Dehradun , 08 ജൂലൈ (H.S.)

ഡെറാഡൂൺ: പ്രശസ്ത തീർത്ഥാടന കേന്ദ്രമായ ഉത്തരാഖണ്ഡിലെ ബദരീനാഥ് ക്ഷേത്രത്തിൽ ഭക്തർ സമർപ്പിച്ച വഴിപാടുകളിലും സംഭാവനകളിലും ക്രമക്കേട് നടന്നെന്ന ആരോപണത്തിൽ കർശന നടപടിയുമായി സംസ്ഥാന സർക്കാർ. സംഭവത്തിൽ സമഗ്രമായ അന്വേഷണം നടത്തുന്നതിനായി മുഖ്യമന്ത്രി പുഷ്കർ സിംഗ് ധാമിയുടെ നിർദ്ദേശപ്രകാരം മൂന്നംഗ ഉന്നതതല അന്വേഷണ സമിതി രൂപീകരിച്ചു. ടൂറിസം സെക്രട്ടറി ധീരജ് സിംഗ് ഗർബ്യാൽ ആണ് ഇത് സംബന്ധിച്ച ഉത്തരവ് പുറപ്പെടുവിച്ചത്.

ഗർവാൾ കമ്മീഷണർ ആനന്ദ് സ്വരൂപ് അധ്യക്ഷനായ സമിതിയിൽ നാഷണൽ ഹെൽത്ത് മിഷൻ മാനേജിംഗ് ഡയറക്ടർ സന്ദീപ് തിവാരി, മെഡിക്കൽ ആൻഡ് ഹെൽത്ത് സർവീസസ് ഡയറക്ടർ ജനറൽ ഓഫീസിലെ ഫിനാൻസ് ഡയറക്ടർ ജഗത് സിംഗ് ചൗഹാൻ എന്നിവരാണ് മറ്റ് അംഗങ്ങൾ. ക്ഷേത്രത്തിലെ വഴിപാട് എണ്ണുന്നതുമായി ബന്ധപ്പെട്ട് ഉയർന്നുവന്ന സാമ്പത്തിക ക്രമക്കേടുകളെക്കുറിച്ച് സമിതി വിശദമായ അന്വേഷണം നടത്തും. അന്വേഷണം ആരംഭിച്ച് 15 ദിവസത്തിനകം റിപ്പോർട്ടും ഭാവിയിൽ ഇത്തരം സംഭവങ്ങൾ ആവർത്തിക്കാതിരിക്കാനുള്ള ശുപാർശകളും സർക്കാരിന് സമർപ്പിക്കാനാണ് സമിതിയോട് ആവശ്യപ്പെട്ടിരിക്കുന്നത്. ക്ഷേത്ര ഭരണത്തിൽ കൂടുതൽ സുതാര്യതയും ഉത്തരവാദിത്തവും ഉറപ്പാക്കാനുള്ള നിർദ്ദേശങ്ങളും ഈ സമിതി മുന്നോട്ടുവെക്കും. അന്വേഷണത്തിനായി വിദഗ്ധരുടെയോ മറ്റ് ഉദ്യോഗസ്ഥരുടെയോ സഹായം തേടാൻ സമിതിക്ക് പൂർണ്ണ അധികാരമുണ്ട്.

