Bihar, 16 മെയ് (H.S.)

ബിഹാറിലെ ഗ്രാമീണ മേഖലകളില് കുറഞ്ഞ ചെലവില് മികച്ച കണ്ണ് ചികില്സ ലഭ്യമാക്കുന്ന വൻ പദ്ധതിക്ക് അദാനി ഗ്രൂപ്പ് ചെയർമാനും ശതകോടീശ്വരനുമായ ഗൗതം അദാനി ഞായറാഴ്ച തുടക്കം കുറിക്കും.

വടക്കൻ, മധ്യ ഇന്ത്യയിലെ ആരോഗ്യസൗകര്യങ്ങള് കുറഞ്ഞ പ്രദേശങ്ങളിലേക്ക് കുറഞ്ഞ ചെലവിലുള്ള ചികില്സാ സൗകര്യങ്ങള് എത്തിക്കുന്നതില് ഈ പദ്ധതി വലിയൊരു ചുവടുവെപ്പായിരിക്കും. പട്നയില് നിന്ന് ഏകദേശം 70 കിലോമീറ്റർ അകലെയുള്ള മാസ്തിച്ചക്കിലാണ് പരിപാടി നടക്കുന്നത്. അദാനി ഫൗണ്ടേഷനും അഖണ്ഡ ജ്യോതി ഐ ഹോസ്പിറ്റലും സംയുക്തമായാണ് ഈ പരിപാടി സംഘടിപ്പിക്കുന്നത്.

മാസ്തിച്ചക്കില് ഗൗതം അദാനി മേല്നോട്ടം വഹിക്കുന്ന ഈ പദ്ധതി ചെലവ് കുറഞ്ഞ നേത്ര ചികിത്സ, ആരോഗ്യ സേവനം, നൈപുണ്യ വികസന പരിപാടികള് എന്നിവ ലക്ഷ്യമിടുന്നു. അഖണ്ഡ് ജ്യോതി ഐ ഹോസ്പിറ്റലുമായി സഹകരിച്ച് ലോകത്തിലെ ഏറ്റവും വലിയ ഗ്രാമീണ നേത്രപരിചരണ ശൃംഖലകളിലൊന്ന് കെട്ടിപ്പടുക്കാനാണ് ശ്രമിക്കുന്നത്. ഇത് ഹിന്ദി ഹൃദയഭൂമിയിലുടനീളമുള്ള ഉള്ഗ്രാമങ്ങളിലും ആരോഗ്യ സുരക്ഷ ഉറപ്പാക്കും. സാമ്പത്തികമായി പിന്നോക്കം നില്ക്കുന്ന വിഭാഗങ്ങളെ ലക്ഷ്യം വെച്ചുള്ള സമഗ്രമായ ഒരു നേത്ര പരിചരണ ശൃംഖല ഒരുക്കാനാണ് പദ്ധതി.

സംഘാടകരുടെ വാക്കുകള് പ്രകാരം, ഈ പദ്ധതി ഗ്രാമീണ ആരോഗ്യ സംരക്ഷണ അടിസ്ഥാന സൗകര്യങ്ങളെ ശക്തിപ്പെടുത്തുമെന്നും കുറഞ്ഞ ചിലവില് നേത്ര ചികിത്സയും പ്രതിരോധ പരിചരണവും കൂടുതല് ആളുകളിലേക്ക് എത്തിക്കുമെന്നും പ്രതീക്ഷിക്കുന്നു. ഇത് പൂർത്തിയാകുമ്പോള്, മാസ്തിച്ചക്ക് ലോകത്തിലെ ഏറ്റവും വലിയ ഗ്രാമീണ നേത്രപരിചരണ ശൃംഖലകളില് ഒന്നായി മാറും. ഈ പരിപാടി ഹിന്ദി ഹൃദയഭൂമിയിലെ ആരോഗ്യപരിചരണ നൈപുണ്യവും സേവനങ്ങളും മെച്ചപ്പെടുത്താൻ സഹായിക്കും. കോടിക്കണക്കിന് പാവപ്പെട്ട ആളുകള്ക്ക് ഇതിന്റെ പ്രയോജനം ലഭിക്കുമെന്നും കരുതുന്നു.

