Enter your Email Address to subscribe to our newsletters
Thiruvanathapuram, 04 മെയ് (H.S.)
നേമത്ത് വി.ശിവന്കുട്ടി കഴിഞ്ഞ തവണ പൂട്ടിച്ച അക്കൗണ്ട് തുറന്ന് ബിജെപി. ഒ.രാജഗോപാലിനു പിന്നാലെ നേമത്തുനിന്ന് രാജീവ് ചന്ദ്രശേഖര് നിയമസഭയിലേക്ക്. ബിജെപി മത്സരിക്കാന് ഇറങ്ങിയപ്പോള് പൂട്ടും താക്കോലും അവരുടെ കയ്യിലാണെന്നാണ് യുഡിഎഫും എല്ഡിഎഫും പറഞ്ഞത്. നേമത്തിലെയും ചാത്തന്നൂരിലെ ജനങ്ങളും അതിന് കൃത്യമായ മറുപടി നല്കിയിരിക്കുകയാണ്. എന്ഡിഎയുടെ രണ്ട് എംഎല്എമാരെ ജനങ്ങള് തിരഞ്ഞെടുത്തു. ഈ തിരഞ്ഞെടുപ്പ് ഒരു ആന്റി സിപിഎം തിരഞ്ഞെടുപ്പായിരുന്നു. 2025 മുതല് ഞാന് പറഞ്ഞത് എന്ത് കസര്ത്ത് നടത്തിയാലും സിപിഎം ജയിക്കില്ല എന്നാണ്. കാരണം 10 വര്ഷം ഭരിച്ച സിപിഎമ്മിന്റെ അഴിമതിയും ശബരിമല കൊള്ളയും കണ്ട് ജനങ്ങള് മടുത്തു. ജനങ്ങള് അവസരം തന്നതില് സന്തോഷം. ഞാന് ഇന്ന് മുതല് നേമത്തെ ജനങ്ങളുടെ പ്രധാന സേവകനായി മാറും. അവരുടെ എല്ലാ വിഷമങ്ങളും പ്രശ്നങ്ങളും പരിഹരിക്കാന് 24 മണിക്കൂര് പ്രവര്ത്തിക്കും. വിജയത്തിനു പിന്നാലെ മാധ്യമങ്ങളോട് രാജീവ് ചന്ദ്രശേഖര് പറഞ്ഞു.
കേരള രാഷ്ട്രീയത്തിലെ ഇരുമുന്നണി ആധിപത്യത്തിന് ശക്തമായ വെല്ലുവിളി ഉയര്ത്തിക്കൊണ്ട് ബി.ജെ.പി സംസ്ഥാനത്ത് കരുത്തുറ്റ സാന്നിധ്യമായി മാറുന്നു. 2026-ലെ നിയമസഭാ തെരഞ്ഞെടുപ്പ് ഫലങ്ങള് പുറത്തുവന്നപ്പോള് നേമം, കഴക്കൂട്ടം, ചാത്തന്നൂര് എന്നീ മൂന്ന് മണ്ഡലങ്ങളില് വിജയക്കൊടി പാറിച്ചുകൊണ്ട് ബി.ജെ.പി കേരളത്തിന്റെ രാഷ്ട്രീയ ഭൂപടം തിരുത്തിക്കുറിച്ചിരിക്കുകയാണ്. അതേസമയം, കേരള രാഷ്ട്രീയ ചരിത്രത്തില് ഇതിനുമുമ്പ് സംഭവിക്കാത്ത ഒരു അപൂര്വ്വതയ്ക്കാണ് 2026-ലെ നിയമസഭാ തെരഞ്ഞെടുപ്പ് സാക്ഷ്യം വഹിച്ചിരിക്കുന്നത്. നരേന്ദ്ര മോദി മന്ത്രിസഭയിലെ രണ്ട് കേന്ദ്രമന്ത്രിമാര് ഒരേസമയം കേരള നിയമസഭയിലേക്ക് വമ്പന് അട്ടിമറികളിലൂടെ തെരഞ്ഞെടുക്കപ്പെട്ടിരിക്കുന്നത്. രാജീവ് ചന്ദ്രശേഖറും വി. മുരളീധരനും നേടിയ ഈ വിജയം ബി.ജെ.പിക്ക് കേരളത്തില് നല്കുന്നത് പുത്തന് ഉണര്വാണ്.