ക്ഷേത്ര ജീവനക്കാരന് സസ്പെൻഷൻ

അതേസമയം, പ്രാഥമിക അന്വേഷണത്തിൽ ക്രമക്കേടുകൾ ബോധ്യപ്പെട്ടതിനെ തുടർന്ന് ശ്രീ ബദരീനാഥ്-കേദാർനാഥ് ടെംപിൾ കമ്മിറ്റി (BKTC) തങ്ങളുടെ ഒരു ജീവനക്കാരനെ സർവീസിൽ നിന്ന് സസ്പെൻഡ് ചെയ്തു. ടെംപിൾ കമ്മിറ്റിയിലെ പ്രൈവറ്റ് സെക്രട്ടറിയായ പ്രമോദ് നൗട്ടിയാലിനെയാണ് സസ്പെൻഡ് ചെയ്തതെന്ന് ബികെടിസി ചെയർമാൻ ഹേമന്ത് ദ്വിവേദി അറിയിച്ചു. സംഭവത്തിൽ ടെംപിൾ കമ്മിറ്റി രൂപീകരിച്ച നാലംഗ ആഭ്യന്തര സമിതിയുടെ പ്രാഥമിക കണ്ടെത്തലുകളുടെ അടിസ്ഥാനത്തിലാണ് നടപടി. ഇയാൾ പദവിയിൽ തുടരുന്നത് അന്വേഷണത്തെ സ്വാധീനിക്കാൻ സാധ്യതയുണ്ടെന്ന വിലയിരുത്തലിലാണ് ഉടനടി സസ്പെൻഡ് ചെയ്യാൻ കമ്മിറ്റി തീരുമാനിച്ചത്.

വിവാദം ഉടലെടുത്തത് ഇങ്ങനെ

ബദരീനാഥ് ധാമിൽ ഭക്തർ സമർപ്പിച്ച കാണിക്കയും വഴിപാടുകളും എണ്ണുന്നതിനിടെ ക്രമക്കേടുകൾ നടന്നതായി സോഷ്യൽ മീഡിയയിൽ വ്യാപകമായ പ്രചാരണങ്ങൾ ഉണ്ടായതോടെയാണ് ഈ സംഭവം പുറംലോകം അറിയുന്നത്. തുടർന്ന് 'ഭൈരവ് സേന' എന്ന സംഘടന വിഷയത്തിൽ ഇടപെടുകയും വിശദമായ അന്വേഷണം ആവശ്യപ്പെട്ട് പോലീസിൽ എഫ്ഐആർ രജിസ്റ്റർ ചെയ്യണമെന്ന് ആവശ്യപ്പെട്ട് പരാതി നൽകുകയും ചെയ്തു.

ഇതേത്തുടർന്ന് കഴിഞ്ഞ ആഴ്ച തന്നെ ടെംപിൾ കമ്മിറ്റി സ്വന്തം നിലയിൽ അന്വേഷണം ആരംഭിച്ചിരുന്നു. സിസിടിവി ദൃശ്യങ്ങൾ, ബന്ധപ്പെട്ട ജീവനക്കാരുടെ മൊഴികൾ, മറ്റ് രേഖകൾ എന്നിവ പരിശോധിച്ചാണ് ആഭ്യന്തര സമിതി അന്വേഷണം പുരോഗമിക്കുന്നത്. ഇതിനിടെ, ക്ഷേത്രത്തിലെ സിസിടിവി ക്യാമറകൾ മാറ്റിവെച്ചതുമായി ബന്ധപ്പെട്ട് ചില കോണുകളിൽ നിന്ന് ചോദ്യങ്ങൾ ഉയർന്നിരുന്നു. എന്നാൽ ക്യാമറകൾ മാറ്റിയത് പതിവ് നടപടിക്രമങ്ങളുടെ ഭാഗമാണെന്നും പഴയ ഡിവിആറുകളിലെ (DVR) ദൃശ്യങ്ങൾ പൂർണ്ണമായും സുരക്ഷിതമായി സൂക്ഷിച്ചിട്ടുണ്ടെന്നും അത് അന്വേഷണത്തിനായി കൈമാറുമെന്നും ബികെടിസി ചീഫ് എക്സിക്യൂട്ടീവ് ഓഫീസർ (CEO) വ്യക്തമാക്കി. ഉത്തരാഖണ്ഡിലെ പ്രമുഖ ക്ഷേത്രങ്ങളുടെ മേൽനോട്ടം വഹിക്കുന്ന നിയമപരമായ ബോഡിയാണ് ശ്രീ ബദരീനാഥ്-കേദാർനാഥ് ടെംപിൾ കമ്മിറ്റി.

---------------

Hindusthan Samachar / Roshith K