Kolkota, 14 ജൂണ് (H.S.)

കൊൽക്കത്ത/ന്യൂഡൽഹി: പശ്ചിമ ബംഗാൾ ഭരണകക്ഷിയായ തൃണമൂൽ കോൺഗ്രസിനെ (ടി.എം.സി) പിടിച്ചുലച്ചുകൊണ്ട് പാർട്ടിയിലെ മുതിർന്ന നേതാവും എം.പിയുമായ സുദീപ് ബന്ദേോപാധ്യായ വിമത ചേരിയിൽ ചേർന്നു. പശ്ചിമ ബംഗാൾ മുഖ്യമന്ത്രി മമത ബാനർജിക്ക് കനത്ത ആഘാതം സൃഷ്ടിച്ചുകൊണ്ടാണ് പാർട്ടിയിലെ ഈ പുതിയ നീക്കം. വിമത എം.പി ശതാബ്ദി റോയിക്കൊപ്പം ശനിയാഴ്ച ഡൽഹിയിലെത്തിയ സുദീപ് ബന്ദേോപാധ്യായ, കേന്ദ്രമന്ത്രിയും മുതിർന്ന ബി.ജെ.പി നേതാവുമായ ഭൂപേന്ദർ യാദവിന്റെ വസതി സന്ദർശിച്ച് ചർച്ച നടത്തി. ഇതിനുപിന്നാലെ കേന്ദ്ര ആഭ്യന്തരമന്ത്രി അമിത് ഷായുമായും അദ്ദേഹം കൂടിക്കാഴ്ച നടത്തിയതായാണ് വിവരങ്ങൾ.

ഭരണകക്ഷിയായ ബി.ജെ.പി നയിക്കുന്ന എൻ.ഡി.എ സഖ്യത്തെ പിന്തുണയ്ക്കാനും ലോക്സഭയിൽ തങ്ങളെ പ്രത്യേക ബ്ലോക്കായി അംഗീകരിക്കാനും ആവശ്യപ്പെട്ട് വിമതർ തിങ്കളാഴ്ച സ്പീക്കർ ഓം ബിർളയെ കാണാൻ ഇരിക്കെയാണ് സുദീപ് ബന്ദേോപാധ്യായയുടെ ഈ നിർണായക നീക്കം.

ലോക്സഭയിൽ പ്രത്യേക ബ്ലോക്കിനായി അവകാശവാദം; 19 എം.പിമാരുടെ പിന്തുണ

പശ്ചിമ ബംഗാൾ നിയമസഭാ തെരഞ്ഞെടുപ്പിലെ പരാജയത്തിന് പിന്നാലെയാണ് തൃണമൂൽ കോൺഗ്രസിൽ വൻ ജനപ്രതിനിധി കലാപം പൊട്ടിപ്പുറപ്പെട്ടത്. നിലവിൽ 19 ലോക്സഭാ എം.പിമാരുടെ പിന്തുണ തങ്ങൾക്കുണ്ടെന്നാണ് വിമത ചേരി അവകാശപ്പെടുന്നത്. കാക്കോലി ഘോഷ് ദസ്തിദാറിന്റെ നേതൃത്വത്തിൽ പ്രത്യേക പാർലമെന്ററി ഗ്രൂപ്പ് രൂപീകരിക്കാനാണ് ഇവരുടെ നീക്കം. തങ്ങളുടെ രാഷ്ട്രീയ വ്യക്തിത്വം നിലനിർത്തിക്കൊണ്ടുതന്നെ കേന്ദ്രത്തിലെ എൻ.ഡി.എ സർക്കാരിനെ പിന്തുണയ്ക്കുമെന്ന് ഇവർ വ്യക്തമാക്കിയിട്ടുണ്ട്.

തിങ്കളാഴ്ച സ്പീക്കറെ നേരിട്ട് കണ്ട് ഔദ്യോഗികമായി അവകാശവാദം ഉന്നയിക്കുമെന്ന് വിമത എം.പി ജഗദീഷ് ചന്ദ്ര വർമ്മ ബസുനിയ സ്ഥിരീകരിച്ചു. ജൂൺ 8 മുതൽ ഒപ്പുശേഖരണം ആരംഭിച്ചതായും ഇതിനോടകം 19 എം.പിമാർ കത്തിൽ ഒപ്പുവെച്ചതായും അദ്ദേഹം അറിയിച്ചു. കൂടിക്കാഴ്ചയ്ക്ക് മുന്നോടിയായി ഇരുപതോളം വിമത എം.പിമാർ ഡൽഹിയിൽ എത്തിച്ചേരുമെന്നാണ് റിപ്പോർട്ടുകൾ. യൂസഫ് പത്താൻ, ദീപക് അധികാരി (ദേവ്), നടിമാരായ രചന ബാനർജി, സായോനി ഘോഷ്, ജൂൺ മാലിയ തുടങ്ങിയ പ്രമുഖരുടെ പേരുകളും ഈ വിമത പട്ടികയിലുണ്ടെന്നാണ് സോഷ്യൽ മീഡിയയിൽ പ്രചരിക്കുന്ന വിവരങ്ങൾ.

