Bengaluru, 25 മെയ് (H.S.)

ബെംഗളൂരു: പ്രധാനമന്ത്രി നരേന്ദ്ര മോദിയുടെ സന്ദർശനത്തോടനുബന്ധിച്ച് നിശ്ചയിച്ചിരുന്ന യാത്രാരേഖയ്ക്ക് (കോൺവോയ് റൂട്ട്) സമീപം സ്ഫോടകവസ്തുക്കളായ ജിെലറ്റിൻ കഷ്ണങ്ങൾ കണ്ടെത്തിയ സംഭവത്തിൽ ആറ് പോലീസ് ഉദ്യോഗസ്ഥരെ സസ്പെൻഡ് ചെയ്തു. കനത്ത സുരക്ഷാ വീഴ്ചയാണ് ഉണ്ടായതെന്ന ആഭ്യന്തര അന്വേഷണ റിപ്പോർട്ടിന്റെ അടിസ്ഥാനത്തിലാണ് ബെംഗളൂരു സൗത്ത് (രാമനഗര) ഡിസ്ട്രിക്ട് പോലീസ് സൂപ്രണ്ട് ശ്രീനിവാസ് ഗൗഡ നടപടി സ്വീകരിച്ചത്. സസ്പെൻഷനിലായവരിൽ ഒരു സബ് ഇൻസ്പെക്ടറും അസിസ്റ്റന്റ് സബ് ഇൻസ്പെക്ടറും നാല് കോൺസ്റ്റബിൾമാരും ഉൾപ്പെടുന്നു.

മേയ് 10-നായിരുന്നു പ്രധാനമന്ത്രി നരേന്ദ്ര മോദി ബെംഗളൂരുവിൽ സന്ദർശനം നടത്തിയത്. ബെംഗളൂരുവിന് പുറത്തുള്ള 'ആർട്ട് ഓഫ് ലിവിങ്' ഫൗണ്ടേഷൻ കേന്ദ്രത്തിൽ നടക്കുന്ന ഔദ്യോഗിക പരിപാടിയിൽ പങ്കെടുക്കാനാണ് അദ്ദേഹം എത്തിയത്. എന്നാൽ പ്രധാനമന്ത്രി എത്തുന്നതിന് ഏതാനും മണിക്കൂറുകൾക്ക് മുൻപ്, കനകപുര റോഡിലെ നൈസ് റോഡ് ജംഗ്ഷന് സമീപമുള്ള ഫുട്പാത്തിൽ സംശയാസ്പദമായ രീതിയിൽ ഒരു കാർഡ്ബോർഡ് പെട്ടി കണ്ടെത്തുകയായിരുന്നു. സുരക്ഷാ ഡ്യൂട്ടിയിലുണ്ടായിരുന്ന പോലീസ് കോൺസ്റ്റബിളാണ് ഈ പെട്ടി ആദ്യം ശ്രദ്ധിച്ചത്.

തുടർന്ന് ബോംബ് സ്ക്വാഡും ഫോറൻസിക് വിദഗ്ധരും സ്ഥലത്തെത്തി നടത്തിയ പരിശോധനയിൽ പെട്ടിക്കുള്ളിൽ നിന്ന് രണ്ട് ജിെലറ്റിൻ കഷ്ണങ്ങളും അതോടൊപ്പം വയറുകൾ, ബാറ്ററികൾ, സർക്യൂട്ട് പോലുള്ള ഇലക്ട്രോണിക് ഘടകങ്ങളും കണ്ടെത്തി. പ്രധാനമന്ത്രി പങ്കെടുക്കേണ്ടിയിരുന്ന പ്രധാന വേദിയിൽ നിന്നും ഏകദേശം മൂന്ന് കിലോമീറ്റർ മാത്രം അകലെയായിരുന്നു ഇത്. അതീവ സുരക്ഷാ മേഖലയായി പ്രഖ്യാപിച്ച പാതയിലാണ് ഈ സ്ഫോടകവസ്തുക്കൾ കണ്ടെത്തിയത് എന്നത് വലിയ രീതിയിലുള്ള സുരക്ഷാ ആശങ്കകൾക്ക് വഴിതുറന്നു.

