Shrinagar, 01 ജൂണ് (H.S.)

ശ്രീനഗർ: ജമ്മു കശ്മീരിലെ ഭരണകക്ഷിയായ നാഷണൽ കോൺഫറൻസ് (എൻ.സി) ജൂൺ 3-ന് അടിയന്തര നിയമസഭാ കക്ഷി യോഗം വിളിച്ചേക്കുമെന്ന് റിപ്പോർട്ടുകൾ. മുഖ്യമന്ത്രി ഒമർ അബ്ദുള്ളയുടെ നേതൃത്വത്തിലുള്ള സഖ്യസർക്കാർ വലിയ രീതിയിലുള്ള ആഭ്യന്തര പ്രതിസന്ധ നേരിടുന്നുണ്ടോ എന്ന തരത്തിലുള്ള ചർച്ചകൾക്കും ഊഹാപോഹങ്ങൾക്കും ഇതോടെ കശ്മീർ രാഷ്ട്രീയത്തിൽ തുടക്കമായിരിക്കുകയാണ്. ജൂൺ 3 ബുധനാഴ്ച ശ്രീനഗറിൽ വെച്ചാണ് നിർണായകമായ ഈ എം.എൽ.എമാരുടെ യോഗം നിശ്ചയിച്ചിരിക്കുന്നത്.

പാർട്ടിക്കുള്ളിലെ ആഭ്യന്തര അസംതൃപ്തിയും സഖ്യകക്ഷികൾക്കിടയിലുള്ള അഭിപ്രായവ്യത്യാസങ്ങളും പരിഹരിക്കാനാണ് മുഖ്യമന്ത്രി ഒമർ അബ്ദുള്ളയുടെ അധ്യക്ഷതയിൽ അടിയന്തരമായി യോഗം ചേരുന്നതെന്നാണ് രാഷ്ട്രീയ വൃത്തങ്ങളിൽ നിന്നുള്ള സൂചന. കഴിഞ്ഞ കുറച്ചുദിവസങ്ങളായി സർക്കാരിന്റെ ചില നയരൂപീകരണങ്ങളുമായി ബന്ധപ്പെട്ട് ഭരണപക്ഷത്തെ ചില എം.എൽ.എമാർ പരസ്യമായി അതൃപ്തി പ്രകടിപ്പിച്ചിരുന്നു. ഇതിന് പിന്നാലെയാണ് എല്ലാ ജനപ്രതിനിധികളോടും നിർബന്ധമായും യോഗത്തിൽ പങ്കെടുക്കണമെന്ന് കാണിച്ച് പാർട്ടി നേതൃത്വം വിപ്പ് നൽകിയിരിക്കുന്നത്.

അതേസമയം, സംസ്ഥാനത്തെ നിലവിലെ ക്രമസമാധാന നിലയും വികസന പ്രവർത്തനങ്ങളുടെ പുരോഗതിയും വിലയിരുത്താനാണ് പതിവ് യോഗം ചേരുന്നതെന്നാണ് നാഷണൽ കോൺഫറൻസ് ഔദ്യോഗികമായി നൽകുന്ന വിശദീകരണം. എന്നാൽ പെട്ടെന്നൊരു ദിവസം അടിയന്തരമായി എം.എൽ.എമാരുടെ യോഗം വിളിച്ചുചേർത്തതിന് പിന്നിൽ ഭരണസിരാകേന്ദ്രങ്ങളിൽ പുകയുന്ന അസ്വാരസ്യങ്ങൾ തന്നെയാണ് കാരണമെന്ന് പ്രതിപക്ഷ കക്ഷികൾ ആരോപിക്കുന്നു. വരാനിരിക്കുന്ന നിർണായക നിയമനിർമ്മാണങ്ങൾക്ക് മുന്നോടിയായി പാർട്ടിയിലെ ഭിന്നസ്വരങ്ങൾ ഇല്ലാതാക്കുക എന്ന ലക്ഷ്യവും ഈ നീക്കത്തിന് പിന്നിലുണ്ടെന്നാണ് വിലയിരുത്തൽ.

സഖ്യസർക്കാരിന്റെ സുഗമമായ മുന്നോട്ടുപോക്കിന് എല്ലാ എം.എൽ.എമാരുടെയും ഐക്യം അനിവാര്യമാണെന്ന് മുഖ്യമന്ത്രി ഒമർ അബ്ദുള്ള യോഗത്തിൽ വ്യക്തമാക്കുമെന്നാണ് അറിയുന്നത്. കശ്മീരിന്റെ പ്രത്യേക പദവികൾ പുനഃസ്ഥാപിക്കുന്നത് ഉൾപ്പെടെയുള്ള രാഷ്ട്രീയ വിഷയങ്ങളിലും സർക്കാരിന്റെ നിലപാടുകൾ യോഗത്തിൽ ചർച്ചയായേക്കും. ജൂൺ 3-ന് നടക്കുന്ന യോഗ തീരുമാനങ്ങൾ ജമ്മു കശ്മീരിലെ ഭരണ മുന്നണിയുടെ ഭാവി നിർണ്ണയിക്കുന്നതിൽ വലിയ പങ്കുവഹിക്കുമെന്നതിനാൽ രാജ്യം മുഴുവൻ ഉറ്റുനോക്കുകയാണ് ഈ രാഷ്ട്രീയ നീക്കത്തെ.

---------------

Hindusthan Samachar / Roshith K