ചാത്തന്നൂര്
2026-ലെ നിയമസഭാ തെരഞ്ഞെടുപ്പ് ഫലങ്ങള് പുറത്തുവരുമ്പോള് കേരളം ഉറ്റുനോക്കുന്ന ഏറ്റവും വലിയ അട്ടിമറികളിലൊന്ന് കൊല്ലം ജില്ലയിലെ ചാത്തന്നൂരില് സംഭവിച്ചിരിക്കുന്നു. ഇടതുപക്ഷത്തിന്റെയും വലതുപക്ഷത്തിന്റെയും മാറിമാറിയുള്ള ആധിപത്യത്തിന് വിരാമമിട്ടുകൊണ്ട് ബി.ജെ.പി ചാത്തന്നൂരില് അക്കൗണ്ട് തുറന്നു. എന്.ഡി.എ സ്ഥാനാര്ത്ഥി ബി.ബി. ഗോപകുമാറിന്റെ ഉജ്ജ്വല വിജയത്തോടെ കൊല്ലം ജില്ലയില് ആദ്യമായി ബി.ജെ.പി നിയമസഭയിലേക്ക് ഒരു പ്രതിനിധിയെ അയച്ചിരിക്കുകയാണ്.
കഴിഞ്ഞ രണ്ട് നിയമസഭാ തെരഞ്ഞെടുപ്പുകളിലും രണ്ടാം സ്ഥാനത്തെത്തിക്കൊണ്ട് ബി.ജെ.പി ഇവിടെ തങ്ങളുടെ സ്വാധീനം ഉറപ്പിച്ചിരുന്നു. ഇത്തവണ വോട്ടെണ്ണലിന്റെ ആദ്യഘട്ടം മുതല് പുലര്ത്തിയ ലീഡ് അവസാന റൗണ്ടുകളിലും നിലനിര്ത്താന് ബി.ജെ.പിക്ക് കഴിഞ്ഞു. സിറ്റിംഗ് എം.എല്.എയായിരുന്ന ജി.എസ്. ജയലാലിന് മണ്ഡലത്തിലുണ്ടായിരുന്ന ചില പ്രാദേശിക അതൃപ്തികള് ബി.ജെ.പിക്ക് അനുകൂലമായ വോട്ടുകളായി മാറിയെന്നാണ് വിലയിരുത്തല്.
മണ്ഡലത്തിലെ യുവ വോട്ടര്മാര്ക്കിടയില് ബി.ജെ.പി നടത്തിയ കൃത്യമായ പ്രചാരണവും തോട്ടം മേഖലയിലെ തൊഴിലാളികള്ക്കിടയില് ഉണ്ടായ വിള്ളലുകളും ബി.ബി. ഗോപകുമാറിന് തുണയായി. കൂടാതെ, കേന്ദ്ര സര്ക്കാരിന്റെ വികസന പദ്ധതികളുടെ പ്രചാരണവും താഴെത്തട്ടിലുള്ള ബൂത്ത് മാനേജ്മെന്റ് വിജയത്തില് നിര്ണ്ണായക പങ്കുവഹിച്ചു. ഇടതുമുന്നണിയുടെ ഉരുക്കുകോട്ടകളില് ഒന്നായിരുന്ന ചാത്തന്നൂര് കൈവിട്ടത് സി.പി.ഐക്കും എല്.ഡി.എഫിനും വലിയ ആഘാതമാണ്. ബി.ജെ.പി വോട്ട് വര്ദ്ധിപ്പിക്കുമെന്ന് പ്രതീക്ഷിച്ചിരുന്നെങ്കിലും സീറ്റ് പിടിച്ചെടുക്കുമെന്ന് രാഷ്ട്രീയ നിരീക്ഷകര് പോലും കരുതിയിരുന്നില്ല.
