Enter your Email Address to subscribe to our newsletters
New delhi, 26 ജൂലൈ (H.S.)
ധര്മേന്ദ്ര പ്രധാന്റെ രാജിക്ക് പിന്നാലെ പുതിയ വിദ്യാഭ്യാസ മന്ത്രിയായി പ്രല്ഹാദ് ജോഷി ചുമതലയേറ്റു. ഉപഭോക്തൃകാര്യ മന്ത്രി എന്ന പദവിക്ക് പുറമേ വിദ്യാഭ്യാസ മന്ത്രാലയത്തിന്റെ അധിക ചുമതലയും ഇദ്ദേഹം വഹിക്കും. കടമബോധത്തോടെയും വിനയത്തോടെയും താന് ഉത്തരവാദിത്തം ഏറ്റെടുത്തതായി പ്രല്ഹാദ് ജോഷി ശനിയാഴ്ച രാത്രി മാധ്യമപ്രവര്ത്തകരോട് പറഞ്ഞു.
'പ്രധാനമന്ത്രി മോദിയുടെ സര്ക്കാര് കഴിഞ്ഞ 12 വര്ഷത്തിനുള്ളില് നിരവധി ചരിത്ര നേട്ടങ്ങള് കൈവരിച്ചു. കഴിഞ്ഞ നാലോ അഞ്ചോ വര്ഷത്തിനുള്ളില് ധര്മേന്ദ്ര പ്രധാന് ദേശീയ വിദ്യാഭ്യാസ നയം നടപ്പിലാക്കുകയും നിരവധി പ്രധാന സംരംഭങ്ങള് ഏറ്റെടുക്കുകയും ചെയ്തു' പ്രല്ഹാദ് ജോഷി പറഞ്ഞു. പ്രധാനമന്ത്രിയുടെ മാര്ഗനിര്ദേശപ്രകാരം, എന്റെ കഴിവിന്റെ പരമാവധി നിര്വഹിക്കാനും എന്റെ ഉത്തരവാദിത്തങ്ങള് സമര്പ്പണത്തോടെ നിറവേറ്റാനും ഞാന് ശ്രമിക്കുമെന്നും അദ്ദേഹം കൂട്ടിച്ചേര്ത്തു.
'പ്രധാനമന്ത്രിയുടെ ഉപദേശപ്രകാരം, ഇന്ത്യന് ഭരണഘടനയുടെ ആര്ട്ടിക്കിള് 75ലെ ക്ലോസ് (2) പ്രകാരം, കേന്ദ്ര മന്ത്രിസഭാഗം ധര്മേന്ദ്ര പ്രധാന്റെ രാജി രാഷ്ട്രപതി സ്വീകരിച്ചതായും പ്രധാനമന്ത്രിയുടെ നിര്ദേശപ്രകാരം, നിലവിലുള്ള വകുപ്പിന് പുറമേ വിദ്യാഭ്യാസ മന്ത്രാലയത്തിന്റെ ചുമതല കാബിനറ്റ് മന്ത്രി പ്രല്ഹാദ് ജോഷിക്ക് നല്കാന് രാഷ്ട്രപതി നിര്ദ്ദേശിച്ചതായും' രാഷ്ട്രപതി ഭവനില് നിന്നുള്ള ഔദ്യോഗിക പ്രസ്താവനയില് പറയുന്നു.
ഇന്നലെ കേന്ദ്ര മന്ത്രിസഭയില് നിന്നുള്ള ധര്മേന്ദ്ര പ്രധാന്റെ രാജി രാഷ്ട്രപതി ദ്രൗപതി മുര്മു അംഗീകരിച്ചതോടെയാണ് പ്രല്ഹാദ് ജോഷിക്ക് വിദ്യാഭ്യാസ മന്ത്രാലയത്തിന്റെ ചുമതല സര്ക്കാര് കൈമാറിയത്. ധര്മേന്ദ്ര പ്രധാന്റെ രാജി പ്രാബല്യത്തില് വന്നതോടെ പ്രല്ഹാദ് ജോഷി വിദ്യാഭ്യാസ മന്ത്രാലയത്തിന്റെ ചുമതലയോടൊപ്പം അദ്ദേഹത്തിന്റെ നിലവിലുള്ള വകുപ്പും തുടരും.
കര്ണാടകയിലെ ധാര്വാഡ് നിയോജകമണ്ഡലത്തില് നിന്നുള്ള ലോക്സഭാംഗവും കേന്ദ്രമന്ത്രിയുമായ പ്രല്ഹാദ് ജോഷി ഉപഭോക്തൃകാര്യം, ഭക്ഷ്യ, പൊതുവിതരണം, നവ, പുനരുപയോഗ ഊര്ജ്ജം എന്നീ വകുപ്പുകളുടെ ചുമതലയാണ് വഹിക്കുന്നത്. മുന്പ് കല്ക്കരി, ഖനി, പാര്ലമെന്ററി കാര്യ മന്ത്രിയായിരുന്നു ഇദ്ദേഹം.
വിദ്യാര്ഥികളുടെ താത്പ്പര്യാര്ത്ഥം, പരീക്ഷാ ക്രമക്കേടുകള്ക്കെതിരായ പ്രതിഷേധങ്ങള് 'ദേശവിരുദ്ധ ശക്തികള്' ചൂഷണം ചെയ്യുന്നില്ലെന്ന് ഉറപ്പാക്കാന് പ്രധാനമന്ത്രി നരേന്ദ്ര മോദിക്ക് രാജി സമര്പ്പിച്ചുവെന്ന് ധര്മ്മേന്ദ്ര പ്രധാന് പറഞ്ഞതിന് പിന്നാലെയാണ് പ്രല്ഹാദ് ജോഷി വിദ്യാഭ്യാസ മന്ത്രിയായി സ്ഥാനമേറ്റത്. മത്സര പരീക്ഷകളിലെ ക്രമക്കേടുകള്ക്കെതിരെ ആഴ്ചകളായി തുടര്ന്ന രാജ്യവ്യാപക പ്രതിഷേധങ്ങളെ തുടര്ന്നാണ് രാജി. പരീക്ഷാ അഴിമതികളുടെ പേരില് ഒരു കേന്ദ്രമന്ത്രിക്ക് പദവി ഒഴിവാക്കേണ്ടി വരുന്നത് സമീപകാല ചരിത്രത്തില് ഇത് ആദ്യമാണ്.
കൂടുതല് സുതാര്യത, ഉത്തരവാദിത്തം, പരീക്ഷാ സമ്പ്രദായത്തില് പരിഷ്കാരങ്ങള് എന്നിവ ആവശ്യപ്പെട്ട് വിദ്യാര്ഥികള് ഡല്ഹിയിലെ ജന്തര് മന്തറില് നടത്തിയ പ്രതിഷേധത്തിന്റെ പശ്ചാത്തലത്തില് ധര്മ്മേന്ദ്ര പ്രധാന് മന്ത്രിസഭയില് നിന്ന് രാജിവയ്ക്കുകയും സര്ക്കാരില് നിന്ന് മറ്റ് ആവശ്യങ്ങള് സംബന്ധിച്ച് ഉറപ്പ് ലഭിക്കുകയും ചെയ്തതിനെത്തുടര്ന്ന് ജന്തര് മന്തറില് 37 ദിവസം നീണ്ടുനിന്ന സമരം 'സദുദ്ദേശ്യത്തോടെ' പിന്വലിച്ചതായി സിജെപി പ്രഖ്യാപിച്ചു.
---------------
Hindusthan Samachar / Sreejith S
