Malapuram , 16 ഓഗസ്റ്റ് (H.S.)

മലപ്പുറം: കെഎസ്ആർടിസി ബസിൽ യാത്ര ചെയ്യുകയായിരുന്ന യുവതിക്ക് നേരെ ലൈംഗികാതിക്രമവും നഗ്നതാ പ്രദർശനവും നടത്തിയതായി പരാതി. മലപ്പുറം ജില്ലയിലെ മോങ്ങം സ്വദേശിയായ യുവതിയാണ് അതിക്രമത്തിന് ഇരയായത്. സംഭവത്തിൽ യുവതി നൽകിയ പരാതിയുടെ അടിസ്ഥാനത്തിൽ കൊണ്ടോട്ടി പൊലീസ് കേസെടുത്ത് അന്വേഷണം ആരംഭിച്ചു.

കോഴിക്കോട്–പാലക്കാട് റൂട്ടിൽ സർവീസ് നടത്തുന്ന കെഎസ്ആർടിസി ബസിലാണ് (രജിസ്ട്രേഷൻ നമ്പർ: KL-15 A 1529) ഞെട്ടിക്കുന്ന സംഭവം അരങ്ങേറിയത്. യാത്രയ്ക്കിടയിൽ ബസിലെ ജനറൽ സീറ്റിൽ ഇരിക്കുകയായിരുന്ന യുവതിയോട് പ്രതി പ്രകോപനപരമായി സംസാരിക്കുകയായിരുന്നു. സ്ത്രീകൾക്ക് ഇരിക്കാൻ പ്രത്യേകം സീറ്റുകൾ ഉണ്ടെന്നിരിക്കെ എന്തിനാണ് ജനറൽ സീറ്റിൽ ഇരിക്കുന്നത് എന്ന് ചോദിച്ചായിരുന്നു ഇയാൾ സംസാരം തുടങ്ങിയത്. തുടർന്ന് യുവതിയോട് തട്ടിക്കയറുകയും മോശമായി പെരുമാറുകയും ചെയ്തു.

വാക്കുതർക്കത്തിന് പിന്നാലെ ഇയാൾ യുവതിക്ക് നേരെ ലൈംഗികാതിക്രമം നടത്തുകയും പൊതുമധ്യത്തിൽ നഗ്നതാ പ്രദർശനം നടത്തുകയുമായിരുന്നുവെന്ന് പരാതിയിൽ പറയുന്നു. സംഭവത്തെത്തുടർന്ന് മാനസികമായി തകർന്ന യുവതി പിന്നീട് കൊണ്ടോട്ടി പൊലീസിനെ സമീപിച്ച് പരാതി നൽകുകയായിരുന്നു. പൊതുഗതാഗത സംവിധാനത്തിൽ യാത്ര ചെയ്യുന്നതിനിടയിൽ ഉണ്ടായ ഈ ദുരനുഭവം യാത്രക്കാർക്കിടയിലും വലിയ ആശങ്കയ്ക്ക് വഴിവെച്ചിട്ടുണ്ട്.

യുവതിയുടെ മൊഴി രേഖപ്പെടുത്തിയ കൊണ്ടോട്ടി പൊലീസ്, സ്ത്രീത്വത്തെ അപമാനിക്കൽ, പൊതുസ്ഥലത്ത് വെച്ച് അസഭ്യവും അശ്ലീലവുമായ പെരുമാറ്റം തുടങ്ങിയ വകുപ്പുകൾ ചുമത്തിയാണ് കേസ് രജിസ്റ്റർ ചെയ്തിരിക്കുന്നത്. പ്രതിയെ തിരിച്ചറിയുന്നതിനായി ബസിലെ ജീവനക്കാരുടെയും സഹയാത്രികരുടെയും മൊഴികൾ ശേഖരിക്കാനുള്ള നീക്കത്തിലാണ് അന്വേഷണ സംഘം. കൂടാതെ ബസ് കടന്നുപോയ വഴികളിലെയും സ്റ്റോപ്പുകളിലെയും സിസിടിവി ദൃശ്യങ്ങൾ കേന്ദ്രീകരിച്ചും പരിശോധന നടത്തുന്നുണ്ട്.

പൊതുഗതാഗത സംവിധാനങ്ങളിൽ സ്ത്രീകൾക്കെതിരെയുള്ള അതിക്രമങ്ങൾ വർധിച്ചുവരുന്ന സാഹചര്യത്തിൽ ഇത്തരം സംഭവങ്ങൾക്കെതിരെ കർശന നടപടി സ്വീകരിക്കണമെന്ന ആവശ്യം ശക്തമാകുന്നുണ്ട്. പ്രതിയെ ഉടൻ തന്നെ പിടികൂടുമെന്നും സംഭവത്തിൽ സമഗ്രമായ അന്വേഷണം പുരോഗമിക്കുകയാണെന്നും പൊലീസ് അറിയിച്ചു.

---------------

Hindusthan Samachar / Roshith K