Newdelhi, 20 ജൂലൈ (H.S.)

ന്യൂഡൽഹി: പാർലമെന്റിന്റെ വർഷകാല സമ്മേളനത്തിന് തുടക്കം കുറിക്കുന്നതിന് മുന്നോടിയായി മാധ്യമങ്ങളെ അഭിസംബോധന ചെയ്യവെ, കോൺഗ്രസ് നേതാവും പ്രതിപക്ഷ എംപിയുമായ രാഹുൽ ഗാന്ധിക്കെതിരെ കടുത്ത പരോക്ഷ പരിഹാസവുമായി പ്രധാനമന്ത്രി നരേന്ദ്ര മോദി. ഹൈദരാബാദ് ആസ്ഥാനമായി പ്രവർത്തിക്കുന്ന സ്പേസ് സ്റ്റാർട്ടപ്പായ 'സ്കൈറൂട്ട് എയറോസ്പേസി'ന്റെ (Skyroot Aerospace) വിജയകരമായ റോക്കറ്റ് വിക്ഷേപണത്തെ അഭിനന്ദിക്കുന്നതിനിടയിലാണ് പ്രധാനമന്ത്രി രാഹുൽ ഗാന്ധിയെ ലക്ഷ്യമിട്ട് പരാമർശം നടത്തിയത്.

രാജ്യത്തെ യുവാക്കളുടെ കഠിനാധ്വാനത്തെയും നേട്ടങ്ങളെയും പ്രശംസിച്ച പ്രധാനമന്ത്രി, സ്കൈറൂട്ട് സ്റ്റാർട്ടപ്പിലെ ജീവനക്കാരുടെ ശരാശരി പ്രായം വെറും 28 വയസ്സ് മാത്രമാണെന്ന് ചൂണ്ടിക്കാട്ടി. ഇന്ത്യയിലെ യുവതലമുറ ബഹിരാകാശ മേഖലയിലേക്ക് പുതിയൊരു കുതിച്ചുചാട്ടം നടത്തിയിരിക്കുകയാണ്. സ്കൈറൂട്ട് സ്റ്റാർട്ടപ്പിൽ പ്രവർത്തിക്കുന്ന മുഴുവൻ ടീമിന്റെയും ശരാശരി പ്രായം വെറും 28 വയസ്സ് മാത്രമാണെന്നാണ് എന്നോട് പറഞ്ഞത്. ഇത്രയും പ്രായം കുറഞ്ഞ യുവാക്കളാണ് ഈ വലിയ നേട്ടം കൈവരിച്ചിരിക്കുന്നത്. അല്ലാതെ, ഞാൻ ഈ 56 വയസ്സുള്ള ഒരു 'യുവാവിനെ'ക്കുറിച്ചല്ല സംസാരിക്കുന്നത്, എന്നായിരുന്നു പ്രധാനമന്ത്രിയുടെ വാക്കുകൾ. രാഹുൽ ഗാന്ധിയെ പലപ്പോഴും 'യുവനേതാവ്' എന്ന് കോൺഗ്രസ് വിശേഷിപ്പിക്കുന്നതിനെ മുൻനിർത്തിയായിരുന്നു പ്രധാനമന്ത്രിയുടെ ഈ ട്രോൾ.