കേരള രാഷ്ട്രീയ ചരിത്രത്തില് വീണ്ടും അക്കൗണ്ട് തുറന്ന് ബിജെപി. കടുത്ത പോരാട്ടത്തില് 2002 വോട്ടിന്റെ ഭൂരിപക്ഷത്തില് ചാത്തന്നൂര് നിന്ന് എന്ഡിഎ സ്ഥാനാര്ഥിയായ ബി ബി ഗോപകുമാര് വിജയിച്ചിരിക്കുകയാണ്. ജനം ഉറ്റുനോക്കിയിരുന്ന നേമത്ത് രാജീവ് ചന്ദ്രശേഖര് 3800 വോട്ടിന്റെ ഭൂരിപക്ഷത്തിന് ജയമുറപ്പിച്ചു. അപ്രതീക്ഷിത നേട്ടമാണിവിടെ ബിജെപി നേടിയിരിക്കുന്നത്.
നേമം
കേരള രാഷ്ട്രീയത്തിലെ 'കേരളത്തിന്റെ വാരണാസി' എന്ന് വിശേഷിപ്പിക്കപ്പെടുന്ന നേമം മണ്ഡലം വീണ്ടും ബി.ജെ.പി പിടിച്ചെടുത്തു. വാശിയേറിയ ത്രികോണ പോരാട്ടത്തിനൊടുവില് മുന് കേന്ദ്രമന്ത്രി രാജീവ് ചന്ദ്രശേഖറിലൂടെയാണ് ബി.ജെ.പി നേമത്ത് തങ്ങളുടെ അക്കൗണ്ട് പുനഃസ്ഥാപിച്ചത്. 2016-ല് ഒ. രാജഗോപാലിലൂടെ തുടങ്ങിയ വിജയഗാഥ, 2021-ല് നഷ്ടപ്പെട്ടെങ്കിലും 2026-ല് കൂടുതല് കരുത്തോടെ ബി.ജെ.പി തിരിച്ചുപിടിച്ചിരിക്കുകയാണ്.
തിരുവനന്തപുരം ലോക്സഭാ തെരഞ്ഞെടുപ്പില് ശശി തരൂരിനെ വിറപ്പിച്ച പ്രകടനം കാഴ്ചവെച്ച രാജീവ് ചന്ദ്രശേഖറിനെ നേമത്ത് ഇറക്കിയ ബി.ജെ.പി കേന്ദ്ര നേതൃത്വത്തിന്റെ തന്ത്രം വിജയിച്ചു. അദ്ദേഹത്തിന്റെ വികസന കാഴ്ചപ്പാടുകളും 'മോദി ഗ്യാരന്റി'യിലുള്ള ജനങ്ങളുടെ വിശ്വാസവുമാണ് വിജയത്തിന് പിന്നിലെ പ്രധാന ഘടകങ്ങള്. ഐടി-സാങ്കേതിക മേഖലയിലെ അദ്ദേഹത്തിന്റെ പരിചയസമ്പത്ത് യുവ വോട്ടര്മാരെ ആകര്ഷിക്കുന്നതില് നിര്ണ്ണായകമായി.
യു.ഡി.എഫും എല്.ഡി.എഫും തങ്ങളുടെ കരുത്തരായ സ്ഥാനാര്ത്ഥികളെ ഇറക്കി പ്രതിരോധം തീര്ത്തെങ്കിലും ബി.ജെ.പിയുടെ ബൂത്ത് തലത്തിലുള്ള മൈക്രോ മാനേജ്മെന്റിന് മുന്നില് അവര്ക്ക് കാലിടറി. നഗരസഭാ വാര്ഡുകളിലെ ബി.ജെ.പിയുടെ വലിയ ലീഡ് മറികടക്കാന് എതിരാളികള്ക്കായില്ല. വികസന മുരടിപ്പിനെതിരെയുള്ള ജനവികാരവും കേന്ദ്ര പദ്ധതികളുടെ സ്വാധീനവും രാജീവ് ചന്ദ്രശേഖറിന്റെ ഭൂരിപക്ഷം വര്ധിപ്പിച്ചു..
