Thiruvananthapuram , 01 ഓഗസ്റ്റ് (H.S.)

കനത്ത മഴയെ തുടര്ന്ന് വയനാട്ടിലെ വിദ്യാഭ്യാസ സ്ഥാപനങ്ങള്ക്ക് നാളെ അവധി പ്രഖ്യാപിച്ചു. മതപഠന ക്ലാസ്സുകള്, ട്യൂഷൻ സെന്ററുകള്, കോച്ചിംഗ് ക്ലാസ്സുകള്, സ്പെഷ്യല് ക്ലാസ്സുകള്, ഉള്പ്പടെയുള്ള വിദ്യാഭ്യാസ സ്ഥാപനങ്ങള്ക്ക് അവധി ബാധകമാണ്.

റെസിഡൻഷ്യല് സ്കൂളുകളിലെയും കോളേജുകളിലെയും കുട്ടികളുടെ സുരക്ഷിതത്വം സ്ഥാപനമേധാവികള് ഉറപ്പുവരുത്തേണ്ടതാണെന്നും സാഹചര്യം അനുസരിച്ച് ആവശ്യമെങ്കില് കുട്ടികളുടെ സുരക്ഷ കണക്കിലെടുത്ത് അവധി നല്കാവുന്നതുമാണെന്നും കളക്ടർ അറിയിച്ചു. ജില്ലയില് കനത്ത മഴ തുടരുകയാണ്. ഇന്ന് റെഡ് അലർട്ട് പ്രഖ്യാപിച്ചിട്ടുണ്ട്. മഴ തുടരുന്ന സാഹചര്യത്തില് സുരക്ഷ മുന്നിര്ത്തി മേപ്പാടിയിലെ കള്ളാടി ഭാഗത്തേക്കുള്ള ഗതാഗതം പൂര്ണമായും നിരോധിച്ചിട്ടുണ്ട്. വൈത്തിരി, ലക്കിടി മേഖലകളില് കഴിഞ്ഞ 24 മണിക്കൂറിനിടെ അതിതീവ്ര മഴ രേഖപ്പെടുത്തിയ സാഹചര്യത്തില് വയനാട് ജില്ലയില് നിന്ന് കോഴിക്കോട്ടേക്കും കോഴിക്കോട് ജില്ലയില് നിന്നു വയനാട്ടിലേക്കുമുള്ള അത്യാവശ്യമല്ലാത്ത യാത്രകള് പൂർണമായും ഒഴിവാക്കണമെന്നും കളക്ടർ ആവശ്യപ്പെട്ടു.

സെറ്റ് പരീക്ഷ മാറ്റി

സംസ്ഥാനത്ത് നാളെ നടത്താനിരുന്ന സെറ്റ് (സ്റ്റേറ്റ് എലിജിബിലിറ്റി ടെസ്റ്റ് ) പരീക്ഷ മാറ്റിവെച്ചു.കാലാവസ്ഥ മുന്നറിയിപ്പുകളുടെ പശ്ചാത്തലത്തിലാണ് നടപടി. പരീക്ഷയുടെ പുതുക്കിയ തീയതി പിന്നീട് അറിയിക്കുമെന്നും കൂടുതല് വിവരങ്ങള്ക്ക് ഔദ്യോഗിക വെബ്സൈറ്റ് പരിശോധിക്കാമെന്നും അധികൃതർ അറിയിച്ചു.

മഹാത്മാഗാന്ധി സർവ്വകലാശാല പരീക്ഷകള് മാറ്റിവെച്ചു

മഹാത്മാഗാന്ധി സർവ്വകലാശാല തിങ്കളാഴ്ച നടത്താനിരുന്ന സർവകലാശാലാ പരീക്ഷകള് മാറ്റിവെച്ചു. പുതുക്കിയ തീയതികള് പിന്നീട് അറിയിക്കും.

അതിതീവ്ര മഴ, പമ്പയില് വെള്ളപൊക്കവും: ഭക്തർ ശബരിമല യാത്ര ഒഴിവാക്കണം

അതിതീവ്ര മഴയും ഇതേ തുടർന്ന് പമ്പാ നദിയില് വെള്ളപൊക്കവും ഉണ്ടായ പശ്ചാത്തലത്തില് നിറപുത്തരി ചടങ്ങുകള്ക്ക് ശബരിമല നട തുറക്കുന്ന ഓഗസ്റ്റ് 2, 3 തീയതികളില് ശബരിമല ദർശനം നടത്താൻ തീരുമാനിച്ചിട്ടുള്ള ഭക്തർ കഴിവതും യാത്ര ഒഴിവാക്കണമെന്ന് അധികൃതർ അറിയിച്ചു.

ബോയ്സ്ടൗണ്-പാല്ചുരം റോഡില് രാത്രിയാത്ര നിരോധനം

കണ്ണൂർ ജില്ലയില് റെഡ് അലർട്ട് നിലനില്ക്കുന്നതിനാലും ശക്തമായ മഴയ്ക്ക് സാധ്യതയുള്ളതിനാലും അപകട സാധ്യത കണക്കിലെടുത്തു കണ്ണൂർ ജില്ലയെ വയനാടുമായി ബന്ധിപ്പിക്കുന്ന ബോയ്സ്ടൗണ്-പാല്ചുരം റോഡില് ഇന്ന് വൈകീട്ട് 6 മണി മുതല് നാളെ രാവിലെ 6 മണി വരെ രാത്രിയാത്ര നിരോധനം ഏർപ്പെടുത്തി ജില്ലാ ദുരന്തനിവാരണ അതോരിറ്റി ചെയർമാൻ ആയ ജില്ലാ കളക്ടർ ഉത്തരവിട്ടു. ഈ സമയം റോഡ് ഗതാഗതം തടയുന്നതിനുള്ള നടപടികള് പോലീസ് സ്വീകരിക്കണം.

---------------

Hindusthan Samachar / CHANDHU CHANDRASEKHAR