Kolkota, 18 മെയ് (H.S.)

കൊൽക്കത്ത: പശ്ചിമ ബംഗാളിൽ വലിയ രാഷ്ട്രീയ കൊടുങ്കാറ്റ് സൃഷ്ടിച്ച 2021-ലെ നിയമസഭാ തെരഞ്ഞെടുപ്പാനന്തര അക്രമങ്ങളുമായി ബന്ധപ്പെട്ട കേസുകളിൽ നിർണ്ണായകമായ പുതിയ നീക്കങ്ങളുമായി അധികൃതർ. അക്രമ സംഭവങ്ങളുമായി ബന്ധപ്പെട്ട് 458 പുതിയ അന്വേഷണങ്ങൾക്ക് (Enquiries) തുടക്കമിടുകയും, 181 പുതിയ എഫ്.ഐ.ആറുകൾ (FIR) രജിസ്റ്റർ ചെയ്യുകയും ചെയ്തിട്ടുണ്ട്. ഇതിന് പുറമേ, ആവശ്യത്തിന് തെളിവുകളില്ലെന്ന് കാണിച്ച് മുമ്പ് അന്തിമ റിപ്പോർട്ട് സമർപ്പിച്ച് അവസാനിപ്പിച്ചിരുന്ന 59 കേസുകൾ പുനരന്വേഷണത്തിനായി വീണ്ടും തുറന്നതായും ഔദ്യോഗിക വൃത്തങ്ങൾ വ്യക്തമാക്കി. കേസുകളിൽ തുടർനടപടികളും എഫ്.ഐ.ആർ രജിസ്റ്റർ ചെയ്യുന്ന പ്രക്രിയകളും ഇപ്പോഴും സജീവമായി പുരോഗമിക്കുകയാണ്.

പശ്ചിമ ബംഗാളിൽ അടുത്തിടെ നടന്ന 2026-ലെ നിയമസഭാ തെരഞ്ഞെടുപ്പിൽ ബി.ജെ.പി വിജയിക്കുകയും മേയ് 9-ന് സുവേന്ദു അധികാരി പുതിയ മുഖ്യമന്ത്രിയായി ചുമതലയേൽക്കുകയും ചെയ്തതിന് പിന്നാലെയാണ് ഈ നിർണ്ണായക നീക്കം. ഭാരതീയ ന്യായ സംഹിതയിലെ (BNS) കർശനമായ വകുപ്പുകൾ പ്രകാരം, 2021-ലെ അക്രമങ്ങളുമായി ബന്ധപ്പെട്ട് ഇതുവരെ അന്വേഷണം നടക്കാത്ത എല്ലാ കൊലപാതക, ആക്രമണ കേസുകളിലും അടിയന്തരമായി എഫ്.ഐ.ആർ രജിസ്റ്റർ ചെയ്ത് അന്വേഷണം നടത്താൻ മുഖ്യമന്ത്രി സുവേന്ദു അധികാരി സംസ്ഥാന പൊലീസിന് കർശന നിർദ്ദേശം നൽകിയിരുന്നു. ആവശ്യത്തിന് തെളിവുകൾ കൈവശമില്ലെങ്കിൽ പോലും ഇരകളും അവരുടെ കുടുംബങ്ങളും ധൈര്യമായി മുന്നോട്ട് വന്ന് പരാതി നൽകണമെന്നും, അവർക്ക് നീതി ഉറപ്പാക്കാൻ ആവശ്യമായ അന്വേഷണം പൊലീസ് നടത്തുമെന്നും മുഖ്യമന്ത്രി ഉറപ്പുനൽകിയിരുന്നു.

പുതിയ ബി.ജെ.പി സർക്കാർ അധികാരമേറ്റതിന് പിന്നാലെ തൃണമൂൽ കോൺഗ്രസ് (ടി.എം.സി) നേതാക്കൾക്കെതിരെ വ്യാപകമായ നടപടികളാണ് സംസ്ഥാനത്ത് നടക്കുന്നത്. ഭൂമി കൈയേറ്റം, ഭീഷണിപ്പെടുത്തി പണം തട്ടൽ, അക്രമങ്ങൾ തുടങ്ങിയ പരാതികളിൽ നിരവധി ടി.എം.സി നേതാക്കൾക്കെതിരെ കേസുകൾ രജിസ്റ്റർ ചെയ്യപ്പെട്ടിട്ടുണ്ട്.

