palakkad , 16 ഓഗസ്റ്റ് (H.S.)

പാലക്കാട്: സംസ്ഥാനത്തെ യുഡിഎഫ് സർക്കാരിനെയും മുഖ്യമന്ത്രി വി.ഡി. സതീശനെയും കടന്നാക്രമിച്ച് തിരുവനന്തപുരം മുൻ മേയറും ഡിവൈഎഫ്ഐ സംസ്ഥാന സെക്രട്ടറിയേറ്റ് അംഗവുമായ ആര്യ രാജേന്ദ്രൻ രംഗത്ത്. നാർക്കോട്ടിക്സ് ഈസ് എ ഡേർട്ടി ബിസിനസ് എന്ന് മുഖ്യമന്ത്രി വി.ഡി. സതീശന് ആരെങ്കിലും പറഞ്ഞു കൊടുക്കണം എന്ന് അവർ പരിഹസിച്ചു. സ്വാതന്ത്ര്യദിനത്തോടനുബന്ധിച്ച് ഡിവൈഎഫ്ഐ പാലക്കാട് മണ്ണാർക്കാട് സംഘടിപ്പിച്ച 'യങ്ങ് ഇന്ത്യ' സെമിനാർ ഉദ്ഘാടനം ചെയ്ത് സംസാരിക്കവെയാണ് ആര്യ രാജേന്ദ്രൻ സർക്കാരിനെതിരെ കടുത്ത ആരോപണങ്ങൾ ഉന്നയിച്ചത്.

ഗുരുതരമായ ആരോപണങ്ങൾ

മുൻപ് വി.ഡി. സതീശൻ പ്രതിപക്ഷ നേതാവായിരുന്ന കാലത്ത് തന്നെ, എംഡിഎംഎ കേസിൽ അറസ്റ്റിലായ മുഹമ്മദ് ഹുസ്സൈൻ, അബ്ദുൽ സലാം എന്നിവരുമായി അദ്ദേഹത്തിന് അടുത്ത പരിചയമുണ്ടായിരുന്നുവെന്ന് ആര്യ രാജേന്ദ്രൻ ആരോപിച്ചു. സ്വന്തം ഓഫീസിലും ഒപ്പവും കൂടെ നിർത്തുന്ന ആളുകൾ എംഡിഎംഎയും രാസലഹരിയും ഉപയോഗിക്കുകയും കൈവശം വയ്ക്കുകയും ചെയ്യുമ്പോൾ, ഇവർ അറിഞ്ഞുകൊണ്ടാണോ ഇത്തരം കാര്യങ്ങൾക്ക് നേതൃത്വം കൊടുക്കുന്നതെന്ന് സാധാരണക്കാർക്ക് പോലും സംശയം തോന്നുമെന്നും അവർ വ്യക്തമാക്കി. സംസ്ഥാനത്ത് ലഹരി മാഫിയ പിടിമുറുക്കുമ്പോൾ ഭരണനേതൃത്വം കാണിക്കുന്ന നിസ്സംഗത അങ്ങേയറ്റം അപലപനീയമാണെന്നും അവർ ചൂണ്ടിക്കാട്ടി.

പിഎം ശ്രീ, പിഎംഎവൈ വിഷയങ്ങളിലെ വിമർശനം

ലഹരി വിഷയത്തിന് പുറമെ കേന്ദ്ര-സംസ്ഥാന പദ്ധതികളായ പിഎം ശ്രീ, പിഎംഎവൈ എന്നിവ നടപ്പിലാക്കുന്നതിലെ യുഡിഎഫ് മുന്നണിയുടെയും മുസ്ലിം ലീഗിന്റെയും ഇരട്ടത്താപ്പിനെയും ആര്യ രാജേന്ദ്രൻ രൂക്ഷമായി വിമർശിച്ചു. അധികാരത്തിൽ വരുന്നതിന് മുൻപ് മുസ്ലിം ലീഗ് നേതാക്കൾ പ്രഖ്യാപിച്ചത് പിഎം ശ്രീ പദ്ധതിയെ അറബിക്കടലിൽ എറിയുമെന്നായിരുന്നു. എന്നാൽ ഇപ്പോൾ വിദ്യാഭ്യാസ വകുപ്പ് ഭരിക്കുന്നത് മുസ്ലിം ലീഗ് മന്ത്രിയായിരുന്നിട്ടും എന്തുകൊണ്ടാണ് ആ പദ്ധതി അറബിക്കടലിൽ എറിയാത്തത് എന്ന് അവർ ചോദിച്ചു. മുസ്ലിം ലീഗിന് അറബിക്കടൽ എവിടെയാണെന്ന് അറിയാത്തതുകൊണ്ടാണോ ഇതെന്ന് ആര്യ പരിഹസിച്ചു.

ജനങ്ങളോട് നീതി കാട്ടണം

ജനങ്ങളുടെ വോട്ട് വാങ്ങി തെരഞ്ഞെടുപ്പിൽ വിജയിച്ച് അധികാരത്തിലെത്തുന്നവർ ജനങ്ങളോട് പൂർണ്ണ നീതി കാണിക്കാൻ ബാധ്യസ്ഥരാണെന്ന് അവർ ഓർമ്മിപ്പിച്ചു. മുൻപ് പറഞ്ഞ വാക്കുകൾ അധികാര കസേരയിലെത്തുമ്പോൾ വിഴുങ്ങുന്ന നിലപാടാണ് നിലവിലെ ഭരണാധികാരികൾ സ്വീകരിക്കുന്നത്. സമൂഹത്തെ ബാധിക്കുന്ന ലഹരി വിപത്തിനെതിരെ ശക്തമായ പ്രതിരോധം തീർക്കാൻ യുവാക്കളും പൊതുസമൂഹവും ഒന്നിച്ച് രംഗത്തിറങ്ങണമെന്നും അവർ ആഹ്വാനം ചെയ്തു.

---------------

Hindusthan Samachar / Roshith K