വിമത നീക്കത്തിന് നിയമസാധുതയില്ലെന്ന് തൃണമൂൽ; കടുത്ത വിമർശനവുമായി മഹുവ മൊയ്ത്ര

അതേസമയം വിമതരുടെ നീക്കങ്ങൾക്ക് യാതൊരുവിധ നിയമസാധുതയുമില്ലെന്ന് തൃണമൂൽ കോൺഗ്രസ് ഔദ്യോഗികമായി പ്രതികരിച്ചു. വിമത എം.പിമാർക്കെതിരെ കടുത്ത ഭാഷയിലാണ് പാർട്ടി നേതാവ് മഹുവ മൊയ്ത്ര രംഗത്തെത്തിയത്. ഭരണഘടനയുടെ 91-ാം ഭേദഗതി പ്രകാരം പാർട്ടി പിളർത്തുന്നതിനോ പ്രത്യേക ബ്ലോക്ക് ഉണ്ടാക്കുന്നതിനോ നിലവിൽ നിയമപരമായ വ്യവസ്ഥകളില്ലെന്ന് മഹുവ മൊയ്ത്ര ഓർമ്മിപ്പിച്ചു.

കൂറുമാറിയ ടി.എം.സി ജനപ്രതിനിധികൾക്ക് നിയമം അറിയില്ല. അംഗങ്ങളുടെ എണ്ണമല്ല ഇവിടെ പ്രധാനം, ഒരു രാഷ്ട്രീയ പാർട്ടിയിൽ നിന്ന് മാറി നിൽക്കണമെങ്കിൽ യഥാർത്ഥ പാർട്ടിയുടെ മൂന്നിൽ രണ്ട് (2/3) ഭാഗം അംഗങ്ങൾ മറ്റൊരു പാർട്ടിയിൽ ലയിക്കുക തന്നെ വേണം. അതുകൊണ്ട് ഈ 19 ചതിയന്മാരും എം.പി സ്ഥാനം രാജിവെച്ച് ബി.ജെ.പി ടിക്കറ്റിൽ വീണ്ടും മത്സരിക്കുകയാണ് വേണ്ടത്. - മഹുവ മൊയ്ത്ര തൻ്റെ എക്സ് (ട്വിറ്റർ) ഹാൻഡിലിൽ കുറിച്ചു.

സോഷ്യൽ മീഡിയയിൽ പ്രചരിക്കുന്ന എം.പിമാരുടെ ഒപ്പുകൾ വ്യാജമാണോ എന്ന് പരിശോധിക്കാൻ ലോക്സഭാ സെക്രട്ടേറിയറ്റിലുള്ള യഥാർത്ഥ ഒപ്പുകളുമായി ഒത്തുനോക്കണമെന്ന് ടി.എം.സി നേതാവ് കുനാൽ ഘോഷ് ആവശ്യപ്പെട്ടു.

'ഓപ്പറേഷൻ ലോട്ടസ്' എന്ന് കീർത്തി ആസാദ്

കേന്ദ്ര ആഭ്യന്തരമന്ത്രി അമിത് ഷായുടെ നേതൃത്വത്തിൽ ബി.ജെ.പി തൃണമൂൽ കോൺഗ്രസിനെ തകർക്കാൻ 'ഓപ്പറേഷൻ ലോട്ടസ്' നടത്തുകയാണെന്ന് ടി.എം.സി എം.പി കീർത്തി ആസാദ് ആരോപിച്ചു. എന്നാൽ പാർട്ടിയെ പിളർത്താനുള്ള ബി.ജെ.പിയുടെ ഈ ശ്രമങ്ങൾ ഇതുവരെ വിജയിച്ചിട്ടില്ലെന്നും അദ്ദേഹം അവകാശപ്പെട്ടു. നിലവിൽ 28 ലോക്സഭാ അംഗങ്ങളും 13 രാജ്യസഭാ അംഗങ്ങളുമാണ് തൃണമൂലിനുള്ളത്. ഇതിൽ മൂന്ന് രാജ്യസഭാ അംഗങ്ങൾ ഇതിനോടകം രാജി സമർപ്പിച്ചു കഴിഞ്ഞു. അടുത്തിടെയുണ്ടായ ഏറ്റവും വലിയ ആഭ്യന്തര രാഷ്ട്രീയ പ്രതിസന്ധിയിലൂടെയാണ് മമത ബാനർജിയും തൃണമൂൽ കോൺഗ്രസും ഇപ്പോൾ കടന്നുപോകുന്നത്.

---------------

Hindusthan Samachar / Roshith K