Enter your Email Address to subscribe to our newsletters
Thiruvanathapuram, 20 ജൂലൈ (H.S.)
തിരുവനന്തപുരം :പത്താംതരം പൊതു പ്രാഥമിക പരീക്ഷയുടെ ചോദ്യപേപ്പര് മാറിയ സംഭവം പിഎസ്സി ആഭ്യന്തര വിജിലന്സ് അന്വേഷിക്കും. പിഎസ്സി വിജിലന്സ് എസ്പി സിനി എഫ്. ഡെന്നിസിനാണ് അന്വേഷണ ചുമതല. തിങ്കളാഴ്ച ചേര്ന്ന പിഎസ്സി യോഗമാണ് ഇത് സംബന്ധിച്ച തീരുമാനം.
ശനിയാഴ്ച ആലപ്പുഴ ലജ്നത്തുല് മുഹമ്മദിയ ഹയര് സെക്കന്ഡറി സ്കൂളിലെ സെന്ററിലാണ് ചോദ്യപേപ്പര് മാറി നല്കിയത്. വിവിധ കമ്പനി കോര്പ്പറേഷനുകളിലെ ലാസ്റ്റ് ഗ്രേഡ് സെര്വന്റ്സ് തസ്തികകളിലേക്ക് അടക്കമുള്ള പത്താംതരം പൊതു പ്രാഥമിക പരീക്ഷയുടെ രണ്ടാം ഘട്ടമാണ് ചോദ്യക്കടലാസ് മാറി നല്കിയതിനെ തുടര്ന്ന് റദ്ദാക്കിയത്.
സെന്ററിന്റെ ചുതമലയുണ്ടായിരുന്ന ചീഫ് സൂപ്രണ്ടായ സ്കൂള് പ്രിന്സിപ്പല്, അസിസ്റ്റന്റ് സൂപ്രണ്ടുമാരായ രണ്ട് അധ്യാപകര്, അഡീഷനല് ചീഫ് സൂപ്രണ്ടായ പിഎസ്സിയിലെ പേഴ്സനല് അസിസ്റ്റന്റ് എന്നിവര്ക്കെതിരെയാണ് പ്രധാനമായും അന്വേഷണം.
പിഎസ്സി പരീക്ഷാ തട്ടിപ്പുമായി ബന്ധപ്പെട്ട ആരോപണങ്ങളില് ക്രൈംബ്രാഞ്ച് സംഘം ഔദ്യോഗികമായി അന്വേഷണം ആരംഭിച്ചിട്ടുണ്ട്. അന്വേഷണത്തിന്റെ ഭാഗമായി ക്രൈംബ്രാഞ്ച് ഉദ്യോഗസ്ഥര് പിഎസ്സി ആസ്ഥാനത്ത് നേരിട്ടെത്തി പരിശോധനകള് നടത്തി. സംസ്ഥാന ആസൂത്രണ ബോര്ഡിലേക്ക് നടത്തിയ പരീക്ഷയിലെ ക്രമക്കേടുകളെക്കുറിച്ചാണ് ക്രൈംബ്രാഞ്ച് സംഘം പ്രധാനമായും ആദ്യഘട്ടത്തില് അന്വേഷിക്കുന്നത്.
പരീക്ഷാ തട്ടിപ്പുമായി ബന്ധപ്പെട്ട് കോടതിയെ സമീപിച്ച വ്യക്തിയുടെ മൊഴി അന്വേഷണ സംഘം രേഖപ്പെടുത്തിയിട്ടുണ്ട്. ഏകദേശം അഞ്ച് മണിക്കൂറോളം നീണ്ടുനിന്ന വിശദമായ മൊഴിയെടുപ്പാണ് നടന്നത്. ഇതിന് പുറമെ, വിവരാവകാശ നിയമപ്രകാരം സ്വന്തം ഉത്തരക്കടലാസിനായി അപേക്ഷ സമര്പ്പിച്ച വ്യക്തിയെയും അന്വേഷണസംഘം മൊഴി നല്കാനായി വിളിച്ചുവരുത്തി. നിലവില് ക്രൈംബ്രാഞ്ച് ആസ്ഥാനത്ത് മൊഴിയെടുപ്പ് നടപടികള് പുരോഗമിക്കുകയാണെന്ന് അധികൃതര് അറിയിച്ചു.
---------------
Hindusthan Samachar / Sreejith S