സേവ ഹി സാധ്നാ ഹേ (സേവനമാണ് ഏറ്റവും വലിയ ആരാധന) എന്ന ഗൗതം അദാനിയുടെ തത്വശാസ്ത്രത്തിന്റെ പ്രതിഫലനം കൂടിയാണ് ഈ സംരംഭം. അദാനി ഗ്രൂപ്പിന്റെ ഇന്ത്യയിലുടനീളമുള്ള സാമൂഹിക പ്രവർത്തനങ്ങള്ക്കും ജീവകാരുണ്യ പ്രവർത്തനങ്ങള്ക്കും ഇത് ഊർജ്ജം പകരുന്നു. ആരോഗ്യ സംരക്ഷണം, വിദ്യാഭ്യാസം, നൈപുണ്യ വികസനം തുടങ്ങിയ മേഖലകളില് അദാനി കുടുംബം സമീപ വർഷങ്ങളില് വലിയ സംഭാവനകള് നല്കിയിട്ടുണ്ട്.

2022-ല് ഗൗതം അദാനിയുടെ 60-ാം ജന്മദിനത്തില്, രാജ്യത്തുടനീളമുള്ള സാമൂഹിക സംരംഭങ്ങള്ക്കായി കുടുംബം 60,000 കോടി രൂപ വാഗ്ദാനം ചെയ്തിരുന്നു. കഴിഞ്ഞ വർഷം, ജീത് അദാനിയുടെ വിവാഹ ആഘോഷ വേളയില്, സമാന മേഖലകളില് കൂടുതല് ശ്രദ്ധ കേന്ദ്രീകരിച്ചുകൊണ്ട് 10,000 കോടി രൂപയുടെ അധിക സഹായവും പ്രഖ്യാപിച്ചു.

പ്രയാഗ്രാജില് 2025-ല് നടന്ന മഹാകുംഭമേളയില് ഏകദേശം 50 ലക്ഷം തീർഥാടകർക്ക് നല്കിയ സഹായം, ഒഡീഷയിലെ ജഗന്നാഥ രഥയാത്രയില് സൗജന്യ ഭക്ഷണവും ലഘുഭക്ഷണവും വിതരണം ചെയ്തത് തുടങ്ങി നിരവധി സേവന പരിപാടികളും ഗ്രൂപ്പ് ഏറ്റെടുത്ത് നടത്തുന്നുണ്ട്.

2005-ല് ബീഹാറിലെ ഗ്രാമീണ മേഖലയില് 30 കിടക്കകളുള്ള ഒരു ആശുപത്രിയായി ആരംഭിച്ച അഖണ്ഡ് ജ്യോതി ഐ ഹോസ്പിറ്റല്, ഇന്ന് ഇന്ത്യയിലെ പ്രമുഖ നേത്ര പരിചരണ സ്ഥാപനങ്ങളില് ഒന്നായി വളർന്നു. വർഷങ്ങളായി 14 ലക്ഷത്തിലധികം കാഴ്ച പുനഃസ്ഥാപിക്കല് ശസ്ത്രക്രിയകളും ദശലക്ഷക്കണക്കിന് നേത്രപരിശോധനകളും ആശുപത്രി വിജയകരമായി നടത്തിയിട്ടുണ്ട്.

2024-ല് തുടക്കം കുറിച്ച അദാനി ഫൗണ്ടേഷന്റെ 'വിഷൻ കെയർ പ്രോഗ്രാമിന്റെ' തുടർച്ചയായാണ് ഈ പുതിയ പദ്ധതി വരുന്നത്. ഗ്രാമീണ മേഖലകളിലും സ്കൂളുകളിലും നടത്തിയ ക്യാമ്പുകളിലൂടെ, ഇതുവരെ 11 സംസ്ഥാനങ്ങളിലായി ഏകദേശം 1.93 ലക്ഷം പേരുടെ കണ്ണ് പരിശോധന നടത്തുകയും, 59,000-ത്തോളം ആളുകള്ക്ക് സൗജന്യമായി കണ്ണടകള് നല്കുകയും ചെയ്തിട്ടുണ്ട്.

ആരോഗ്യ വിദഗ്ധർ, നയരൂപകർത്താക്കള്, വ്യവസായ പ്രമുഖർ എന്നിവരുടെ ശ്രദ്ധ ആകർഷിക്കുന്നതാണ് ഈ ചടങ്ങ്. അതോടൊപ്പം തന്നെ, അദാനി ഗ്രൂപ്പിന്റെ ദീർഘകാല വികസന-സാമൂഹിക ക്ഷേമ പദ്ധതികളില് ബിഹാറിനുള്ള വർദ്ധിച്ചുവരുന്ന പ്രാധാന്യവും ഇത് വ്യക്തമാക്കുന്നു.

---------------

Hindusthan Samachar / CHANDHU CHANDRASEKHAR