Mumbai , 02 ജൂലൈ (H.S.)

മുംബൈ: മഹാരാഷ്ട്രയുടെ വിവിധ ഭാഗങ്ങളിൽ കനത്ത മഴ തുടരുന്ന പശ്ചാത്തലത്തിൽ മുൻകരുതൽ നടപടിയായി പൻവേൽ, ഉറൻ, പാൽഘർ, റായ്ഗഡ് എന്നീ പ്രദേശങ്ങളിലെ സ്കൂളുകൾക്കും കോളേജുകൾക്കും പ്രാദേശിക ഭരണകൂടങ്ങൾ അവധി പ്രഖ്യാപിച്ചു. കനത്ത ജലക്കെട്ടും യാത്രയിലെ ബുദ്ധിമുട്ടുകളും കണക്കിലെടുത്താണ് തീരുമാനം. ഈ പ്രദേശങ്ങളിൽ വെള്ളപ്പൊക്ക സാഹചര്യം മാറി ജനജീവിതം സാധാരണ നിലയിലായ ശേഷം മാത്രമേ ക്ലാസുകൾ പുനരാരംഭിക്കുകയുള്ളൂ എന്ന് അധികൃതർ വ്യക്തമാക്കി.

അതേസമയം, ബൃഹൻമുംബൈ മുൻസിപ്പൽ കോർപ്പറേഷൻ (BMC), നവി മുംബൈ മുൻസിപ്പൽ കോർപ്പറേഷൻ (NMMC), കല്യാൺ-ഡോംബിവ്ലി മുൻസിപ്പൽ കോർപ്പറേഷൻ (KDMC), താനെ മുൻസിപ്പൽ കോർപ്പറേഷൻ (TMC) എന്നിവയുടെ പരിധിയിലുള്ള വിദ്യാലയങ്ങൾ സാധാരണ നിലയിൽ പ്രവർത്തിക്കും. ഈ നഗരങ്ങളിൽ നിലവിൽ സ്കൂളുകൾ അടച്ചിടാൻ ഉത്തരവിട്ടിട്ടില്ല.

ഗതാഗത തടസ്സവും ജനജീവിതവും

മുംബൈയിലും പരിസര പ്രദേശങ്ങളിലും പെയ്ത കനത്ത മഴ നഗരത്തെ വലിയ രീതിയിൽ പ്രതിസന്ധിയിലാക്കിയിരിക്കുകയാണ്. വോർലി, ബാന്ദ്ര-കുർള കോംപ്ലക്സ്, ജോഗേശ്വരി, മുംബ്ര, നവി മുംബൈയുടെ ചില ഭാഗങ്ങൾ എന്നിവിടങ്ങളിൽ റോഡുകളിൽ വൻതോതിൽ വെള്ളം ഉയർന്നതിനെത്തുടർന്ന് കനത്ത ഗതാഗതക്കുരുക്കാണ് അനുഭവപ്പെടുന്നത്. ഇത് ഓഫീസുകളിലേക്കും മറ്റും പോകുന്ന യാത്രക്കാരെ കാര്യമായി ബാധിച്ചു.

റോഡ് ഗതാഗതത്തിന് പുറമെ മുംബൈയിലെ ലോക്കൽ ട്രെയിൻ സർവീസുകളെയും മഴ ബാധിച്ചിട്ടുണ്ട്. ഹാർബർ ലൈനിൽ ഓവർഹെഡ് വയർ പൊട്ടി വീണതിനെ തുടർന്ന് ട്രെയിൻ സർവീസുകൾ തടസ്സപ്പെടുകയോ വൈകിയോ ആണ് ഓടുന്നത്. കനത്ത മഴയെത്തുടർന്ന് മുംബൈയിലേക്ക് വരേണ്ടിയിരുന്ന മൂന്ന് വിമാനങ്ങൾ മറ്റ് വിമാനത്താവളങ്ങളിലേക്ക് തിരിച്ചുവിട്ടെങ്കിലും പിന്നീട് ഇവ മുംബൈയിൽ തന്നെ സുരക്ഷിതമായി തിരിച്ചെത്തിയതായി അധികൃതർ അറിയിച്ചു.

