Newdelhi, 08 ജൂലൈ (H.S.)

ന്യൂഡൽഹി: ഇന്ത്യയിൽ ഭീകരപ്രവർത്തനങ്ങളിലൂടെയും ഓൺലൈൻ തീവ്രവാദ ആശയ പ്രചാരണങ്ങളിലൂടെയും ഇസ്ലാമിക് ഖിലാഫത്ത് (Caliphate) സ്ഥാപിക്കാൻ ശ്രമിച്ച കേസിൽ ദേശീയ അന്വേഷണ ഏജൻസി (NIA) രാജ്യവ്യാപകമായി പരിശോധന ശക്തമാക്കി. ഇതിന്റെ ഭാഗമായി ബുധനാഴ്ച 9 സംസ്ഥാനങ്ങളിലും ഒരു കേന്ദ്രഭരണ പ്രദേശത്തുമായി 20 കേന്ദ്രങ്ങളിൽ എൻ.ഐ.എ ഒരേസമയം വ്യാപക റെയ്ഡ് നടത്തി. ഐസിസ് (ISIS), ഇന്ത്യൻ ഉപഭൂഖണ്ഡത്തിലെ അൽ ഖ്വയ്ദ (AQIS) എന്നീ നിരോധിത ഭീകര സംഘടനകളുടെ ഓൺലൈൻ സ്വാധീനവലയത്തിൽപ്പെട്ട് രാജ്യവിരുദ്ധ പ്രവർത്തനങ്ങളിൽ ഏർപ്പെട്ടവരെ ലക്ഷ്യമിട്ടായിരുന്നു ഈ അടിയന്തര നീക്കം.

9 സംസ്ഥാനങ്ങളിൽ ഒരേസമയം പരിശോധന

ജനാധിപത്യപരമായി തിരഞ്ഞെടുക്കപ്പെട്ട ഇന്ത്യൻ സർക്കാരിനെതിരെ അക്രമാസക്തമായ 'ജിഹാദ്' നയിക്കാനും രാജ്യത്തിന്റെ സമാധാനാന്തരീക്ഷം തകർക്കാനും ഗൂഢാലോചന നടത്തിയ കേസിന്റെ തുടർച്ചയായാണ് ഈ പരിശോധന.

-

ഉത്തർപ്രദേശ് (5 സ്ഥലങ്ങൾ)

-

ആന്ധ്രാപ്രദേശ് (4 സ്ഥലങ്ങൾ)

-

മഹാരാഷ്ട്ര (3 സ്ഥലങ്ങൾ)

-

ഡൽഹി (2 സ്ഥലങ്ങൾ)

-

ബീഹാർ, രാജസ്ഥാൻ, കർണാടക, ഗുജറാത്ത്, തെലങ്കാന, പശ്ചിമ ബംഗാൾ (ഓരോ സ്ഥലങ്ങളിൽ വീതം)

എന്നിവിടങ്ങളിലാണ് പരിശോധനകൾ നടന്നത്. റെയ്ഡിൽ നിരവധി മൊബൈൽ ഫോണുകൾ, ലാപ്ടോപ്പുകൾ, ഹാർഡ് ഡിസ്കുകൾ, മറ്റ് ഡിജിറ്റൽ ഉപകരണങ്ങൾ എന്നിവ പിടിച്ചെടുത്തു. ഇവ തുടർനടപടികൾക്കായി ഫോറൻസിക് പരിശോധനയ്ക്ക് അയക്കുമെന്ന് എൻ.ഐ.എ വക്താവ് അറിയിച്ചു.

11 പേർ അറസ്റ്റിൽ; പിന്നിൽ വിദേശ കൈകൾ

ഈ കേസിൽ ഇതുവരെ ഒരു പ്രായപൂർത്തിയാകാത്ത ആളുൾപ്പെടെ 11 പേരെ എൻ.ഐ.എ അറസ്റ്റ് ചെയ്തിട്ടുണ്ട്. മുൻപ് അറസ്റ്റിലായ പ്രതികളിൽ നിന്ന് ലഭിച്ച ഡിജിറ്റൽ തെളിവുകളുടെയും അവരുടെ ഫോൺ കോൾ വിവരങ്ങളുടെയും (Connectivity Analysis) ശാസ്ത്രീയമായ സാങ്കേതിക വിശകലനത്തിന്റെയും അടിസ്ഥാനത്തിലാണ് ഇന്ന് പുതിയ ഒളിത്താവളങ്ങൾ കേന്ദ്രീകരിച്ച് റെയ്ഡ് നടത്തിയത്.

അറസ്റ്റിലായ പ്രതികളും അവരുടെ കൂട്ടാളികളും സോഷ്യൽ മീഡിയ ഗ്രൂപ്പുകൾ വഴിയും മറ്റ് ഓൺലൈൻ പ്ലാറ്റ്ഫോമുകൾ വഴിയും രാജ്യത്തെ യുവാക്കളെ തീവ്രവാദ ആശയങ്ങളിലേക്ക് ആകർഷിക്കാൻ ശ്രമിച്ചതായി എൻ.ഐ.എ കണ്ടെത്തിയിട്ടുണ്ട്. ഇതിനായി വ്യാജ വാർത്തകളും അക്രമാസക്തമായ ജിഹാദി സന്ദേശങ്ങളുമാണ് ഇവർ പ്രചരിപ്പിച്ചിരുന്നത്. മാത്രമല്ല, ഇന്ത്യ വിരുദ്ധ ഗൂഢാലോചനകൾ ആസൂത്രണം ചെയ്യുന്നതിനായി ഇവർ വിദേശത്തുള്ള തങ്ങളുടെ ഭീകരവാദ ഹാൻഡ്ലർമാരുമായി (Foreign Handlers) നിരന്തരം സമ്പർക്കം പുലർത്തിയിരുന്നതായും ഏജൻസി സ്ഥിരീകരിച്ചു.

ആന്ധ്രാപ്രദേശിലെ വിജയവാഡ പോലീസാണ് ഈ വർഷം മാർച്ചിൽ കേസ് ആദ്യം രജിസ്റ്റർ ചെയ്തത്. മുഖ്യപ്രതിയായ റഹ്മത്തുള്ള ഷെരീഫ് മുഹമ്മദിന്റെ വീട്ടിൽ നടത്തിയ പരിശോധനയിൽ ഐസിസ്, അൽ ഖ്വയ്ദ സംഘടനകളുമായി ബന്ധമുള്ള രേഖകൾ കണ്ടെത്തിയതോടെയാണ് ഗൂഢാലോചന പുറത്തായത്. തുടർന്ന് മേയ് 13-ഓടെ കേസ് എൻ.ഐ.എ ഔദ്യോഗികമായി ഏറ്റെടുക്കുകയായിരുന്നു.

ഇന്ത്യയെ തകർക്കുക എന്ന ലക്ഷ്യത്തോടെ പ്രവർത്തിക്കുന്ന ഈ വലിയ ഭീകര ശൃംഖലയിലെ ബാക്കി കണ്ണികളെയും സാമ്പത്തിക സ്രോതസ്സുകളെയും കണ്ടെത്താനുള്ള ഊർജിതമായ ശ്രമത്തിലാണ് എൻ.ഐ.എ. വരും ദിവസങ്ങളിലും കൂടുതൽ അറസ്റ്റുകൾ ഉണ്ടാകുമെന്നാണ് സൂചന.

---------------

Hindusthan Samachar / Roshith K