Ottawa , 08 ജൂലൈ (H.S.)

ഒട്ടാവ: ഖാലിസ്താൻ വാദി ഹർദീപ് സിംഗ് നിജ്ജാറിന്റെ കൊലപാതകത്തിൽ ഇന്ത്യൻ ഗവൺമെന്റിന് പങ്കുണ്ടെന്ന മുൻ കനേഡിയൻ പ്രധാനമന്ത്രി ജസ്റ്റിൻ ട്രൂഡോയുടെ വിരൽചൂണ്ടലുകൾ പൂർണ്ണമായും തള്ളിക്കളഞ്ഞ് കനേഡിയൻ പോലീസ്. നിജ്ജാർ വധക്കേസ് അന്വേഷണത്തിൽ ഇന്ത്യൻ ഉദ്യോഗസ്ഥർക്ക് പങ്കുണ്ടെന്നതിനോ, അവർക്കെതിരെ കുറ്റം ചുമത്താൻ തക്കതായതോ ആയ യാതൊരു തെളിവുകളും ലഭിച്ചിട്ടില്ലെന്ന് റോയൽ കനേഡിയൻ മൗണ്ടഡ് പോലീസ് (RCMP) ഔദ്യോഗികമായി വ്യക്തമാക്കി. കൊലപാതകത്തിന് പിന്നിൽ ജയിലിൽ കഴിയുന്ന ഗുണ്ടാതലവൻ ലോറൻസ് ബിഷ്ണോയിയുടെയും കൂട്ടാളി ഗോൾഡി ബ്രാറിന്റെയും നേതൃത്വത്തിലുള്ള ക്രിമിനൽ സംഘമാണെന്ന് യുഎസ് അധികൃതർ വ്യക്തമാക്കിയതിന് പിന്നാലെയാണ് കനേഡിയൻ പോലീസിന്റെ ഈ നിർണായക വെളിപ്പെടുത്തൽ.

അമേരിക്കൻ അന്വേഷണ ഏജൻസിയായ എഫ്ബിഐയുമായി (FBI) ചേർന്ന് നടത്തിയ സംയുക്ത വാർത്താസമ്മേളനത്തിലാണ് കനേഡിയൻ പോലീസ് ഇക്കാര്യം അറിയിച്ചത്. ബിഷ്ണോയി ഗ്യാങ് ഉൾപ്പെടെയുള്ള ക്രിമിനൽ ശൃംഖലകളെ ലക്ഷ്യമിട്ട് ഇരു രാജ്യങ്ങളും സംയുക്തമായി നടത്തുന്ന 'ഓപ്പറേഷൻ ഹാർഡ് ബോൾ' (Operation Hard Ball) എന്ന ദൗത്യത്തിന്റെ വിശദാംശങ്ങൾ പങ്കുവെക്കവേയാണ് നിജ്ജാർ വധത്തിൽ ഇന്ത്യക്കെതിരായ ആരോപണങ്ങൾ പോലീസ് തള്ളിയത്.

ട്രൂഡോയുടെ 'ഇന്ത്യ വിരുദ്ധ' പ്രചാരണം പൊളിഞ്ഞു

2023-ൽ കനേഡിയൻ പാർലമെന്റിൽ വെച്ചായിരുന്നു അന്നത്തെ പ്രധാനമന്ത്രി ജസ്റ്റിൻ ട്രൂഡോ, നിജ്ജാറിന്റെ കൊലപാതകത്തിന് പിന്നിൽ ഇന്ത്യൻ ഏജന്റുകളാണെന്ന് വിശ്വസനീയമായ ആരോപണങ്ങൾ ഉണ്ടെന്ന് വാദിച്ചത്. ഇത് ഇരുരാജ്യങ്ങളും തമ്മിലുള്ള നയതന്ത്ര ബന്ധത്തിൽ വൻ വിള്ളലുണ്ടാക്കി. ഇന്ത്യ ഈ ആരോപണങ്ങളെ പൂർണ്ണമായും അസംബന്ധം എന്ന് വിളിച്ച് തള്ളിക്കളയുകയും തെളിവുകൾ ഹാജരാക്കാൻ കാനഡയോട് ആവശ്യപ്പെടുകയും ചെയ്തിരുന്നു.

