Kochi, 21 മെയ് (H.S.)

കൊച്ചി: മോഡലിങ് രംഗത്ത് അവസരങ്ങൾ വാഗ്ദാനം ചെയ്ത് യുവതികളെ വിദേശത്തേക്ക് കടത്തുകയും പിന്നീട് ക്രൂരമായ ലൈംഗിക ചൂഷണത്തിന് ഇരയാക്കുകയും ചെയ്ത കേസിൽ മുഖ്യപ്രതി സിന്ധുവിനെതിരെയുള്ള നിർണായക തെളിവുകൾ പുറത്ത്. ആവശ്യക്കാർക്കും ഇടപാടുകാർക്കും സിന്ധു പെൺകുട്ടികളുടെ ചിത്രങ്ങൾ വാട്സാപ്പ് വഴി അയച്ചുകൊടുക്കുന്നതിന്റെയും ശരീരത്തിന് വിലപേശി പണമിടപാടുകൾ സംസാരിക്കുന്നതിന്റെയും ഞെട്ടിക്കുന്ന സ്ക്രീൻഷോട്ടുകളാണ് ഇപ്പോൾ മാധ്യമങ്ങളിലൂടെ പുറത്തുവന്നിരിക്കുന്നത്.

സിന്ധു ഇത്തരത്തിലാണ് ഇടപാടുകാരുമായി നിരന്തരം ബന്ധപ്പെട്ടിരുന്നതെന്ന് വ്യക്തമാക്കുന്നതാണ് ഈ ചാറ്റുകൾ. കേസിൽ പ്രതിക്കെതിരെ ശക്തമായ തെളിവായി ഈ സ്ക്രീൻഷോട്ടുകൾ മാറുമെന്നാണ് വിലയിരുത്തൽ.

പൊലീസിന് നിർണായക തെളിവുകൾ കൈമാറി

തങ്ങളെ കെണിയിൽപ്പെടുത്തിയ സംഘത്തിന്റെ പ്രവർത്തനം വ്യക്തമാക്കുന്ന ഈ ചാറ്റുകളുടെ സ്ക്രീൻഷോട്ട് ഉൾപ്പെടെയുള്ള എല്ലാ വിവരങ്ങളും പരാതിക്കാരി പൊലീസിന് കൈമാറിയിട്ടുണ്ടെന്നാണ് വിവരം. പ്രതികളെ ഭയക്കാതെ നിയമപോരാട്ടവുമായി മുന്നോട്ട് പോകാൻ തന്നെയാണ് ഇരകളുടെ തീരുമാനം.

നിലവിൽ കേസിന്റെ അന്വേഷണം ശരിയായ രീതിയിലാണ് മുന്നോട്ട് പോകുന്നതെന്നും പൊലീസിന്റെ നടപടികളിൽ തനിക്ക് പൂർണ തൃപ്തിയുണ്ടെന്നും പരാതിക്കാരി മാധ്യമങ്ങളോട് പ്രതികരിച്ചു. മുഖ്യപ്രതി സിന്ധു പിടിയിലായതോടെ റാക്കറ്റിന്റെ പിന്നിൽ പ്രവർത്തിച്ച മറ്റുള്ളവരിലേക്കും അന്വേഷണം വേഗത്തിൽ വ്യാപിപ്പിക്കാൻ പൊലീസിന് സാധിക്കുമെന്നാണ് ഇരകൾ പ്രതീക്ഷിക്കുന്നത്.

സൈബർ ആക്രമണങ്ങളിൽ ആശങ്ക

അതേസമയം, കേസ് പുറത്തുവന്നതിന് പിന്നാലെ തനിക്കെതിരെ സമൂഹമാധ്യമങ്ങളിൽ നടക്കുന്ന വ്യാജ പ്രചാരണങ്ങളിൽ പരാതിക്കാരി കടുത്ത ആശങ്ക രേഖപ്പെടുത്തി. സോഷ്യൽ മീഡിയയിലൂടെ തെറ്റിദ്ധരിപ്പിക്കുന്ന രീതിയിലും വ്യക്തിഹത്യ നടത്തുന്ന തരത്തിലുമുള്ള പോസ്റ്റുകൾ പ്രചരിക്കുന്നുണ്ടെന്ന് അവർ പറഞ്ഞു.

ക്രൂരമായ പീഡനങ്ങളിൽ നിന്നും കഷ്ടിച്ചാണ് രക്ഷപ്പെട്ടതെന്നും, എന്നാൽ അതിനുശേഷവും സമൂഹമാധ്യമങ്ങളിലൂടെ ചിലർ തന്നെ വേട്ടയാടാനും ഭീഷണിപ്പെടുത്താനും ശ്രമിക്കുന്നത് കടുത്ത മാനസിക സമ്മർദ്ദമുണ്ടാക്കുന്നുണ്ടെന്നും പരാതിക്കാരി കൂട്ടിച്ചേർത്തു. ഇരകളെ വീണ്ടും മാനസികമായി തകർക്കുന്ന തരത്തിലുള്ള സൈബർ ആക്രമണങ്ങൾക്കെതിരെയും ശക്തമായ നടപടി വേണമെന്ന ആവശ്യമുയരുന്നുണ്ട്.

കസ്റ്റഡിയിലുള്ള സിന്ധുവിനെ ചോദ്യം ചെയ്യുന്നു

വിദേശത്തേക്ക് കടക്കാൻ ശ്രമിക്കുന്നതിനിടെ മുംബൈയിൽ വെച്ചാണ് കേസിലെ മുഖ്യപ്രതിയായ സ്റ്റോയ് സി. സിന്ധുവിനെ പൊലീസ് അറസ്റ്റ് ചെയ്തത്. തുടർന്ന് കൊച്ചിയിലെത്തിച്ച ഇവരെ മരട് പൊലീസ് സ്റ്റേഷനിൽ വെച്ച് വിശദമായി ചോദ്യം ചെയ്തുവരികയാണ്.

കേരളത്തിലെ വിവിധ ഭാഗങ്ങളിൽ നിന്നുള്ള പെൺകുട്ടികളെ ഉയർന്ന ശമ്പളമുള്ള മോഡലിങ് അവസരങ്ങൾ വാഗ്ദാനം ചെയ്ത് ദുബായിൽ എത്തിക്കുകയും, അവിടെ ഫ്ലാറ്റുകളിൽ പൂട്ടിയിട്ട് ലൈംഗികമായി ചൂഷണം ചെയ്യുകയുമായിരുന്നു ഇവരുടെ രീതി. സിന്ധുവിന് പുറമെ അലീന എബ്രഹാം, മഞ്ജിമ എന്നിവരെയും പൊലീസ് നേരത്തെ അറസ്റ്റ് ചെയ്തിരുന്നു. കേസിൽ കൂടുതൽ പെൺകുട്ടികൾ ചതിക്കപ്പെട്ടിട്ടുണ്ടോ എന്നും, സ്വർണ്ണക്കടത്തുമായി ഈ സംഘത്തിന് ബന്ധമുണ്ടോ എന്നും പൊലീസ് അന്വേഷിച്ചുവരികയാണ്.

---------------

Hindusthan Samachar / Roshith K