Washington, 05 ജൂണ് (H.S.)

വാഷിംഗ്ടൺ: ഇന്ത്യയുമായുള്ള തന്ത്രപ്രധാനമായ വ്യാപാരക്കരാർ (Trade Deal) അമേരിക്ക ഉടൻ തന്നെ യാഥാർത്ഥ്യമാക്കുമെന്ന് യു.എസ് പ്രസിഡന്റ് ഡൊണാൾഡ് ട്രംപ്. ഇന്ത്യൻ പ്രധാനമന്ത്രി നരേന്ദ്ര മോദി തന്റെ 'നല്ല സുഹൃത്ത്' ആണെന്ന് വ്യക്തമാക്കിയ ട്രംപ്, ഇരുരാജ്യങ്ങളും തമ്മിലുള്ള ഉഭയകക്ഷി ചർച്ചകൾ ശുഭകരമായ രീതിയിലാണ് മുന്നോട്ട് പോകുന്നതെന്നും വൈകാതെ തന്നെ കരാറിലെത്താൻ സാധിക്കുമെന്നും പ്രത്യാശ പ്രകടിപ്പിച്ചു. വൈറ്റ് ഹൗസിലെ ഓവൽ ഓഫീസിൽ മാധ്യമപ്രവർത്തകരോട് സംസാരിക്കവെയാണ് ട്രംപിന്റെ ഈ നിർണ്ണായക വെളിപ്പെടുത്തൽ.

ഇരുരാജ്യങ്ങളും തമ്മിലുള്ള വ്യാപാരക്കരാറിന്റെ ആദ്യഘട്ട ചർച്ചകൾ പൂർത്തിയാക്കാൻ യു.എസ് പ്രതിനിധി സംഘം ഇന്ത്യയിൽ നടത്തിയ നാല് ദിവസത്തെ സന്ദർശനം വിജയകരമായി അവസാനിച്ചതിന് തൊട്ടുപിന്നാലെയാണ് ട്രംപിന്റെ പ്രതികരണം പുറത്തുവരുന്നത്.

'മുമ്പ് ഇന്ത്യ കരം ഈടാക്കി, ഇപ്പോൾ അമേരിക്ക ലാഭത്തിലാണ്'

മുൻകാലങ്ങളിൽ യു.എസ് കമ്പനികൾക്കെതിരെ ഇന്ത്യ വലിയ തോതിൽ നികുതി ചുമത്തിയിരുന്നതായി ട്രംപ് ഓർമ്മിപ്പിച്ചു. എന്നാൽ നിലവിൽ ആ സാഹചര്യം മാറിയെന്നും അമേരിക്കയിപ്പോൾ ഇന്ത്യയുമായുള്ള വ്യാപാരത്തിലൂടെ മികച്ച നേട്ടമുണ്ടാക്കുന്നുണ്ടെന്നും അദ്ദേഹം അവകാശപ്പെട്ടു.

അവർ നമ്മുടെ കമ്പനികൾക്ക് മേൽ വൻതോതിൽ നികുതി ചുമത്തിയിരുന്നു, എന്നാൽ നമ്മൾ അവർക്ക് മേൽ യാതൊരു നികുതിയും ചുമത്തിയിരുന്നില്ല. എന്നാൽ ഇപ്പോൾ സാഹചര്യം നേരെ വിപരീതമാണ്. അമേരിക്കയിപ്പോൾ ഇന്ത്യയുമായി ചേർന്ന് വലിയ രീതിയിൽ പണം സമ്പാദിക്കുന്നുണ്ട്. ഞങ്ങൾ വൈകാതെ തന്നെ ഒരു കരാറിലെത്തും. കാരണം നിങ്ങളുടെ പ്രധാനമന്ത്രിയെ എനിക്ക് ഒരുപാട് ഇഷ്ടമാണ്. അദ്ദേഹം എന്റെ നല്ലൊരു സുഹൃത്താണ്. ഞങ്ങൾക്കിടയിൽ മികച്ച സൗഹൃദമാണുള്ളത്, അതിനാൽ തന്നെ ഞങ്ങൾ ഈ കരാർ യാഥാർത്ഥ്യമാക്കുക തന്നെ ചെയ്യും. - ഡൊണാൾഡ് ട്രംപ് പറഞ്ഞു.