റെക്കോർഡ് മഴ: കണക്കുകൾ ഇങ്ങനെ

ഇന്ത്യൻ കാലാവസ്ഥാ വകുപ്പിൻ്റെ (IMD) റിപ്പോർട്ട് അനുസരിച്ച്, മുംബൈയിലും പ്രാന്തപ്രദേശങ്ങളിലും അടുത്ത 24 മണിക്കൂറിനുള്ളിൽ ശക്തമായ കാറ്റോടുകൂടിയ കനത്തതോ അതിശക്തമായതോ ആയ മഴ പെയ്യാൻ സാധ്യതയുണ്ട്.

ബിഎംസിയുടെ മൺസൂൺ റിപ്പോർട്ട് പ്രകാരം, മൺസൂൺ ശക്തിപ്രാപിച്ചതോടെ മുംബൈ നഗരത്തിൽ ശരാശരി 49 മില്ലിമീറ്റർ മഴ രേഖപ്പെടുത്തിയപ്പോൾ, കിഴക്കൻ പ്രാന്തപ്രദേശങ്ങളിൽ 99 മില്ലിമീറ്ററും പടിഞ്ഞാറൻ പ്രാന്തപ്രദേശങ്ങളിൽ 90 മില്ലിമീറ്ററും മഴ ലഭിച്ചു. ഐഎംഡിയുടെ കൊളാബ ഒബ്സർവേറ്ററിയിൽ 30 മില്ലിമീറ്ററും സാന്താക്രൂസ് ഒബ്സർവേറ്ററിയിൽ 108 മില്ലിമീറ്ററും മഴയാണ് രേഖപ്പെടുത്തിയത്. വിക്രോളിയിലെ ടാഗോർ നഗർ മുൻസിപ്പൽ സ്കൂളിലാണ് ഏറ്റവും ഉയർന്ന മഴ (146.4 മില്ലിമീറ്റർ) ലഭിച്ചത്. പവായിലെ പാസ്പോളി മുൻസിപ്പൽ സ്കൂളിൽ 142.8 മില്ലിമീറ്ററും ഭാണ്ഡുപിൽ 141.6 മില്ലിമീറ്ററും മഴ രേഖപ്പെടുത്തിയിട്ടുണ്ട്.

താഴ്ന്ന പ്രദേശങ്ങൾ വെള്ളത്തിനടിയിൽ

നഗരത്തിലെ പല താഴ്ന്ന പ്രദേശങ്ങളും പൂർണ്ണമായും വെള്ളത്തിനടിയിലായി. അന്ധേരി, സാന്താക്രൂസ്, ഖാർ, ബാന്ദ്ര, കുർള, വിക്രോളി, പൊവായ്, ഘാട്കോപ്പർ, ഭാണ്ഡുപ്, മുലുണ്ട് തുടങ്ങിയ സ്ഥലങ്ങളിൽ നിന്ന് വെള്ളപ്പൊക്കത്തെക്കുറിച്ച് നിരവധി പരാതികളാണ് കോർപ്പറേഷന് ലഭിച്ചത്. ഉച്ചയ്ക്ക് ഉണ്ടായ 4.16 മീറ്റർ ഉയരത്തിലുള്ള വേലിയേറ്റം (High Tide) നഗരത്തിലെ വെള്ളക്കെട്ടിൻ്റെ തീവ്രത വർദ്ധിപ്പിച്ചു. പൊതുഗതാഗത സംവിധാനങ്ങൾ ഇപ്പോഴും പ്രവർത്തിക്കുന്നുണ്ടെങ്കിലും സർവീസുകൾ ഏറെ വൈകിയാണ് ഓടുന്നത്. ജനങ്ങൾ അനാവശ്യമായി പുറത്തിറങ്ങരുതെന്നും ജാഗ്രത പാലിക്കണമെന്നും ഭരണകൂടം കർശന നിർദേശം നൽകിയിട്ടുണ്ട്.

---------------

Hindusthan Samachar / Roshith K