Paris, 14 ജൂണ് (H.S.)

ഫ്രാൻസിൽ നടക്കുന്ന ജി7 ഉച്ചകോടിക്കിടെ പ്രധാനമന്ത്രി നരേന്ദ്ര മോദിയും യുഎസ് പ്രസിഡന്റ് ഡൊണാൾഡ് ട്രംപും തമ്മിൽ നിർണായക കൂടിക്കാഴ്ച നടത്തുമെന്ന് വൈറ്റ് ഹൗസ് സ്ഥിരീകരിച്ചു. ജൂൺ 17-നായിരിക്കും ലോകം ഉറ്റുനോക്കുന്ന ഈ കൂടിക്കാഴ്ച നടക്കുക. 2024 നവംബറിലെ യുഎസ് പ്രസിഡന്റ് തിരഞ്ഞെടുപ്പ് വിജയത്തിന് ശേഷം 2025 ഫെബ്രുവരിയിൽ പ്രധാനമന്ത്രി മോദി ട്രംപിനെ സന്ദർശിച്ചിരുന്നു. അതിനുശേഷം ഇരു നേതാക്കളും തമ്മിൽ നേരിട്ട് നടത്തുന്ന ആദ്യ മുഖാമുഖ ചർച്ചയാണിത് എന്ന പ്രത്യേകതയും ഇതിനുണ്ട്.

ഒമാൻ തീരത്ത് ഇന്ത്യൻ നാവികരുമായി പോയ നിരവധി എണ്ണക്കപ്പലുകൾക്ക് നേരെ യുഎസ് നടത്തിയ ആക്രമണങ്ങളെ തുടർന്ന് ഇരുരാജ്യങ്ങളും തമ്മിലുള്ള ഉഭയകക്ഷി ബന്ധത്തിൽ അല്പം അസ്വാരസ്യങ്ങൾ നിലനടക്കുന്ന പശ്ചാത്തലത്തിലാണ് ഈ കൂടിക്കാഴ്ച നടക്കുന്നത് എന്നത് ഏറെ ശ്രദ്ധേയമാണ്.

ചർച്ചാ വിഷയങ്ങൾ ഇവയാണ്:

പ്രധാനമന്ത്രി മോദിയും ഡൊണാൾഡ് ട്രംപും തമ്മിലുള്ള ചർച്ചയിൽ ഇരുരാജ്യങ്ങളും തമ്മിലുള്ള വ്യാപാരം, ഊർജ്ജ സഹകരണം, എച്ച്-1ബി (H-1B) വിസ നയങ്ങൾ, പ്രാദേശിക സുരക്ഷ, പശ്ചിമേഷ്യയിലെ നിലവിലെ സാഹചര്യങ്ങൾ എന്നിവ പ്രധാന ചർച്ചാവിഷയങ്ങളാകും.

ഇരുരാജ്യങ്ങളും തമ്മിലുള്ള വ്യാപാര കരാറിനെക്കുറിച്ച് മുതിർന്ന യുഎസ് ഉദ്യോഗസ്ഥർ വ്യക്തമാക്കിയത് ഇങ്ങനെയാണ്: ഇന്ത്യയും അമേരിക്കയും തമ്മിലുള്ള ഒരു വലിയ വ്യാപാര കരാറിനുള്ള സാധ്യതകൾ ചർച്ചയിൽ ഉയർന്നുവരും. ഈ വർഷം ആദ്യം നമ്മൾ ഒരു സംയുക്ത ചട്ടക്കൂട് കരാറിൽ ഒപ്പുവെച്ചിരുന്നു. കഴിഞ്ഞ ഒരു വർഷമായി ഇന്ത്യയുമായി വളരെ തീവ്രമായ ചർച്ചകൾ നടക്കുന്നുണ്ട്. വരും ആഴ്ചകളിൽ ഇതിൽ കൂടുതൽ പുരോഗതി കൈവരിക്കാൻ സാധിക്കുമെന്നാണ് പ്രതീക്ഷ. ഇന്ത്യയുടെ വിപണിയിൽ യുഎസ് കമ്പനികൾ നേരിടുന്ന ചില ബുദ്ധിമുട്ടുകൾ പരിഹരിക്കാൻ ശ്രമിക്കുന്നുണ്ട്. ഊർജ്ജം, വ്യാവസായിക ഉൽപന്നങ്ങൾ, ചില കാർഷിക ഉൽപന്നങ്ങൾ എന്നിവ ഇന്ത്യയിലേക്ക് വിൽക്കാൻ അമേരിക്കയ്ക്ക് താൽപ്പര്യമുണ്ട്. എങ്കിലും ജി7 ഉച്ചകോടിയിൽ വെച്ച് മാത്രം ഈ കരാർ പൂർണ്ണമായി ഒപ്പിടില്ല, തുടർന്നും സാങ്കേതിക ചർച്ചകൾ ആവശ്യമുണ്ട്.