തടസ്സങ്ങൾ നീക്കി ഇരുരാജ്യങ്ങളും; കരാർ അവസാന ഘട്ടത്തിൽ

ഫെബ്രുവരി ആദ്യം പ്രധാനമന്ത്രി നരേന്ദ്ര മോദിയും ട്രംപും തമ്മിൽ നടത്തിയ ടെലിഫോൺ സംഭാഷണത്തിന് ശേഷമാണ് ഉഭയകക്ഷി വ്യാപാരക്കരാറിന്റെ (BTA) ആദ്യ ഘട്ടത്തിന് രൂപരേഖയായത്. റഷ്യൻ എണ്ണ വാങ്ങുന്നതിന് ഇന്ത്യക്ക് മേൽ ചുമത്തിയിരുന്ന 25 ശതമാനം നികുതി ഒഴിവാക്കാനും മറ്റ് നികുതികൾ 18 ശതമാനമായി കുറയ്ക്കാനും ഇതിൽ നിർദേശമുണ്ടായിരുന്നു. എന്നാൽ യു.എസ് സുപ്രീം കോടതിയുടെ ചില വിധികൾക്ക് പിന്നാലെ നികുതി നിരക്കുകളിൽ ചില മാറ്റങ്ങൾ വരുത്തേണ്ടി വരികയും ഇരുരാജ്യങ്ങളും കരാർ വീണ്ടും ചർച്ച ചെയ്യുകയുമായിരുന്നു.

ഇതിന്റെ ഭാഗമായി ഏപ്രിലിൽ ഇന്ത്യൻ വാണിജ്യ മന്ത്രാലയ അഡീഷണൽ സെക്രട്ടറി ദർപ്പൻ ജെയിന്റെ നേതൃത്വത്തിലുള്ള സംഘം അമേരിക്ക സന്ദർശിച്ചിരുന്നു. തൊട്ടുപിന്നാലെ ജൂൺ 1 മുതൽ 4 വരെ ബ്രണ്ടൻ ലിഞ്ചിന്റെ നേതൃത്വത്തിലുള്ള യു.എസ് സംഘം ഇന്ത്യയിലെത്തി ചർച്ചകൾ തുടർന്നു.

ഇന്ത്യൻ കേന്ദ്രങ്ങളെ സംബന്ധിച്ചിടത്തോളം വ്യാപാരക്കരാർ ഏതാണ്ട് പൂർണ്ണമായും തയ്യാറായിക്കഴിഞ്ഞു. ചെറിയ സാങ്കേതിക തിരുത്തലുകൾ മാത്രമാണ് ഇനി അവശേഷിക്കുന്നത്. കരാർ അവസാന ഘട്ടത്തിലാണെന്നും 'കോമകളും ഫുൾസ്റ്റോപ്പുകളും' മാത്രമാണ് ഇനി ചർച്ച ചെയ്യാനുള്ളതെന്നുമാണ് ഇന്ത്യൻ വാണിജ്യ വ്യവസായ മന്ത്രി പിയൂഷ് ഗോയൽ നേരത്തെ വ്യക്തമാക്കിയത്. ട്രംപിന്റെ പുതിയ പ്രസ്താവന കൂടിയായതോടെ, ഏറെ നാളായി രാജ്യാന്തര സമൂഹം ഉറ്റുനോക്കുന്ന ഇന്ത്യ-യു.എസ് വ്യാപാരക്കരാർ വരും ദിവസങ്ങളിൽ തന്നെ ഒപ്പുവെക്കുമെന്നാണ് സൂചന.

---------------

Hindusthan Samachar / Roshith K