അതേസമയം, പുതിയ സർക്കാരിന്റെയും കേന്ദ്രത്തിന്റെയും നടപടികൾക്കെതിരെ തൃണമൂൽ കോൺഗ്രസ് കടുത്ത ഭാഷയിൽ രംഗത്തെത്തി. അടുത്തിടെ കഴിഞ്ഞ തെരഞ്ഞെടുപ്പിലെ വോട്ടെണ്ണൽ പ്രക്രിയയിൽ കേന്ദ്രം അധികാരം ദുരുപയോഗം ചെയ്തുവെന്ന് ടി.എം.സി ജനറൽ സെക്രട്ടറി അഭിഷേക് ബാനർജി ആരോപിച്ചു. നിലവിലെ തെരഞ്ഞെടുപ്പാനന്തര അക്രമങ്ങളിൽ ഇരയായവരുടെ കുടുംബങ്ങളെ അദ്ദേഹം അനുശോചനം അറിയിച്ചു. അക്രമങ്ങൾ നടക്കുമ്പോൾ കേന്ദ്ര സേന നിശ്ശബ്ദ കാഴ്ചക്കാരായി നോക്കിനിൽക്കുകയായിരുന്നുവെന്നും, പല മണ്ഡലങ്ങളിലും തൃണമൂൽ കോൺഗ്രസ് സ്ഥാനാർത്ഥികളെയും കൗണ്ടിംഗ് ഏജന്റുമാരെയും വോട്ടെണ്ണൽ കേന്ദ്രങ്ങളിൽ നിന്ന് ബലമായി പുറത്താക്കിയതായും അദ്ദേഹം 'എക്സ്' ഹാൻഡിലിലൂടെ ആരോപിച്ചു.

ഇതിനിടെ, 2026-ലെ നിയമസഭാ തെരഞ്ഞെടുപ്പ് ഫലപ്രഖ്യാപനത്തിന് പിന്നാലെയുണ്ടായ അക്രമങ്ങളുമായി ബന്ധപ്പെട്ട പൊതുതാത്പര്യ ഹർജിയിൽ (PIL) മുൻ മുഖ്യമന്ത്രി മമത ബാനർജി കൽക്കട്ട ഹൈക്കോടതി ചീഫ് ജസ്റ്റിസ് എച്ച്.സി. സുജോയ് പാലിന് മുന്നിൽ ഹാജരായി. സംസ്ഥാനത്ത് വ്യാപകമായ ഗുണ്ടായിസവും തീവെപ്പും നടക്കുകയാണെന്നും ജനങ്ങൾക്ക് അടിയന്തര സംരക്ഷണം വേണമെന്നും മമത ബാനർജി കോടതിയിൽ ആവശ്യപ്പെട്ടു. പൊലീസിന്റെ സാന്നിധ്യത്തിലാണ് അവർ ഗുണ്ടായിസവും തീവെപ്പും നടത്തുന്നത്. കുട്ടികളെയോ സ്ത്രീകളെയോ ന്യൂനപക്ഷങ്ങളെയോ അവർ വെറുതെ വിടുന്നില്ല. ഞങ്ങളുടെ 10 പാർട്ടി പ്രവർത്തകരാണ് ഇതിനകം കൊല്ലപ്പെട്ടത്, മമത ബാനർജി ആരോപിച്ചു.

294 അംഗ പശ്ചിമ ബംഗാൾ നിയമസഭയിൽ 207 സീറ്റുകൾ നേടിയാണ് ബി.ജെ.പി ചരിത്രത്തിലാദ്യമായി സംസ്ഥാനത്ത് അധികാരത്തിലെത്തിയത്. ഇതോടെ 15 വർഷം നീണ്ടുനിന്ന തൃണമൂൽ കോൺഗ്രസ് ഭരണത്തിന് അന്ത്യമാവുകയും ടി.എം.സി 80 സീറ്റുകളിലേക്ക് ഒതുങ്ങുകയും ചെയ്തു. ഇതിന് പിന്നാലെയാണ് 2021-ലെ പഴയ അക്രമക്കേസുകൾ ഉൾപ്പെടെ വീണ്ടും സജീവമാക്കി പുതിയ സർക്കാർ നിയമനടപടികളിലേക്ക് കടന്നിരിക്കുന്നത്.

---------------

Hindusthan Samachar / Roshith K