സംഭവത്തെ തുടർന്ന് കഗ്ഗലിപുര പോലീസ് സ്റ്റേഷനിൽ സ്ഫോടകവസ്തു നിരോധന നിയമപ്രകാരം കേസ് രജിസ്റ്റർ ചെയ്യുകയും അന്വേഷണം ഊർജ്ജിതമാക്കുകയും ചെയ്തു. പ്രാഥമിക അന്വേഷണത്തിൽ സുരക്ഷാ ചുമതലയിലുണ്ടായിരുന്ന ഉദ്യോഗസ്ഥരുടെ ഭാഗത്തുനിന്ന് ഗുരുതരമായ വീഴ്ചയും ജാഗ്രതക്കുറവും ഉണ്ടായതായി കണ്ടെത്തി. ഇതേത്തുടർന്നാണ് സാത്തന്നൂർ പോലീസ് സ്റ്റേഷനിലെ സബ് ഇൻസ്പെക്ടർ, കഗ്ഗലിപുര സ്റ്റേഷനിലെ അസിസ്റ്റന്റ് സബ് ഇൻസ്പെക്ടർ എന്നിവരടക്കം ഡ്യൂട്ടിയിലുണ്ടായിരുന്ന ആറ് പേരെ അന്വേഷണവിധേയമായി സസ്പെൻഡ് ചെയ്തത്.

അതേസമയം, ഈ സംഭവത്തെ ചൊല്ലി കർണാടകയിൽ വലിയ രാഷ്ട്രീയ വിവാദവും ഉടലെടുത്തിട്ടുണ്ട്. സംസ്ഥാനത്തെ കോൺഗ്രസ് സർക്കാരിന്റെ കനത്ത പരാജയമാണ് ഇതെന്ന ആരോപണവുമായി ബിജെപി രംഗത്തെത്തി. രാജ്യത്തിന്റെ പ്രധാനമന്ത്രിയുടെ സുരക്ഷയിൽ യാതൊരുവിധ വിട്ടുവീഴ്ചയും ഉണ്ടാകാൻ പാടില്ലായിരുന്നുവെന്നും, കർണാടകയിൽ ക്രമസമാധാനം പൂർണ്ണമായും തകർന്നുവെന്നും ബിജെപി സംസ്ഥാന അധ്യക്ഷൻ ബി.വൈ. വിജയേന്ദ്ര ആരോപിച്ചു. ഈ ഗുരുതരമായ സുരക്ഷാ വീഴ്ചയിൽ സമഗ്രമായ അന്വേഷണം നടത്തി കുറ്റക്കാരെ മാതൃകാപരമായി ശിക്ഷിക്കണമെന്നും അദ്ദേഹം ആവശ്യപ്പെട്ടു.

നിലവിൽ നാഷണൽ ഇൻവെസ്റ്റിഗേഷൻ ഏജൻസിയും (എൻഐഎ), ഇന്റലിജൻസ് ബ്യൂറോയും (ഐബി) സംഭവസ്ഥലം സന്ദർശിച്ച് വിവരങ്ങൾ ശേഖരിച്ചിട്ടുണ്ട്. ജിെലറ്റിൻ കഷ്ണങ്ങൾക്കൊപ്പം സർക്യൂട്ടുകളും വയറുകളും കണ്ടെത്തിയതിനാൽ, ഏതെങ്കിലും തരത്തിലുള്ള അട്ടിമറി ശ്രമങ്ങൾ നടന്നിട്ടുണ്ടോ എന്ന കാര്യമാണ് അന്വേഷണ ഏജൻസികൾ പരിശോധിക്കുന്നത്. സമീപപ്രദേശങ്ങളിലെ സിസിടിവി ദൃശ്യങ്ങൾ കേന്ദ്രീകരിച്ചും പോലീസ് അന്വേഷണം പുരോഗമിക്കുകയാണ്.

---------------

Hindusthan Samachar / Roshith K