ശാസ്ത്രം, നവീകരണം, ബഹിരാകാശ സാങ്കേതികവിദ്യ എന്നിവയിൽ ഇന്ത്യ കൈവരിച്ചുകൊണ്ടിരിക്കുന്ന മുന്നേറ്റങ്ങളെ പ്രധാനമന്ത്രി തന്റെ പ്രസംഗത്തിൽ എടുത്തുപറഞ്ഞു. കഴിഞ്ഞ ഒരു മാസത്തിനിടെ അന്താരാഷ്ട്ര തലത്തിൽ ഇന്ത്യയുടെ പ്രതിച്ഛായ വർദ്ധിപ്പിക്കുന്ന നിരവധി നേട്ടങ്ങൾ രാജ്യം സ്വന്തമാക്കിയിട്ടുണ്ടെന്ന് അദ്ദേഹം അവകാശപ്പെട്ടു. ഒരു ഇന്ത്യൻ പൗരൻ അന്താരാഷ്ട്ര ബഹിരാകാശ നിലയത്തിൽ (ISS) എത്തിയതും, സ്കൈറൂട്ട് പോലെയുള്ള സ്വകാര്യ സ്റ്റാർട്ടപ്പുകൾ ബഹിരാകാശ രംഗത്ത് വിപ്ലവം സൃഷ്ടിക്കുന്നതും രാജ്യത്തിന് അഭിമാനകരമായ നിമിഷങ്ങളാണെന്ന് മോദി കൂട്ടിച്ചേർത്തു. ഇന്ത്യയിലെ യുവാക്കളുടെ കഴിവും ആഗ്രഹങ്ങളും ബഹിരാകാശത്തോളം അതിരുകളില്ലാത്തതാണെന്നതിന്റെ തെളിവാണ് ഇതെന്നും അദ്ദേഹം പറഞ്ഞു.

ഇതോടൊപ്പം, ആരംഭിക്കാനിരിക്കുന്ന പാർലമെന്റ് സമ്മേളനം അർത്ഥവത്തും ഫലപ്രദവുമായിരിക്കുമെന്ന് താൻ പ്രതീക്ഷിക്കുന്നതായും പ്രധാനമന്ത്രി വ്യക്തമാക്കി. വർഷകാലവും വർഷകാല സമ്മേളനവും തമ്മിൽ ഉപമിച്ചുകൊണ്ടായിരുന്നു അദ്ദേഹത്തിന്റെ പ്രതികരണം. വർഷകാലവും പാർലമെന്റിന്റെ വർഷകാല സമ്മേളനവും ഒരുപോലെ സജീവമായാൽ അത് രാജ്യത്തിന് വലിയ രീതിയിൽ ഫലം ചെയ്യും. രണ്ടും ഉൽപ്പാദനക്ഷമമാകുമ്പോൾ അത് രാജ്യത്തിന്റെ ക്ഷേമത്തിനും സകല ജീവജാലങ്ങളുടെയും നന്മയ്ക്കും കാരണമാകും. അതുകൊണ്ട് മഴക്കാലം നല്ല രീതിയിൽ ഉണ്ടാകാനും പാർലമെന്റ് സമ്മേളനം രാജ്യത്തിന് ഗുണകരമായ രീതിയിൽ മുന്നോട്ടുപോകാനും ഞങ്ങൾ പ്രാർത്ഥിക്കുന്നു, മോദി മാധ്യമങ്ങളോട് പറഞ്ഞു.

സ്വകാര്യ ബഹിരാകാശ മേഖലയിൽ സ്കൈറൂട്ട് എയറോസ്പേസ് കൈവരിച്ച നേട്ടം ഇന്ത്യയുടെ വളരുന്ന സാങ്കേതിക കരുത്തിന്റെ അടയാളമാണ്. ഈ ചരിത്രപരമായ നേട്ടത്തെ രാഷ്ട്രീയ ആയുധമാക്കിക്കൊണ്ട് പ്രതിപക്ഷത്തിനെതിരെ, പ്രത്യേകിച്ച് രാഹുൽ ഗാന്ധിക്കെതിരെ പ്രധാനമന്ത്രി നടത്തിയ ഈ '56 വയസ്സുകാരൻ' പരാമർശം വരും ദിവസങ്ങളിൽ രാഷ്ട്രീയ വൃത്തങ്ങളിൽ വലിയ ചർച്ചകൾക്കും രാഷ്ട്രീയ പോരുകൾക്കും വഴിതുറക്കുമെന്നുറപ്പാണ്.

---------------

Hindusthan Samachar / Roshith K