Kochi, 21 മെയ് (H.S.)

കൊച്ചി: കേരളത്തെ ഞെട്ടിച്ച മോഡലിങ്ങിന്റെ മറവിലെ പെൺവാണിഭക്കേസിൽ നിർണ്ണായക വഴിത്തിരിവ്. സെക്സ് റാക്കറ്റിന്റെ മുഖ്യ സൂത്രധാരനും കോർഡിനേറ്ററുമായ മാവേലിക്കര സ്വദേശി ബിലാൽ എന്ന ശ്രീകുമാറിനെ (38) പ്രത്യേക അന്വേഷണ സംഘം അറസ്റ്റ് ചെയ്തു. കേസിൽ നേരത്തെ പോലീസ് തയ്യാറാക്കിയ പ്രതിപട്ടികയ്ക്ക് പുറത്തുള്ളയാളാണ് ഇപ്പോൾ പിടിയിലായ ശ്രീകുമാർ എന്നത് കേസിന്റെ വ്യാപ്തി വർദ്ധിപ്പിക്കുന്നു. റാക്കറ്റിൽ നിന്നും രക്ഷപ്പെട്ട ഇരയായ പെൺകുട്ടി മജിസ്ട്രേറ്റിന് മുന്നിൽ നൽകിയ രഹസ്യമൊഴിയുടെ (164 മൊഴി) അടിസ്ഥാനത്തിലാണ് പോലീസിന്റെ ഈ നിർണ്ണായക നീക്കം. ഇതോടെ ഈ പെൺവാണിഭക്കേസിൽ അറസ്റ്റിലായവരുടെ ആകെ എണ്ണം നാലായി ഉയർന്നു.

കേസിൽ നേരത്തെ അറസ്റ്റിലായ ലേഡി ഏജന്റ് സിന്ധുവും ബിലാൽ എന്ന ശ്രീകുമാറും തമ്മിൽ അതീവ രഹസ്യവും അടുത്തതുമായ ബന്ധമാണ് ഉണ്ടായിരുന്നതെന്ന് പോലീസ് കണ്ടെത്തിയിട്ടുണ്ട്. വിദേശത്തേക്ക് അടക്കം പെൺകുട്ടികളെ കടത്തുന്ന ശൃംഖലയിലെ ഏറ്റവും പ്രധാനപ്പെട്ട കണ്ണിയാണ് ബിലാൽ. മോഡലിങ് രംഗത്ത് അവസരങ്ങൾ വാഗ്ദാനം ചെയ്ത് പെൺകുട്ടികളെ കെണിയിൽ വീഴ്ത്തുന്ന സിന്ധു, ഇവരെ പിന്നീട് കൈമാറിയിരുന്നത് ബിലാലിനായിരുന്നു.

പെൺകുട്ടിയുടെ രഹസ്യമൊഴി വഴിത്തിരിവായി:

മോഡലിങ് എന്ന വ്യാജേന എറണാകുളത്തെ സ്വകാര്യ ഹോട്ടലിലെത്തിച്ച് പെൺകുട്ടിയെ ക്രൂരമായ പീഡനത്തിന് ഇരയാക്കിയതോടെയാണ് കേസിന്റെ തുടക്കം. ഇവിടെ നിന്നും രക്ഷപ്പെട്ട പെൺകുട്ടി പോലീസിനെ സമീപിക്കുകയായിരുന്നു. അന്വേഷണത്തിന്റെ ഭാഗമായി കോടതിയിൽ രേഖപ്പെടുത്തിയ പെൺകുട്ടിയുടെ രഹസ്യമൊഴിയിലാണ് 'ബിലാൽ' എന്ന പേര് ആദ്യമായി പുറത്തുവരുന്നത്. സിന്ധു തന്നെ പരിചയപ്പെടുത്തിയ ബിലാൽ എന്ന വ്യക്തിയാണ് തന്നെ ഭീഷണിപ്പെടുത്തിയതെന്നും പലർക്കും കാഴ്ചവെക്കാൻ മുൻകൈ എടുത്തതെന്നും പെൺകുട്ടി വെളിപ്പെടുത്തി. തുടർന്ന് സൈബർ സെല്ലിന്റെ സഹായത്തോടെ നടത്തിയ അന്വേഷണത്തിലാണ് ബിലാൽ എന്നത് വ്യാജപ്പേരാണെന്നും ഇയാൾ മാവേലിക്കര സ്വദേശിയായ ശ്രീകുമാറാണെന്നും പോലീസ് തിരിച്ചറിഞ്ഞത്.

വിദേശക്കടത്തിന് പിന്നിലെ മാസ്റ്റർമൈൻഡ്:

കേരളത്തിലെ വിവിധ ഭാഗങ്ങളിൽ നിന്നുള്ള യുവതികളെ മോഡലിങ്, സിനിമാ അവസരങ്ങൾ, വിദേശത്ത് വൻ ശമ്പളമുള്ള ജോലി എന്നിവ വാഗ്ദാനം ചെയ്ത് ബിലാലും സംഘവും വിദേശത്തേക്ക് കടത്താൻ പദ്ധതിയിട്ടിരുന്നതായി പോലീസ് സ്ഥിരീകരിച്ചു. ദുബായ് ഉൾപ്പെടെയുള്ള ഗൾഫ് രാജ്യങ്ങളിലേക്ക് പെൺകുട്ടികളെ കൊണ്ടുപോകുന്നതിൽ ബിലാലിന് നിർണ്ണായക പങ്കുണ്ട്. വിദേശത്തുള്ള ചില വൻകിട സെക്സ് റാക്കറ്റുകളുമായി ഇയാൾക്ക് നേരിട്ട് സാമ്പത്തിക ഇടപാടുകൾ ഉണ്ടായിരുന്നു. പെൺകുട്ടികളുടെ പാസ്പോർട്ടും വിസയും ശരിയാക്കുന്നതും അവരെ വിദേശത്തേക്ക് അയക്കുന്നതിനുള്ള യാത്രാ സൗകര്യങ്ങൾ ഒരുക്കുന്നതും ബിലാലിന്റെ മേൽനോട്ടത്തിലായിരുന്നു.

അന്വേഷണം മറ്റ് പ്രമുഖരിലേക്ക്:

ബിലാലിന്റെ അറസ്റ്റോടെ കേസിൽ കൂടുതൽ സിനിമ-സീരിയൽ മേഖലയിലുള്ളവർക്കും മോഡലിങ് രംഗത്തുള്ള പ്രമുഖർക്കും പങ്കുണ്ടോ എന്ന് പോലീസ് അന്വേഷിച്ചുവരികയാണ്. പ്രതിയുടെ ഫോൺ രേഖകളും ബാങ്ക് അക്കൗണ്ട് വിവരങ്ങളും പോലീസ് വിശദമായി പരിശോധിച്ചു വരികയാണ്. ഇയാളുടെ ഫോണിൽ നിന്നും നിരവധി പെൺകുട്ടികളുടെ ചിത്രങ്ങളും വൻതോതിലുള്ള പണമിടപാട് വിവരങ്ങളും ലഭിച്ചിട്ടുണ്ട്. വരും ദിവസങ്ങളിൽ കൂടുതൽ അറസ്റ്റ് ഉണ്ടാകുമെന്നാണ് അന്വേഷണ സംഘം നൽകുന്ന സൂചന. പ്രതിയെ കോടതിയിൽ ഹാജരാക്കി കൂടുതൽ ചോദ്യം ചെയ്യലിനായി പോലീസ് കസ്റ്റഡിയിൽ വാങ്ങും.

---------------

Hindusthan Samachar / Roshith K