Enter your Email Address to subscribe to our newsletters
New delhi, 10 ജൂണ് (H.S.)
വിമാന ഇന്ധനമായ എ.ടി.എഫിന്റെ വിലയില് 10 ശതമാനം വര്ദ്ധനവ് ഏര്പ്പെടുത്തി. ആഭ്യന്തര വിമാനങ്ങള്ക്കുള്ള ഇന്ധന വില ലിറ്ററിന് 105 രൂപയില് നിന്ന് 115 രൂപയായി ഉയന്നു. പുതിയ വില സ്ഥിരതാ ശൃംഖലയുടെ കീഴില് നടപ്പിലാക്കിയ ഈ വര്ദ്ധനവ് അടുത്ത മൂന്ന് വര്ഷത്തേക്ക് മാറ്റമില്ലാതെ തുടരുമെങ്കിലും യാത്രക്കാര്ക്ക് ഇത് വലിയ സാമ്പത്തിക ബാധ്യതയാകും. വിമാനക്കമ്പനികളുടെ മൊത്തം പ്രവര്ത്തനച്ചെലവിന്റെ 60 ശതമാനവും ഇന്ധനത്തിനായി ചെലവാകുന്നതിനാല്, വര്ദ്ധിച്ച ഈ ബാധ്യത ടിക്കറ്റ് നിരക്കുകളിലൂടെ യാത്രക്കാരിലേക്ക് കൈമാറാനാണ് സാധ്യത.
ഇറാന്-അമേരിക്ക യുദ്ധവും ആഗോള വിപണിയില് ക്രൂഡ് ഓയില് വിലയിലുണ്ടായ വര്ദ്ധനവ് മൂലം വിമാന ഇന്ധന വിലയിലുണ്ടാകുന്ന അനിശ്ചിതത്വം ഒഴിവാക്കാനാണ് നടപടി. ഇതിനായി സര്ക്കാര് 10,000 കോടി രൂപയുടെ ഒരു പ്രത്യേക ഫണ്ട് രൂപീകരിച്ചിട്ടുണ്ട്. അടുത്ത മൂന്ന് വര്ഷത്തേക്ക് ഇന്ധന വില സ്ഥിരമായി നിശ്ചയിക്കുന്നതിലൂടെ വിമാനക്കമ്പനികള്ക്ക് ഇന്ധനച്ചെലവില് കൃത്യത നല്കാനാണ് ഈ സംവിധാനം ലക്ഷ്യമിടുന്നത്. ആഗോളതലത്തില് ഇന്ധനവില നിശ്ചിത പരിധിയിലും ഉയര്ന്നാല് കമ്പനികള്ക്ക് സര്ക്കാര് നഷ്ടപരിഹാരം നല്കും. എന്നാല് വില കുറഞ്ഞാല് അതിന്റെ ഗുണം യാത്രക്കാര്ക്ക് നല്കാതെ സര്ക്കാര് തിരിച്ചെടുക്കുന്ന രീതിയാണിതെന്നും ആക്ഷേപമുണ്ട്.
പശ്ചിമേഷ്യയിലെ സംഘര്ഷങ്ങള് മൂലം ഇന്ധനവില വര്ദ്ധിച്ചതോടെ എയര് ഇന്ത്യയും ഇന്ഡിഗോയും ഉള്പ്പെടെയുള്ള പ്രമുഖ ആഭ്യന്തര വിമാനക്കമ്പനികള് ജൂണ് ഒന്ന് മുതല് തങ്ങളുടെ സര്വീസുകള് വെട്ടിക്കുറയ്ക്കാന് നിര്ബന്ധിതരായിരിക്കുകയാണ്. വര്ദ്ധിച്ചുവരുന്ന പ്രവര്ത്തനച്ചെലവ് മുഴുവനായും ടിക്കറ്റ് നിരക്കിലൂടെ യാത്രക്കാരില് നിന്ന് ഈടാക്കാന് പരിമിതികളുള്ളതിനാലാണ് പല കമ്പനികളും സര്വീസുകള് നിര്ത്തലാക്കുന്നത്. ഇന്ത്യന് വിമാനയാത്ര വിപണിയുടെ 90 ശതമാനവും കൈയാളുന്ന ഈ രണ്ട് കമ്പനികളുടെയും തീരുമാനം യാത്രക്കാരെ സാരമായി ബാധിക്കും. രാജ്യത്തെ ആഭ്യന്തര വിമാന ഗതാഗതത്തെ ഇത് വലിയ തോതില് പിന്നോട്ടടിക്കുമെന്നാണ് വിലയിരുത്തപ്പെടുന്നത്.
പുതിയ റിപ്പോര്ട്ടുകള് പ്രകാരം, എയര് ഇന്ത്യ തങ്ങളുടെ ആഭ്യന്തര സര്വീസുകളില് 22 ശതമാനം വരെ വെട്ടിക്കുറയ്ക്കാന് സാധ്യതയുണ്ടെന്ന് ന്യൂസ് 18 റിപ്പോര്ട്ട് ചെയ്യുന്നു. അതേസമയം ഇന്ഡിഗോ തങ്ങളുടെ സേവനങ്ങളില് അഞ്ച് മുതല് ഏഴ് ശതമാനം വരെ കുറവ് വരുത്താനാണ് പദ്ധതിയിടുന്നത്. പ്രധാന വിമാനക്കമ്പനികളുടെ ഈ പിന്മാറ്റം വിമാനടിക്കറ്റുകളുടെ ലഭ്യത കുറയ്ക്കാനും ബാക്കിയുള്ള സീറ്റുകള്ക്ക് അമിത വില ഈടാക്കാനും കാരണമായേക്കും. ഇന്ധനവില നിയന്ത്രിക്കാനുള്ള സര്ക്കാര് ശ്രമങ്ങള് നടക്കുന്നുണ്ടെങ്കിലും വിമാന സര്വീസുകളുടെ എണ്ണത്തില് ഇത്രയും വലിയ കുറവുണ്ടാകുന്നത് വരും ദിവസങ്ങളില് യാത്രക്കാര്ക്ക് വലിയ വെല്ലുവിളിയായി മാറും.
---------------
Hindusthan Samachar / Sreejith S
