Chennai , 22 മെയ് (H.S.)

ചെന്നൈ: തമിഴ്നാട്ടിൽ നടൻ സി. ജോസഫ് വിജയ് (ഇളയദളപതി വിജയ്) നയിക്കുന്ന തമിഴക വെട്രി കഴകം (ടിവികെ) സർക്കാരിന്റെ രണ്ടാമത് മന്ത്രിസഭാ വികസനം പൂർത്തിയായി. ഡിഎംകെ സഖ്യം വിട്ട് വിജയ് സർക്കാരിനെ പിന്തുണച്ച വിടുതലൈ ചിരുതൈഗൾ കക്ഷി (VCK), ഇന്ത്യൻ യൂണിയൻ മുസ്ലിം ലീഗ് (IUML) എന്നീ കക്ഷികളാണ് പുതിയതായി ഭരണത്തിൽ പങ്കാളികളായത്. മുസ്ലിം ലീഗിന്റെ പാപനാശം എംഎൽഎ എ.എം ഷാജഹാൻ, വിസികെയുടെ തിണ്ടിവനം എംഎൽഎ വണ്ണി അരശ് എന്നിവർ പുതിയ മന്ത്രിമാരായി സത്യപ്രതിജ്ഞ ചെയ്ത് അധികാരമേറ്റു. ചെന്നൈ ലോകഭവനിൽ നടന്ന ചടങ്ങിൽ ഗവർണർ രാജേന്ദ്ര വിശ്വനാഥ് അർലേക്കർ ഇരുവർക്കും ഔദ്യോഗിക പദവിയും രഹസ്യസ്വഭാവവും കാത്തുസൂക്ഷിക്കാനുള്ള സത്യവാചകം ചൊല്ലിക്കൊടുത്തു.

മുഖ്യമന്ത്രി വിജയിയുടെ ഔദ്യോഗിക ശുപാർശയെ തുടർന്നാണ് ഗവർണർ പുതിയ മന്ത്രിമാരുടെ നിയമനത്തിന് അംഗീകാരം നൽകിയത്. രണ്ടു ദിവസത്തിനിടെ നടക്കുന്ന രണ്ടാമത്തെ മന്ത്രിസഭാ വികസനമാണിത്. കഴിഞ്ഞ ദിവസം ടിവികെയുടെ 21 അംഗങ്ങളും സഖ്യകക്ഷിയായ കോൺഗ്രസിന്റെ രണ്ട് അംഗങ്ങളും അടക്കം 23 പേർ മന്ത്രിമാരായി സത്യപ്രതിജ്ഞ ചെയ്തിരുന്നു. ഇതിന് പിന്നാലെയാണ് വിസികെ, ഐയുഎംഎൽ പ്രതിനിധികളും മന്ത്രിസഭയിലേക്ക് എത്തിയത്. ഇതോടെ തമിഴ്നാട് മന്ത്രിസഭയുടെ ആകെ അംഗസംഖ്യ 35 ആയി ഉയർന്നു.

സഖ്യകക്ഷികളെ ചേർത്തുപിടിച്ച് വിജയ്; എഐഎഡിഎംകെ വിമതർ പുറത്ത്

നിയമസഭാ തെരഞ്ഞെടുപ്പിൽ 108 സീറ്റുകൾ നേടി ഏറ്റവും വലിയ ഒറ്റക്കക്ഷിയായെങ്കിലും കേവല ഭൂരിപക്ഷത്തിന് തൊട്ടരികിൽ ടിവികെ വീണിരുന്നു. തുടർന്ന് കോൺഗ്രസ് (5), വിസികെ (2), മുസ്ലിം ലീഗ് (2), ഇടത് പാർട്ടികൾ (4) എന്നിവരുടെ പിന്തുണയോടെയാണ് വിജയ് സർക്കാർ രൂപീകരിച്ചതും തുടർന്ന് 144 വോട്ടുകൾ നേടി നിയമസഭയിൽ ഭൂരിപക്ഷം തെളിയിച്ചതും. വിശ്വാസവോട്ടെടുപ്പിൽ എഐഎഡിഎംകെയിലെ എസ്പി വേലുമണി, സിവി ഷൺമുഖം എന്നിവരുടെ നേതൃത്വത്തിലുള്ള 25 വിമത എംഎൽഎമാരും വിജയ് സർക്കാരിനെ പിന്തുണച്ചിരുന്നു.

