Newdelhi, 20 ജൂലൈ (H.S.)

ന്യൂഡൽഹി: നീറ്റ് (NEET) പരീക്ഷാ ക്രമക്കേടുകളിലും സിബിഎസ്ഇ മൂല്യനിർണ്ണയ വിവാദങ്ങളിലും പ്രതിഷേധിച്ച് കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാനിന്റെ രാജി ആവശ്യപ്പെട്ട് ഡൽഹിയിൽ കോക്രോച്ച് ജനതാ പാർട്ടി (CJP) നടത്തിയ പാർലമെന്റ് മാർച്ചിൽ വൻ സംഘർഷം. പാർലമെന്റിന്റെ വർഷകാല സമ്മേളനം ആരംഭിക്കുന്ന ദിവസമായ ഇന്ന് രാവിലെ ജന്തർമന്തറിൽ നിന്ന് ആരംഭിച്ച റാലിക്ക് നേരെ പോലീസ് ലാത്തിച്ചാർജ് നടത്തി. ഇതോടെ സമരക്കാരും പോലീസും തെരുവിൽ നേർക്കുനേർ ഏറ്റുമുട്ടുന്ന യുദ്ധസമാനമായ സാഹചര്യമാണ് തലസ്ഥാനത്ത് ഉണ്ടായത്.

ജന്തർമന്തർ വളഞ്ഞ് പോലീസ്; റാലി തടഞ്ഞു

രാവിലെ ഒൻപത് മണിക്ക് തന്നെ ജന്തർമന്തറിൽ നിന്ന് റാലി ആരംഭിച്ചതായി സിജെപി നേതൃത്വം വ്യക്തമാക്കിയിരുന്നു. എന്നാൽ പാർലമെന്റിലേക്ക് മാർച്ച് ചെയ്യാനുള്ള അനുമതി പോലീസ് നിഷേധിച്ചതോടെ തുടക്കം മുതൽ തന്നെ പ്രദേശത്ത് വൻ പോലീസ് സന്നാഹത്തെ വിന്യസിച്ചിരുന്നു. ജന്തർമന്തറിന് പുറത്തേക്ക് കടക്കാൻ പ്രതിഷേധക്കാർക്ക് സാധിച്ചിട്ടില്ല. ബാരിക്കേഡുകൾ സ്ഥാപിച്ച് ജന്തർമന്തർ പൂർണ്ണമായും പോലീസ് വളയുകയായിരുന്നു.

പ്രതിഷേധക്കാർ ബാരിക്കേഡുകൾ തകർത്ത് മുന്നോട്ട് പോകാൻ ശ്രമിച്ചതോടെയാണ് സ്ഥിതിഗതികൾ സങ്കീർണ്ണമായത്. സംഘടിച്ചെത്തിയ വൻ ജനക്കൂട്ടത്തെ പിരിച്ചുവിടാൻ പോലീസ് ശക്തമായ ബലപ്രയോഗം നടത്തുകയും പ്രതിഷേധക്കാരെ അടിച്ചോടിക്കാൻ ശ്രമിക്കുകയുമായിരുന്നു. എന്നാൽ പോലീസിനെ വെല്ലുവിളിച്ച് വിദ്യാർത്ഥികളും യുവജനങ്ങളും അടങ്ങുന്ന സമരക്കാർ തെരുവിൽ നിലയുറപ്പിച്ചതോടെ പൊലീസും പ്രതിഷേധക്കാരും നേർക്കുനേർ വരുന്ന സാഹചര്യമുണ്ടായി.

പ്രതിഷേധത്തിന്റെ പ്രധാന ആവശ്യങ്ങൾ: നീറ്റ് പരീക്ഷാ ചോർച്ചയിൽ വിദ്യാഭ്യാസ മന്ത്രാലയം പൂർണ്ണ ഉത്തരവാദിത്തം ഏറ്റെടുക്കുക, കടുത്ത മാനസിക വിഷമം മൂലം ജീവനൊടുക്കേണ്ടി വന്ന വിദ്യാർത്ഥികളുടെ കുടുംബങ്ങൾക്ക് ഒരു കോടി രൂപ വീതം നഷ്ടപരിഹാരം നൽകുക, വിദ്യാഭ്യാസ മന്ത്രി ധർമേന്ദ്ര പ്രധാൻ അടിയന്തരമായി രാജി വെക്കുക.

പ്രതിപക്ഷവും വിദ്യാർത്ഥി സംഘടനകളും സമരത്തിൽ

സിജെപി സ്ഥാപകൻ അഭിജീത് ദിപ്കെയുടെ നേതൃത്വത്തിൽ നടക്കുന്ന ഈ സമരത്തിന് എസ്എഫ്ഐ (SFI), ഐസ (AISA) തുടങ്ങിയ വിവിധ പ്രമുഖ വിദ്യാർത്ഥി സംഘടനകളുടെയും പൂർണ്ണ പിന്തുണയുണ്ട്. കഴിഞ്ഞ ദിവസങ്ങളിൽ ഇവിടെ നിരാഹാര സമരം അനുഷ്ഠിച്ചിരുന്ന പ്രമുഖ പരിസ്ഥിതി പ്രവർത്തകൻ സോനം വാങ്ചുക്കിനെ പോലീസ് ബലമായി ആശുപത്രിയിലേക്ക് മാറ്റിയതും പ്രതിഷേധത്തിന്റെ ആക്കം കൂട്ടി. വാങ്ചുക്കിനെ ഉടൻ മോചിപ്പിക്കണമെന്നും സമരക്കാർ ആവശ്യപ്പെടുന്നുണ്ട്.

പാർലമെന്റിന്റെ വർഷകാല സമ്മേളനം ആരംഭിച്ച ഇന്ന് തന്നെ ഡൽഹി തെരുവിൽ ഇത്തരമൊരു വൻ ജനകീയ പ്രതിരോധം ഉയർന്നത് കേന്ദ്ര സർക്കാരിനെ വലിയ പ്രതിരോധത്തിലാക്കിയിരിക്കുകയാണ്. വരും ദിവസങ്ങളിലും സമരം ശക്തമായി മുന്നോട്ട് കൊണ്ടുപോകാനാണ് സിജെപിയുടെയും മറ്റ് വിദ്യാർത്ഥി സംഘടനകളുടെയും തീരുമാനം.

---------------

Hindusthan Samachar / Roshith K