Newdelhi, 23 ജൂലൈ (H.S.)

ന്യൂഡൽഹി: കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാന്റെ രാജി ആവശ്യപ്പെട്ട് കോക്രോച്ച് ജനതാ പാർട്ടി (സി.ജെ.പി) നടത്തുന്ന വൻ പ്രതിഷേധ സമരം തുടർച്ചയായ 34-ാം ദിവസത്തിലേക്ക് കടന്നതോടെ രാജ്യതലസ്ഥാനത്ത് സുരക്ഷ ശക്തമാക്കി കേന്ദ്ര സർക്കാർ. ഡൽഹിയിലെ അടിയന്തര സാഹചര്യം കണക്കിലെടുത്ത് ക്രമസമാധാന പാലനത്തിനായി 30 കമ്പനി അധിക കേന്ദ്രസേനയെക്കൂടി അടിയന്തരമായി വിന്യസിച്ചു. സമരക്കാർ തലസ്ഥാനത്തേക്ക് കൂടുതൽ കേന്ദ്രീകരിക്കുന്ന സാഹചര്യത്തിൽ ഒട്ടും സമയം കളയാതെ വിമാനമാർഗ്ഗമാണ് (എയർലിഫ്റ്റ് ചെയ്ത്) കേന്ദ്രസേനയെ ഡൽഹിയിൽ എത്തിച്ചിരിക്കുന്നത്.

ഇതോടെ ഡൽഹിയിൽ പ്രക്ഷോഭം നേരിടാനും സുരക്ഷ ഉറപ്പാക്കാനുമായി നിയോഗിക്കപ്പെട്ട കേന്ദ്രസേനയുടെ ആകെ ശേഷി 45 കമ്പനിയായി ഉയർന്നു. മുൻപ് വിന്യസിച്ചിരുന്ന 15 കമ്പനി സേനയ്ക്ക് പുറമേയാണ് ഇപ്പോൾ പുതുതായി 30 കമ്പനി സൈനികരെക്കൂടി ഉൾപ്പെടുത്തിയിരിക്കുന്നത്. ഡൽഹി പോലീസിന് പുറമേ ഇവരും നഗരത്തിലെ പ്രധാന കേന്ദ്രങ്ങളിലെല്ലാം സുരക്ഷാ ചുമതലകൾ ഏറ്റെടുക്കും.

വിന്യസിച്ച സേനയുടെ വിവരങ്ങൾ

പുതുതായി എത്തിച്ച 30 കമ്പനി കേന്ദ്രസേനയിൽ പ്രധാനമായും ഉൾപ്പെടുന്നത് വിവിധ സുരക്ഷാ വിഭാഗങ്ങളിൽ നിന്നുള്ള ജവാന്മാരാണ്:

-

സി.ആർ.പി.എഫ് (CRPF): 18 കമ്പനി

-

ആർ.എ.എഫ് (RAF): 6 കമ്പനി

-

ബി.എസ്.എഫ് (BSF): 3 കമ്പനി

-

എസ്.എസ്.ബി (SSB): 2 കമ്പനി

-

ഐ.ടി.ബി.പി (ITBP): 1 കമ്പനി

കലാപ വിരുദ്ധ പോരാട്ടങ്ങളിൽ വൈദഗ്ധ്യമുള്ള റാപ്പിഡ് ആക്ഷൻ ഫോഴ്സിന്റെയും (RAF) കേന്ദ്ര റിസർവ് പോലീസ് ഫോഴ്സിന്റെയും (CRPF) സാന്നിധ്യം സമര മേഖലകളിൽ കൂടുതൽ കർശനമായ നിയന്ത്രണങ്ങൾ ഏർപ്പെടുത്തുന്നതിന്റെ ഭാഗമായാണെന്നാണ് വിലയിരുത്തപ്പെടുന്നത്.

കനത്ത ജാഗ്രതയിൽ തലസ്ഥാനം

കഴിഞ്ഞ 34 ദിവസമായി തുടരുന്ന പ്രതിഷേധ സമരം കൂടുതൽ ഭാഗങ്ങളിലേക്ക് വ്യാപിക്കാനും ക്രമസമാധാന നില തകരാനും സാധ്യതയുണ്ടെന്ന രഹസ്യാന്വേഷണ ഏജൻസികളുടെ റിപ്പോർട്ടിന്റെ അടിസ്ഥാനത്തിലാണ് കേന്ദ്ര ആഭ്യന്തര മന്ത്രാലയത്തിന്റെ ഈ അടിയന്തര നീക്കം. ജന്തർ മന്തർ, പാർലമെന്റ് പരിസരം, കേന്ദ്ര മന്ത്രിമാരുടെ വസതികൾ തുടങ്ങിയ സുപ്രധാന മേഖലകളിലെല്ലാം കനത്ത ബാരിക്കേഡുകൾ ഉയർത്തി സുരക്ഷാ വലയം തീർത്തിട്ടുണ്ട്.

പ്രതിഷേധക്കാർ പ്രധാന ഭരണകേന്ദ്രങ്ങളിലേക്ക് മാർച്ച് നടത്തുന്നത് തടയാൻ നഗര അതിർത്തികളിലും കർശന വാഹന പരിശോധന ഏർപ്പെടുത്തിയിട്ടുണ്ട്. മെട്രോ സ്റ്റേഷനുകളിലും റെയിൽവേ സ്റ്റേഷനുകളിലും കൂടുതൽ സുരക്ഷാ ജീവനക്കാരെ കാവൽ നിർത്തിയിട്ടുണ്ട്. കേന്ദ്ര വിദ്യാഭ്യാസ മന്ത്രിക്കെതിരെയുള്ള പ്രക്ഷോഭം വരും ദിവസങ്ങളിൽ കൂടുതൽ ശക്തമാക സൂചനകൾ വ്യക്തമായതോടെ ഏത് അടിയന്തര സാഹചര്യവും നേരിടാൻ സൈന്യം സജ്ജമാണെന്ന് അധികൃതർ അറിയിച്ചു.

---------------

Hindusthan Samachar / Roshith K