ഫ്രാൻസിനും സ്ലൊവാക്യക്കും പ്രത്യേക പ്രാധാന്യം:

ജി7 ഉച്ചകോടിയിൽ പങ്കെടുക്കുന്നതിനായി പ്രധാനമന്ത്രി മോദി ഫ്രാൻസിലേക്കും സ്ലൊവാക്യയിലേക്കുമായി ഒരാഴ്ചത്തെ സന്ദർശനത്തിനായി പുറപ്പെട്ടു കഴിഞ്ഞു. ഫ്രാൻസുമായുള്ള ബന്ധം ഇന്ത്യയുടെ തന്ത്രപ്രധാനമായ കാഴ്ചപ്പാടിൽ വളരെ പ്രത്യേകതയുള്ളതാണെന്ന് യാത്രതിരിക്കുന്നതിന് മുന്നോടിയായി പ്രധാനമന്ത്രി വ്യക്തമാക്കി. ഫ്രഞ്ച് കമ്പനിയായ ദസ്സാൾട്ട് ഏവിയേഷന്റെ റാഫേൽ യുദ്ധവിമാനങ്ങളുടെ പ്രധാന ഉപഭോക്താവാണ് ഇന്ത്യ. കൂടാതെ, ഈ വർഷം ആദ്യം ഫ്രഞ്ച് പ്രസിഡന്റ് ഇമ്മാനുവൽ മാക്രോൺ ഇന്ത്യ സന്ദർശിച്ചപ്പോൾ ഇരുരാജ്യങ്ങളും തമ്മിലുള്ള ബന്ധം 'സ്പെഷ്യൽ ഗ്ലോബൽ സ്ട്രാറ്റജിക് പാർട്ണർഷിപ്പ്' എന്ന നിലയിലേക്ക് ഉയർത്തിയിരുന്നു.

തുടർച്ചയായ എട്ടാം തവണയാണ് ഇന്ത്യയെ ജി7 ഉച്ചകോടിയിലേക്ക് ക്ഷണിക്കുന്നത്. ഉച്ചകോടിയിൽ ഇന്ത്യ സ്വന്തം നിലപാടുകൾ മാത്രമല്ല, മറിച്ച് ആഗോള തെക്കിന്റെ (Global South) ആവശ്യങ്ങളും ശബ്ദവും കൂടിയായിരിക്കുമെന്നും മോദി കൂട്ടിച്ചേർത്തു. ജൂൺ 16, 17 തീയതികളിൽ ഫ്രാൻസിലെ എവിയാനിലാണ് ജി7 ഉച്ചകോടി നടക്കുന്നത്. ഇതിനുശേഷം പ്രധാനമന്ത്രി നടത്തുന്ന സ്ലൊവാക്യ സന്ദർശനവും ചരിത്രപ്രാധാന്യമുള്ളതാണ്. 1993-ൽ സ്ലൊവാക്യ സ്വാതന്ത്ര്യം നേടിയ ശേഷം ആദ്യമായാണ് ഒരു ഇന്ത്യൻ പ്രധാനമന്ത്രി അവിടെ സന്ദർശനം നടത്തുന്നത്.

ഹോർമുസ് കടലിടുക്കും ഇറാൻ യുദ്ധവും ചർച്ചയാകും:

ജി7 ഉച്ചകോടിയുടെ ഭാഗമായി മറ്റ് സഖ്യകക്ഷികളുമായി ചേർന്ന് ഹോർമുസ് കടലിടുക്കിലെ മൈനുകൾ നീക്കം ചെയ്യുന്നതിനെക്കുറിച്ച് ട്രംപ് ചർച്ച ചെയ്യുമെന്നാണ് വൈറ്റ് ഹൗസ് വൃത്തങ്ങൾ നൽകുന്ന സൂചന. ജി7 അംഗങ്ങളായ ബ്രിട്ടനും ഫ്രാൻസും ഇതിന് സഹായം വാഗ്ദാനം ചെയ്തിട്ടുണ്ട്. കൂടാതെ ഇറാൻ യുദ്ധം അവസാനിപ്പിക്കുന്നതിനുള്ള ശ്രമങ്ങളുടെ ഭാഗമായി ഈജിപ്ത്, ഖത്തർ, യുഎഇ എന്നീ രാജ്യങ്ങളിലെ നേതാക്കളുമായും ട്രംപ് പ്രത്യേക ചർച്ചകൾ നടത്തും.

---------------

Hindusthan Samachar / Roshith K