Chennai, 18 മെയ് (H.S.)

ചെന്നൈ: തമിഴ്നാട്ടിൽ നടൻ വിജയിന്റെ നേതൃത്വത്തിലുള്ള തമിഴക വെട്രി കഴകം (TVK) സർക്കാർ രൂപീകരിച്ചതിന് പിന്നാലെ, പുതിയ സർക്കാരിനോടുള്ള തങ്ങളുടെ രാഷ്ട്രീയ നിലപാട് വ്യക്തമാക്കി ഡി.എം.കെ അധ്യക്ഷൻ എം.കെ. സ്റ്റാലിൻ. പുതിയ ടി.വി.കെ സർക്കാരിന്റെ ഭരണത്തിന് ഡി.എം.കെ ഒരു തരത്തിലും തടസ്സമോ ശല്യമോ ഉണ്ടാക്കില്ലെന്ന് വ്യക്തമാക്കിയ സ്റ്റാലിൻ, എന്നാൽ പാർട്ടിക്കെതിരെ അപവാദപ്രചാരണങ്ങളോ കള്ളങ്ങളോ അഴിച്ചുവിട്ടാൽ ശക്തമായി പ്രതിരോധിക്കുമെന്ന കടുത്ത മുന്നറിയിപ്പും നൽകി. തങ്ങളുടെ ഭരണപരമായ പരാജയങ്ങൾ മറച്ചുവെക്കാൻ ഡി.എം.കെയെ ലക്ഷ്യമിട്ടാൽ അത് വെറുതെ വിടില്ലെന്നും അദ്ദേഹം കൂട്ടിച്ചേർത്തു. സോഷ്യൽ മീഡിയ പ്ലാറ്റ്ഫോമായ എക്സിലൂടെയാണ് (X) സ്റ്റാലിൻ ഡി.എം.കെ അണികളോട് ഇക്കാര്യം ആവശ്യപ്പെട്ടത്.

തമിഴ്നാട് നിയമസഭാ തിരഞ്ഞെടുപ്പിൽ നേരിട്ട അപ്രതീക്ഷിത പരാജയത്തിന് ശേഷം പാർട്ടി പ്രവർത്തകരുമായി നിരന്തരം സമ്പർക്കം പുലർത്തുന്നതിനിടയിലാണ് സ്റ്റാലിന്റെ ഈ പ്രതികരണം. തഞ്ചാവൂരിൽ പാർട്ടി ഭാരവാഹിയുടെ കുടുംബ വിവാഹ ചടങ്ങിൽ പങ്കെടുത്ത ശേഷം അണികളെ അഭിസംബോധന ചെയ്യുകയായിരുന്നു അദ്ദേഹം.

അപവാദങ്ങൾക്കെതിരെ പ്രതികരിക്കും, കള്ളങ്ങൾ തുറന്നുകാട്ടും

പുതിയ സർക്കാർ തമിഴ്നാട് ഭരിക്കട്ടെ എന്നും അതിന് തങ്ങൾ തടസ്സം നിൽക്കില്ലെന്നും പറഞ്ഞ സ്റ്റാലിൻ, ഭരണപക്ഷത്തിന്റെ ഭാഗത്തുനിന്നും ഉണ്ടാകാൻ സാധ്യതയുള്ള രാഷ്ട്രീയ ആക്രമണങ്ങളെ നേരിടാൻ അണികളോട് ആഹ്വാനം ചെയ്തു.

സംസ്ഥാനത്ത് പുതിയൊരു സർക്കാർ രൂപീകരിച്ചിരിക്കുകയാണ്. അവർ ഭരിക്കട്ടെ, അതിൽ ഞങ്ങൾ ഒരു ശല്യവും ഉണ്ടാക്കാൻ പോകുന്നില്ല. എന്നാൽ തങ്ങളുടെ പോരായ്മകൾ മറച്ചുവെക്കാൻ അവർ ഞങ്ങൾക്ക് നേരെ അപവാദ പ്രചാരണങ്ങൾ അഴിച്ചുവിട്ടാൽ, ഞങ്ങൾ അതിന് കൃത്യമായ മറുപടി നൽകും. സോഷ്യൽ മീഡിയയിലൂടെ അവർ കള്ളങ്ങൾ പ്രചരിപ്പിച്ചാൽ, സത്യാവസ്ഥ ജനങ്ങൾക്ക് മുന്നിൽ തുറന്നുകാട്ടാൻ നമ്മുടെ സഖാക്കൾ രംഗത്തിറങ്ങണം. - എം.കെ. സ്റ്റാലിൻ എക്സിൽ കുറിച്ചു.