ഈ തർക്കത്തെത്തുടർന്ന് ഇരുരാജ്യങ്ങളും പരസ്പരം നയതന്ത്രജ്ഞരെ പുറത്താക്കുകയും, വിസ സേവനങ്ങൾ താൽക്കാലികമായി നിർത്തലാക്കുകയും, വ്യാപാര ചർച്ചകൾ സ്തംഭിക്കുകയും ചെയ്തിരുന്നു. കാനഡയിൽ പുതിയ പ്രധാനമന്ത്രിയായി മാർക്ക് കാർണി അധികാരമേറ്റ ശേഷമാണ് നയതന്ത്ര ബന്ധം നേരിയ രീതിയിൽ മെച്ചപ്പെട്ടു തുടങ്ങിയത്. ഇപ്പോൾ കനേഡിയൻ പോലീസ് തന്നെ ട്രൂഡോയുടെ വാദങ്ങൾ തള്ളിയതോടെ കാനഡ ഉന്നയിച്ച നയതന്ത്ര നീക്കങ്ങൾ രാഷ്ട്രീയ പ്രേരിതമായിരുന്നു എന്ന് വ്യക്തമാവുകയാണ്.

കൊലപാതകത്തിന് പിന്നിൽ ബിഷ്ണോയി സംഘം

അമേരിക്കൻ കോടതിയിൽ സമർപ്പിക്കപ്പെട്ട കുറ്റപത്രം അനുസരിച്ച്, ഇന്ത്യയിലെ ജയിലിൽ കഴിയുന്ന ലോറൻസ് ബിഷ്ണോയി കള്ളക്കടത്ത് മൊബൈൽ ഫോണുകൾ വഴിയാണ് നിജ്ജാറിനെ വധിക്കാനുള്ള ഗൂഢാലോചന നടത്തിയത്. നോർത്ത് അമേരിക്കയിൽ ഇരുന്ന് ഗോൾഡി ബ്രാർ ഈ ഓപ്പറേഷൻ ഏകോപിപ്പിച്ചു. 2023 ജൂൺ 18-ന് ബ്രിട്ടീഷ് കൊളംബിയയിലെ സറേയിലുള്ള ഗുരുദ്വാരയ്ക്ക് പുറത്തുവെച്ച് നിജ്ജാർ കൊല്ലപ്പെടുന്നതിന് മുൻപ് ഇയാളുടെ ചിത്രങ്ങളും വിലാസവും കൈമാറിയത് ബിഷ്ണോയി ആണെന്ന് യുഎസ് പ്രൊസിക്യൂട്ടർമാർ വ്യക്തമാക്കുന്നു.

കേസിന്റെ നിലവിലെ അവസ്ഥ:

-

വധക്കേസിലെ പ്രധാന സൂത്രധാരൻ ലോറൻസ് ബിഷ്ണോയിയും കൂട്ടാളി ഗോൾഡി ബ്രാറുമാണ്.

-

യുഎസ്, കാനഡ ഉൾപ്പെടെയുള്ള രാജ്യങ്ങളിൽ കൊലപാതകം, വധഭീഷണി, മയക്കുമരുന്ന് കടത്ത്, ആയുധക്കടത്ത് എന്നിവ നടത്തുന്ന മൂന്ന് ഇന്ത്യൻ വംശജരുടെ ക്രിമിനൽ സിൻഡിക്കേറ്റുകളുമായി ബന്ധപ്പെട്ട 37 പേർക്കെതിരെയാണ് നിലവിൽ യുഎസ് ഏജൻസികൾ കേസ് എടുത്തിരിക്കുന്നത്.

-

കുറ്റപത്രത്തിൽ ഒരിടത്തും ഇന്ത്യൻ സർക്കാരിന്റെ പങ്കിനെക്കുറിച്ച് പരാമർശമില്ല.

ക്രിമിനൽ സംഘങ്ങൾ തമ്മിലുള്ള കുടിപ്പകയാണ് കൊലപാതകത്തിലേക്ക് നയിച്ചതെന്ന ഇന്ത്യയുടെ മുൻ നിലപാടുകളെ ശരിവെക്കുന്നതാണ് പുതിയ അന്വേഷണ റിപ്പോർട്ടുകൾ. അന്താരാഷ്ട്ര തലത്തിൽ ഇന്ത്യയെ പ്രതിക്കൂട്ടിലാക്കാൻ ശ്രമിച്ച മുൻ കനേഡിയൻ ഭരണകൂടത്തിന് കനത്ത തിരിച്ചടിയാണ് സ്വന്തം അന്വേഷണ ഏജൻസിയിൽ നിന്ന് തന്നെ ഉണ്ടായിരിക്കുന്നത്.

---------------

Hindusthan Samachar / Roshith K