Moscow, 24 ഓഗസ്റ്റ് (H.S.)

മോസ്കോ: വിദേശകാര്യ മന്ത്രി ഡോ. എസ്. ജയശങ്കർ മോസ്കോയിലെ ക്രെംലിനിൽ റഷ്യൻ പ്രസിഡന്റ് വ്ലാഡിമിർ പുടിനുമായി കൂടിക്കാഴ്ച നടത്തി. ദ്വിദിന ഔദ്യോഗിക സന്ദർശനത്തിനായി റഷ്യയിലെത്തിയ വിദേശകാര്യ മന്ത്രി, പ്രധാനമന്ത്രി നരേന്ദ്ര മോദിയുടെ ആശംസകളും പ്രത്യേക സന്ദേശവും റഷ്യൻ പ്രസിഡന്റിന് നേരിട്ട് കൈമാറി. വരാനിരിക്കുന്ന ഷാങ്ഹായ് കോർപ്പറേഷൻ ഓർഗനൈസേഷൻ (എസ്.സി.ഒ) ഉച്ചകോടിയിലും ഇന്ത്യ ആതിഥേയത്വം വഹിക്കുന്ന ബ്രിക്സ് (BRICS) ഉച്ചകോടിയിലും പുടിനെ സ്വാഗതം ചെയ്യാൻ പ്രധാനമന്ത്രി മോദി ആഗ്രഹിക്കുന്നതായി ജയശങ്കർ അറിയിച്ചു.

കൂടിക്കാഴ്ചയ്ക്ക് മുന്നോടിയായി റഷ്യൻ ഫസ്റ്റ് ഡെപ്യൂട്ടി പ്രധാനമന്ത്രി ഡെനിസ് മാന്തുറോവുമായി ചേർന്ന് ജയശങ്കർ വ്യാപാര-സാമ്പത്തിക-ശാസ്ത്ര-സാങ്കേതിക സഹകരണത്തിനായുള്ള അന്തർ-സർക്കാർ കമ്മീഷൻ യോഗത്തിൽ അധ്യക്ഷത വഹിച്ചിരുന്നു. ഈ യോഗത്തിലെ തീരുമാനങ്ങളും ഇരുരാജ്യങ്ങളും തമ്മിലുള്ള സാമ്പത്തിക സഹകരണത്തിലെ പുരോഗതിയും ജയശങ്കർ റഷ്യൻ പ്രസിഡന്റിനെ ധരിപ്പിച്ചു. ഊർജം, വ്യാപാരം, രാസവളം, ആണവോർജം തുടങ്ങിയ വിവിധ മേഖലകളിൽ ഇരുരാജ്യങ്ങളും തമ്മിലുള്ള പങ്കാളിത്തം വലിയ തോതിൽ വളർന്നിട്ടുണ്ടെന്ന് വിദേശകാര്യ മന്ത്രി വ്യക്തമാക്കി.

ഇന്ത്യയും റഷ്യയും തമ്മിലുള്ള പതിറ്റാണ്ടുകൾ നീണ്ട സുദൃഢമായ സൗഹൃദത്തിന്റെ പ്രതിഫലനമാണ് ഈ സന്ദർശനമെന്ന് പ്രസിഡന്റ് പുടിൻ പറഞ്ഞു. ആഗോളതലത്തിലെ പ്രതിസന്ധികൾക്കിടയിലും ഇരുരാജ്യങ്ങളും തമ്മിലുള്ള ഉഭയകക്ഷി വ്യാപാരം ഈ വർഷം ഗണ്യമായി വർധിച്ചതായി പുടിൻ ചൂണ്ടിക്കാട്ടി. ഇന്ത്യ-റഷ്യ ബന്ധത്തിന് പ്രധാനമന്ത്രി നരേന്ദ്ര മോദി നൽകുന്ന വ്യക്തിപരമായ ശ്രദ്ധയും താല്പര്യവുമാണ് ഈ നേട്ടത്തിന് പ്രധാന കാരണമെന്നും അദ്ദേഹം കൂട്ടിച്ചേർത്തു.

ഇന്ത്യൻ കാർഷിക മേഖലയ്ക്കും കർഷകർക്കും ആവശ്യമായ രാസവളങ്ങളുടെ വിതരണം വർധിപ്പിക്കാൻ റഷ്യ പ്രതിജ്ഞാബദ്ധമാണെന്ന് പുടിൻ വ്യക്തമാക്കി. ആണവോർജം, നൂതന സാങ്കേതികവിദ്യ തുടങ്ങിയ മേഖലകളിലെ സംയുക്ത പ്രവർത്തനങ്ങൾ കൂടുതൽ വിപുലീകരിക്കാനും ധാരണയായി. പ്രധാനമന്ത്രി മോദിക്ക് തന്റെ ഹൃദ്യമായ ആശംസകൾ കൈമാറാൻ ജയശങ്കറോട് ആവശ്യപ്പെട്ട പുടിൻ, എസ്.സി.ഒ ഉച്ചകോടിയുടെ വേദിയിൽ മോദിയുമായി ഉടൻ കൂടിക്കാഴ്ച നടത്താൻ സാധിക്കുമെന്ന പ്രതീക്ഷയും പങ്കുവെച്ചു. പരമ്പരാഗത പ്രതിരോധ-ബഹിരാകാശ ബന്ധങ്ങൾക്കപ്പുറം സാമ്പത്തിക-തന്ത്രപ്രധാന പങ്കാളിത്തം കൂടുതൽ ആഴത്തിലാക്കാനുള്ള നിർണായക ചുവടുവെപ്പായി ഇരുപക്ഷവും ഈ കൂടിക്കാഴ്ചയെ വിലയിരുത്തുന്നു.

---------------

Hindusthan Samachar / Roshith K