തുടക്കത്തിൽ എഐഎഡിഎംകെ വിമതർ മന്ത്രിസഭയിലെത്തുമെന്ന് സൂചനകളുണ്ടായിരുന്നെങ്കിലും, ബിജെപി പശ്ചാത്തലമുള്ളവരെ ഭരണത്തിൽ പങ്കാളികളാക്കുന്നതിനെ കോൺഗ്രസും ഇടത് പാർട്ടികളും ശക്തമായി എതിർത്തു. സംസ്ഥാനത്ത് ഗവർണർ ഭരണവും ബിജെപിയുടെ ഇടപെടലും ഒഴിവാക്കാനാണ് തങ്ങൾ വിജയിനെ പിന്തുണയ്ക്കുന്നതെന്നായിരുന്നു വിസികെയുടെയും ഇടത് മുന്നണിയുടെയും നിലപാട്. സഖ്യകക്ഷികളുടെ സമ്മർദ്ദത്തിന് വഴങ്ങിയ മുഖ്യമന്ത്രി വിജയ്, തങ്ങളെ പിന്തുണച്ച ചെറുകക്ഷികൾക്കെല്ലാം മന്ത്രിസ്ഥാനം നൽകി സഖ്യം കൂടുതൽ ശക്തമാക്കുകയായിരുന്നു. ഇതോടെ എഐഎഡിഎംകെ വിമതർ മന്ത്രിസഭയിൽ ഇടംപിടിക്കാനുള്ള സാധ്യതകൾ പൂർണ്ണമായും ഇല്ലാതായി.

വകുപ്പ് വിഭജനവും മന്ത്രിസഭയുടെ പ്രത്യേകതകളും

പുതിയ വികസനത്തോടെ തമിഴ്നാട് ചരിത്രത്തിലെ ഏറ്റവും വൈവിധ്യമാർന്ന സഖ്യകക്ഷി മന്ത്രിസഭയായി വിജയ് സർക്കാർ മാറി. മുൻപ് മുഖ്യമന്ത്രിയുടെ കീഴിലായിരുന്ന വനിതാ ക്ഷേമ വകുപ്പ് സോഷ്യൽ വെൽഫെയർ ആൻഡ് വുമൺ എംപവർമെന്റ് എന്ന പേരിൽ പ്രത്യേക മന്ത്രാലയമാക്കി കെ. ജഗദീശ്വരിക്ക് കൈമാറി. ധനകാര്യ വകുപ്പിന്റെ ചുമതല ഡോ. രാധാകൃഷ്ണൻ നഗറിൽ നിന്നുള്ള ടിവികെ എംഎൽഎ എൻ. മേരി വിൽസനാണ്. റവന്യൂ വകുപ്പ് മുൻ തമിഴ്നാട് മന്ത്രിയും മുതിർന്ന നേതാവുമായ കെ.എ ചെങ്കോട്ടയ്യൻ കൈകാര്യം ചെയ്യും.

മന്ത്രിപാർട്ടിമണ്ഡലംഎ.എം ഷാജഹാൻഐയുഎംഎൽ (IUML)പാപനാശംവണ്ണി അരശ്വിസികെ (VCK)തിണ്ടിവനം

ആഭ്യന്തരം, പോലീസ്, തദ്ദേശസ്വയംഭരണം, ജലവിതരണം തുടങ്ങിയ സുപ്രധാന വകുപ്പുകൾ മുഖ്യമന്ത്രി വിജയ് തന്നെയാണ് കൈകാര്യം ചെയ്യുന്നത്. ഇതോടൊപ്പം രാജ്യത്ത് കേരളത്തിന് ശേഷം രണ്ടാമതായി തമിഴ്നാട്ടിൽ ആർട്ടിഫിഷ്യൽ ഇന്റലിജൻസ് (AI) വകുപ്പിനായി പ്രത്യേക മന്ത്രാലയം രൂപീകരിച്ചു എന്നതും ഈ സർക്കാരിന്റെ വലിയൊരു സവിശേഷതയാണ്. 59 വർഷങ്ങൾക്ക് ശേഷം കോൺഗ്രസ് ഭരണ പങ്കാളിയായതിന് പിന്നാലെ വിസികെയും മുസ്ലിം ലീഗും കൂടി എത്തിയതോടെ ദ്രാവിഡ രാഷ്ട്രീയത്തിൽ പുതിയൊരു സഖ്യകക്ഷി യുഗത്തിനാണ് തമിഴ്നാട് സാക്ഷ്യം വഹിക്കുന്നത്.

---------------

Hindusthan Samachar / Roshith K