്ങളുടെ 'ലൈഫ് ലൈൻ' (ജീവരേഖ) ആയി ഈ പദ്ധതി മാറുമെന്ന് നിരീക്ഷിച്ച കോടതി, വികസനവും പരിസ്ഥിതി സംരക്ഷണവും സന്തുലിതമായി മുന്നോട്ട് കൊണ്ടുപോകണമെന്നും ഓർമ്മിപ്പിച്ചു. ഹൈക്കോടതി നേരത്തെ ഹർജി തള്ളിയിരുന്നുവെങ്കിലും, നിയമലംഘനങ്ങൾ ഉണ്ടായാൽ എൻജിടിയെ സമീപിക്കാനുള്ള അനുവാദം നൽകിയിരുന്നു. ഇത് സുപ്രീം കോടതിയും ശരിവെച്ചു.

---------------

Hindusthan Samachar / Roshith K