തിരുച്ചിറപ്പള്ളിയിൽ എത്തിയപ്പോൾ മുതൽ പാർട്ടി പ്രവർത്തകരും ജനങ്ങളും തനിക്ക് നൽകിയ വൈകാരികമായ പിന്തുണയെക്കുറിച്ചും അദ്ദേഹം പോസ്റ്റിൽ പരാമർശിച്ചു. വാക്കുകൾക്കപ്പുറമുള്ള ബന്ധമാണ് താനും ഡി.എം.കെ സഖാക്കളും തമ്മിലുള്ളതെന്നും സ്റ്റാലിൻ ഓർമ്മിപ്പിച്ചു.

തിരഞ്ഞെടുപ്പ് പരാജയവും പാർട്ടി പുനഃസംഘടനയും

2026-ലെ തമിഴ്നാട് നിയമസഭാ തിരഞ്ഞെടുപ്പിൽ ഡി.എം.കെ സഖ്യത്തിന് കനത്ത തിരിച്ചടിയാണ് നേരിടേണ്ടി വന്നത്. ഭരണവിരുദ്ധ വികാരത്തിന്റെ തരംഗത്തിൽ, കേവലം 59 സീറ്റുകളിൽ മാത്രമാണ് ഡി.എം.കെയ്ക്ക് വിജയിക്കാനായത്. സൂപ്പർ താരം വിജയിന്റെ ജനപ്രീതിയുടെ കരുത്തിൽ കന്നിപ്പോരാട്ടത്തിനിറങ്ങിയ ടി.വി.കെ 108 സീറ്റുകൾ നേടി തമിഴ്നാട്ടിൽ അധികാരം പിടിച്ചെടുത്തു. ഡി.എം.കെയുടെ സഖ്യകക്ഷികളായിരുന്ന കോൺഗ്രസ്, സി.പി.ഐ, സി.പി.എം, വി.സി.കെ തുടങ്ങിയ പാർട്ടികൾ തിരഞ്ഞെടുപ്പിന് ശേഷം ടി.വി.കെ മുന്നണിയുടെ ഭാഗമായി മാറി സർക്കാർ രൂപീകരണത്തെ പിന്തുണച്ചിരുന്നു. കൊളത്തൂർ മണ്ഡലത്തിൽ നിന്നും മത്സരിച്ച മുൻ മുഖ്യമന്ത്രി എം.കെ. സ്റ്റാലിൻ ടി.വി.കെ സ്ഥാനാർത്ഥിയോട് 8,795 വോട്ടുകൾക്ക് പരാജയപ്പെടുകയും ചെയ്തു.

തിരഞ്ഞെടുപ്പ് പരാജയത്തിന്റെ പശ്ചാത്തലത്തിൽ പാർട്ടി താഴേത്തട്ടിൽ ശക്തിപ്പെടുത്താനുള്ള കഠിനശ്രമത്തിലാണ് ഡി.എം.കെ നേതൃത്വം. ഇതിനായി സംസ്ഥാനത്തെ 234 മണ്ഡലങ്ങളിലും വോട്ടർമാരുടെയും പാർട്ടി പ്രവർത്തകരുടെയും വികാരം നേരിട്ടറിയാൻ 38 അംഗ പ്രത്യേക സമിതിയെ സ്റ്റാലിൻ നിയോഗിച്ചിട്ടുണ്ട്.

ജൂൺ അഞ്ചിനകം റിപ്പോർട്ട് സമർപ്പിക്കണം

കഴിഞ്ഞ ശനിയാഴ്ച ഈ പ്രത്യേക സമിതി അംഗങ്ങളുമായി സ്റ്റാലിൻ കൂടിക്കാഴ്ച നടത്തിയിരുന്നു. പാർട്ടി നേതൃത്വത്തിന് നേരെ വിമർശനങ്ങൾ ഉയർന്നാൽ പോലും അവ യാതൊരു പക്ഷപാതവുമില്ലാതെ കൃത്യമായി രേഖപ്പെടുത്താൻ സമിതിക്ക് അദ്ദേഹം നിർദ്ദേശം നൽകിയിട്ടുണ്ട്. ജൂൺ 5-നകം ഈ പഠന റിപ്പോർട്ട് സമർപ്പിക്കാനാണ് ആവശ്യപ്പെട്ടിരിക്കുന്നത്. ഇതിന്റെ അടിസ്ഥാനത്തിൽ ജൂൺ അവസാനത്തോടെ ഡി.എം.കെയിൽ വലിയ രീതിയിലുള്ള തിരുത്തൽ നടപടികളും പുനഃസംഘടനയും ഉണ്ടാകുമെന്നാണ് സൂചന. പരാജയത്തിൽ തളരാതെ ശക്തമായ പ്രതിപക്ഷമായി നിലകൊള്ളാനും ഭരണപക്ഷത്തിന്റെ വീഴ്ചകൾ ജനമധ്യത്തിൽ കൊണ്ടുവരാനുമാണ് ഡി.എം.കെ ഇപ്പോൾ ലക്ഷ്യമിടുന്നത്.

---------------

Hindusthan Samachar / Roshith K