Thiruvananthapuram , 23 ഓഗസ്റ്റ് (H.S.)

തിരുവനന്തപുരം: എൻഫോഴ്സ്മെന്റ് ഡയറക്ടറേറ്റ് (ഇഡി) രജിസ്റ്റർ ചെയ്ത കേസിലെ പ്രതികൾ തലസ്ഥാനത്തെ മ്യൂസിയം പൊലീസ് സ്റ്റേഷനിൽ ഓണാഘോഷത്തിൽ പങ്കെടുത്ത് റീൽസ് ചിത്രീകരിച്ച സംഭവത്തിൽ പൊലീസിന് ഗുരുതര വീഴ്ച സംഭവിച്ചതായി സിറ്റി പൊലീസ് കമ്മീഷണറുടെ അന്വേഷണ റിപ്പോർട്ട്. ജാമ്യവ്യവസ്ഥയുടെ ഭാഗമായി ഒപ്പിടാൻ സ്റ്റേഷനിലെത്തിയ പ്രതികളെ ഔദ്യോഗിക നടപടികൾ വേഗത്തിൽ പൂർത്തിയാക്കി തിരിച്ചയക്കുന്നതിൽ സ്റ്റേഷൻ അധികൃതരുടെ ഭാഗത്തുനിന്ന് വലിയ വീഴ്ച ഉണ്ടായെന്നാണ് കമ്മീഷണറുടെ റിപ്പോർട്ടിൽ വ്യക്തമാക്കുന്നത്.

ഇഡി കേസിലെ പ്രതികളായ ഐ.പി. ബിനു അടക്കമുള്ള സിപിഐഎം പ്രവർത്തകരാണ് മ്യൂസിയം പൊലീസ് സ്റ്റേഷനിൽ പൊലീസുകാർക്കൊപ്പം ഓണാഘോഷത്തിൽ പങ്കെടുക്കുകയും ഇതിന്റെ ദൃശ്യങ്ങൾ മൊബൈൽ ഫോണിൽ പകർത്തി സമൂഹമാധ്യമങ്ങളിൽ റീൽസായി പങ്കുവെക്കുകയും ചെയ്തത്. വീഡിയോ പുറത്തുവന്നതോടെ സേനയ്ക്ക് വലിയ നാണക്കേടുണ്ടാക്കിയ സംഭവം വൻ രാഷ്ട്രീയ വിവാദങ്ങൾക്കും വിമർശനങ്ങൾക്കും വഴിവെച്ചിരുന്നു. ഇതേത്തുടർന്ന് എഡിജിപി പി. വിജയൻ സംഭവത്തിൽ സമഗ്രമായ അന്വേഷണം നടത്തി റിപ്പോർട്ട് സമർപ്പിക്കാൻ നിർദേശം നൽകുകയായിരുന്നു.

പൊലീസ് സ്റ്റേഷനുകൾ പോലെയുള്ള അതീവ സുരക്ഷാ മേഖലകളിൽ ക്രിമിനൽ/സാമ്പത്തിക കേസുകളിലെ പ്രതികൾ ദീർഘനേരം ചിലവഴിച്ചതും, ആഘോഷങ്ങളുടെ ഭാഗമായതും ഗുരുതരമായ അച്ചടക്കലംഘനമാണെന്ന് റിപ്പോർട്ട് അടിവരയിടുന്നു. സ്റ്റേഷനിലെത്തി ഒപ്പിടേണ്ട സമയം മാത്രം പ്രതികൾക്ക് അനുവാദം നൽകുന്നതിനു പകരം, അവരെ ഇത്തരം പരിപാടികളിൽ സഹകരിപ്പിച്ചത് നിയമാവലികൾക്ക് വിരുദ്ധമാണെന്നാണ് കമ്മീഷണറുടെ കണ്ടെത്തൽ. സംഭവം നടക്കുമ്പോൾ സ്റ്റേഷനിലുണ്ടായിരുന്ന ഉദ്യോഗസ്ഥരുടെ ഉത്തരവാദിത്തമില്ലായ്മയെക്കുറിച്ചും റിപ്പോർട്ടിൽ പരാമർശമുണ്ട്.

സിറ്റി പൊലീസ് കമ്മീഷണർ തയ്യാറാക്കിയ വിശദമായ റിപ്പോർട്ട് ഉടൻ തന്നെ ദക്ഷിണ മേഖലാ ഐജിക്ക് കൈമാറും. തുടർന്ന് റിപ്പോർട്ട് സംസ്ഥാന പൊലീസ് മേധാവിയുടെ (ഡിജിപി) പരിഗണനയ്ക്ക് എത്തും. സംഭവത്തിൽ ഉൾപ്പെട്ട സ്റ്റേഷനിലെ ഉദ്യോഗസ്ഥർക്കെതിരെ വകുപ്പുതല നടപടികൾ വേണമോ അതോ സ്ഥലംമാറ്റം ഉൾപ്പെടെയുള്ള നടപടികളിലേക്ക് കടക്കണമോ എന്ന കാര്യം ഡിജിപിയാണ് അന്തിമമായി തീരുമാനിക്കുക.

പൊലീസ് സ്റ്റേഷനുകൾ പാർട്ടി കേന്ദ്രങ്ങളാക്കി മാറ്റുന്നുവെന്നും പ്രതികൾക്ക് പൊലീസ് സംരക്ഷണവും സൗഹൃദവും നൽകുന്നുവെന്നും കാണിച്ച് പ്രതിപക്ഷ സംഘടനകൾ ഈ വിഷയത്തിൽ ശക്തമായ പ്രതിഷേധമാണ് ഉയർത്തുന്നത്. ഇതിനിടയിലാണ് സേനയ്ക്ക് തന്നെ തലവേദനയായി കമ്മീഷണറുടെ അന്വേഷണ റിപ്പോർട്ട് പുറത്തുവന്നിരിക്കുന്നത്. വീഴ്ച വരുത്തിയ ഉദ്യോഗസ്ഥർക്കെതിരെ കർശന നടപടി ഉണ്ടാകുമെന്നാണ് സൂചന.

---------------

Hindusthan Samachar / Roshith K