കഴക്കൂട്ടം
കേരളം ഉറ്റുനോക്കിയ ഏറ്റവും വലിയ പോരാട്ടങ്ങളിലൊന്ന് നടന്ന കഴക്കൂട്ടത്ത് ഒടുവില് ബി.ജെ.പി ചരിത്രം കുറിച്ചു. മുന് കേന്ദ്രമന്ത്രി വി. മുരളീധരന് എല്.ഡി.എഫിന്റെ കരുത്തനായ സ്ഥാനാര്ത്ഥി കടകംപള്ളി സുരേന്ദ്രനെ അട്ടിമറിച്ച് കഴക്കൂട്ടത്ത് വിജയക്കൊടി പാറിച്ചു. വാശിയേറിയ വോട്ടെണ്ണലിനൊടുവില് നേടിയ ഈ വിജയം കേരള രാഷ്ട്രീയത്തിലെ തന്നെ ഏറ്റവും വലിയ അട്ടിമറികളിലൊന്നായാണ് വിലയിരുത്തപ്പെടുന്നത്.
കഴക്കൂട്ടത്തെ ഐടി പ്രൊഫഷണലുകള്ക്കിടയിലും യുവാക്കള്ക്കിടയിലും വി. മുരളീധരന് നടത്തിയ ചിട്ടയായ പ്രവര്ത്തനമാണ് വിജയത്തിന് പിന്നിലെ പ്രധാന ഘടകം. വികസനത്തിന്റെ പുതിയ മുഖമായ ടെക്നോപാര്ക്ക് മേഖലയില് ബി.ജെ.പിക്ക് ലഭിച്ച വന് മുന്നേറ്റം കടകംപള്ളിയുടെ അടിത്തറ ഇളക്കി. കേന്ദ്ര സര്ക്കാരിന്റെ വികസന പദ്ധതികള് നേരിട്ട് വോട്ടര്മാരിലേക്ക് എത്തിക്കാന് അദ്ദേഹത്തിന് സാധിച്ചു.
കഴക്കൂട്ടത്തെ മുന്നിശ്ചയിച്ച വികസനങ്ങളെക്കുറിച്ചുള്ള അവകാശവാദങ്ങളുമായി എല്.ഡി.എഫ് വോട്ടുതേടിയെങ്കിലും, ഭരണവിരുദ്ധ വികാരവും വി. മുരളീധരന്റെ വ്യക്തിപ്രഭാവവും കടകംപള്ളിക്ക് തിരിച്ചടിയായി. മണ്ഡലത്തിലെ ഹൈന്ദവ വോട്ടുകളിലും സമുദായ സമവാക്യങ്ങളിലും ബി.ജെ.പി നടത്തിയ കൃത്യമായ ഇടപെടല് വലിയ ഭൂരിപക്ഷത്തിലേക്ക് അദ്ദേഹത്തെ നയിച്ചു.
യു.ഡി.എഫ് സ്ഥാനാര്ത്ഥി നിര്ണ്ണായകമായ വോട്ടുകള് പിടിച്ചെങ്കിലും ബി.ജെ.പി വോട്ട് ബാങ്കിലേക്ക് വിള്ളല് വീഴ്ത്താന് അവര്ക്കായില്ല. നേമം, ചാത്തന്നൂര് മണ്ഡലങ്ങളിലെ വിജയത്തിന് പിന്നാലെ കഴക്കൂട്ടവും കൈപ്പിടിയിലൊതുക്കിയതോടെ തിരുവനന്തപുരം ജില്ലയില് ബി.ജെ.പി തങ്ങളുടെ ആധിപത്യം ഉറപ്പിച്ചു.
---------------
Hindusthan Samachar / Sreejith S
